JEREMÍAS 30 - Dios Rimashcata Quillcashcami

Prezu apashcacunata Mandac Dios cutichimunamanta

¹ Mandac Diosca Jeremiasta rimashpaca:

² «Israelcunata Mandac Dios ñucaca: Ñuca rimashcata shuc libropi tucui quillcai.

³ Ñuca acllashca israelpuramanta, Judá llactapi causacpuramanta prezu apashcacunata cutichimuna punzhami chayamucun. Paicunapac ñaupa taitacunaman ñuca cushca llactamanmi pushamusha. Chaipimi causanga. Chaitaca Mandac Dios ñucami nini» nirca.

⁴ Mandac Dios Israel llactapi, Judá llactapi causaccunamanta

⁵ rimashpaca: «Paicuna yallita mancharishpa sinchita caparishcatami uyani. Cushi causaica mana tiyanchu. Yalli manchaillami tiyan.

⁶ Tapunacuichic. ¿Shuc carica huahuata sajuarinchu? Ñucaca, ¿imamantatac caricuna sajuarina nanaihuan cac huarmi shina, cinturata maquihuan japirishpa, ñahuicunapish yuracyashpa, shayacucta ricurcani?

⁷ ¡Aij, chai punzhaca yalli llaquimi cagrin! Chashna llaquica jaicapi mana tiyashcachu. Jacobopac huahua huahuacunamanca yalli llaqui punzhami canga. Shina cacpipish, paicunataca quishpichishami» ninmi.

⁸ Tucuita Mandac Dios ñucaca: «Chai punzhapica cancunapac cungapi tiyacuc yugota paquishpami coyundacunatapish pitisha. Ña mana shuctac llactapi causaccuna servichishpa causangachu.

⁹ Ashtahuanpish Mandac Dios ñucata, jatun mandac Davidtami servinga. Paitami mandac cachun churasha» nini.

¹⁰ Mandac Dios ñucaca: «Ñucata servic Jacobolla, ama manchaichu. Israelcunalla, ama chucchuichicchu. Ñucami canpish, cambac huahuacunatapish caru llactapi prezu causacucpi, chaimanta llucchishpa quishpichisha. Jacobopac huahua huahuacunaca mana manchashpami cushilla causanga. Pipish mana ashtahuan manchachingachu.

¹¹ Canta quishpichingapacca canhuanmi casha. Ñucami canta caita chaita cacharcani. Tucui chai llactacunatami tucuchisha. Ashtahuanpish cantaca mana tucuchishachu. Chaipac randica, cashcata ruhuashpami taripasha. Canta llaquichinataca manatac saquishachu. Chaitaca Mandac Dios ñucami nini» ninmi.

¹² Mandac Diosca: «Cambac llaquica mana allichipacchu. Cambac chugrica mana jambipacmi.

¹³ Cambac llaquita ricushpa allichicca pipish mana tiyanchu. Chugrita alliyachingapacca imapish mana tiyanchu.

¹⁴ Canta tucui cuyaccunapish ña mana yuyarinchu. Cantaca pipish mana mashcanchu. Cantaca ñucata piñac runata shinami chugrichircani. Canllatac yalli mana allita ruhuashcamanta, yalli juchayuc cashcamantami mana llaquishpa chugrichircani.

¹⁵ Canllatac yalli mana allita ruhuashcamanta, yalli juchayuc cashcamantami llaquichircani. Cambac nanaica mana jambipacchu. ¿Ima nishpatac yallita caparicungui?

¹⁶ Tucui canta tucuchiccunaca tucuchishcami canga. Canta piñaccunaca prezushcami canga. Canta saruccunaca sarushcami canga. Canmanta quichuccunamantapish quichungami. Canmanta shuhuaccunamantapish shuhuangami.

¹⁷ Canta: “Sionca shitashcami siricun. Pipish mana yuyarinchu” nicucpipish, ñucallatac jambita cachashpami, cambac chugritaca alliyachisha. Chaitaca Mandac Dios ñucami nini» ninmi.

¹⁸ Mandac Diosca: «Riquichic, Jacobopac huahua huahuacunataca prezumanta cutin llucchimushpami, paicunapac carpa huasicunataca allichisha. Paicuna causana llactaca tucurishca llacta jahuallapitacmi shayachishca canga. Mandashpa tiyana huasipish utcaman maipi cashcallapitacmi shayachishca canga.

¹⁹ Ñucata pagui nishpa cantashcapish, cushicushpa asishcapish uyaringami. Paimantaca achcatami mirachisha. Mana tucuchishachu. Paitaca alli nishami. Paica mana yanga nishcachu canga.

²⁰ Jacobopac huahuacunaca punta shinallatacmi canga. Paicuna tandanacushcapish ñuca ñaupapica sinchimi canga. Paicunata llaquichiccunataca llaquichishami.

²¹ Paicunapuramantami shuc mandac llucshinga. Paicunapuramanta shucmi mandanga. Paitaca ñucapacman cuchuyachun saquishami. Shina saquicpica, ñucapacman cuchuyangami. Ñucapacman cuchuyanataca pipish mana pudinchu.

²² Cancunaca ñuca acllashcacunami canguichic. Ñucaca cancunapac Diosmi casha. Chaitaca Mandac Diosmi nini.

²³ Mandac Diosca sinchi huaira jatarishca shinami piñarishca. Chashna sinchi huaira shina piñarishpami paita mana manchaccunataca llaquichinga.

²⁴ Mandac Dios yallita piñarishcaca paipac shungupi yuyarishcata pactachingacaman mana pasangachu. Tucuri punzhacunapimi chaitaca entendinguichic» ninmi.