JEREMÍAS 29 - Dios Rimashcata Quillcashcami

Prezucunaman Jeremías cartata cachashcamanta

¹ Nabucodonosor Jerusalenmanta Babilonia llactaman prezu apashca pushac yuyaccunaman, curacunaman, Dios ima nishcata huillaccunaman, shuctac gentecunamanmi Dios ima nishcata huillac Jeremiasca shuc cartata quillcashpa cacharca. Chaitaca Jerusalenmantami cacharca.

² (Chai cartataca jatun mandac Joaquintapish, paipac mama jatun mandactapish, shuctac mandaccunatapish, Judá llactata, Jerusalenta mandaccunatapish, artesanocunatapish, fierrerocunatapish Jerusalenmanta prezu apashca quipami cacharca).

³ Chai cartataca Safanpac churi Elasaman, Hilquiaspac churi Gemariasmanmi cushpa cacharca. Paicunataca Judá llactata jatun mandac Sedequiasmi Babilonia llactata jatun mandac Nabucodonosorpacman cacharca. Chai cartapica:

⁴ «Israelcunapac tucuita Mandac Diosca Jerusalenmanta Babilonia llactaman prezu rishcacunataca:

⁵ Huasicunata shayachishpa, chaipi causaichic. Huertacunata ruhuashpa, chaipi pucushcata micuichic.

⁶ Cazarashpa churicunatapish, ushicunatapish charichic. Churicunapish, ushicunapish huahuacunata charichun cazarachichic. Ashtahuan mirarichic. Ama tucurichicchu.

⁷ Cancuna prezu tiyacuc llactapi cushi causai tiyachun munaichic. Chai llactapi cushi causai tiyacpica, cancunapish casillami causanguichic. Chaimanta cushi causai tiyachun ñucata mañaichic.

⁸ Israelcunapac tucuita Mandac Dios ñucaca: Cancunahuan causac huillaccunata, adivinocunata ama uyanguichicchu. Paicuna muscushcatapish ama cazunguichicchu.

⁹ Llullashpami ñuca shutipi huillan. Paicuna huillachunca mana cacharcanichu. Chaitaca Mandac Dios ñucami nini.

¹⁰ Cutinllatacmi Mandac Diosca: Cancuna Babilonia llactapi canchis chunga huata cacpimi, cancunata ricuc shamusha. Chaipimi ñuca huillashcata pactachishpa, cancunaman allita ruhuashpa, cai llactaman cutichimungapac risha.

¹¹ Ñucaca cancunaman ima ruhuanata yuyaricushcataca yachanimi. Cancuna cushilla shuyashpa causachunca, cancunata llaquichinapac randica, cushi causaitami cusha. Chaitaca Mandac Dios ñucami nini.

¹² Shina ruhuacpica, ñucata mañangapac shamunguichicmi. Chashna mañacpica, ñucaca uyashami.

¹³ Cancunaca ñucata tucui shunguhuan mashcashpaca taringuichicmi.

¹⁴ Cancunaca taringuichicmi. Prezumanta cutichimushpami, ñuca llucchishpa cachashcacunataca tucui llactacunamanta tandachisha. Maimanta ñuca llucchishpa cachashca pushtullamantacmi cutichimusha. Chaitaca Mandac Dios ñucami nini.

¹⁵ Ashtahuanpish cancunaca: “Mandac Diosca Babilonia llactapipish pai ima nishcata huillaccunata ñucanchicman cushcami” nircanguichicmi.

¹⁶ Shina cacpipish, David mandashpa tiyarinapi tiyacuc jatun mandacmanta, cancunahuan pacta mana prezu apashca cai llactapi causaccunamanta,

¹⁷ tucuita Mandac Dios ñuca rimashpaca: Paicunata piñashpami jatun macanacuita cachashpa, yarcaihuan, jatun ungüihuan llaquichigrini. Mana micuipac ismushca higocunata shinami ruhuasha.

¹⁸ Jatun macanacuipi yarcaihuan, jatun ungüihuanmi catipi llaquichisha. Tucui cai pachapi tiyac llactacunapi causaccunami paicunata burlashpa, ima llaqui tucushpachari alli canman ningacuna. Shinallatac paicunata shuctac llactaman ñuca llucchishpa cachacpica, paicunata ricushpaca mancharishpa pingaichingacunami.

¹⁹ Cancunallatac ñucata servic huillaccunata cutin cutin cachashpa, huillachishcata mana cazushcamantami chashna tucunguichic. Chaitaca Mandac Dios ñucami nini.

²⁰ Jerusalenmanta Babilonia llactaman prezu cachashcacuna Mandac Dios rimashcata uyaichic.

²¹ Israelcunapac tucuita Mandac Diosca llullashpa, ñuca shutipi huillac Coliaspac churi Acabmanta, Maasiaspac churi Sedequismanta rimashpaca: Babilonia llactata jatun mandac Nabucodonosorpac maquipimi churani. Paicunataca cancunapac ñaupallapitacmi huañuchinga.

²² Shina ruhuacpi, Judá llactamanta Babilonia llactaman prezu apashcacuna maldiciashpaca: “¡Mandac Diosca cantapish Sedequiasta shina, Acabta shina ruhuashpami alli canman! ¡Babilonia llactata jatun mandacca chai ishcai runacunatami ninapi cusarca!” ningacuna.

²³ Paicunaca israelcunapurapica huainayashapami yalli mana allita ruhuarca. Manapish ñuca huillachun cachacpimi, llullashpa ñuca shutipi huillarca. Chaitaca tucuimi yachani, ñucami chaitaca ricurcani. Chaitaca Mandac Dios ñucami nini» ninmi nirca.

Semaiasman shuc quillcata cachashcamanta

²⁴ Mandac Diosca «Nehelam llactamanta Semaiasta rimashpaca:

²⁵ “Israelcunapac tucuita Mandac Diosca: Canca tucui cai Jerusalenpi causaccunaman, Maasiaspac churi Sofonías curaman, caishuc curacunamanca cambac shutipi quillcashca cartatami cacharcangui. Chai cartapica:

²⁶ ‘Mandac Diosmi cantaca Joyada curapac randi, paipac huasipi ricuchun, shinallatac maijan juizhu illac runa Dios ima nishcata huillac tucushpa, huillai callaricpi, caspipi chaquita canichishpa prezuchun churarca’ nicurcami.

²⁷ Chaimanta cunanca, ¿imamantatac Anatot llactamanta Jeremías cancunaman huillacpica, mana rimangui?

²⁸ Paica Babilonia llactapi causaccunaman quillcashpaca: ‘Chai llactapica unai huatatami prezu causagringuichic. Huasicunata shayachishpami, chaipi causaichic. Huertacunata ruhuashpa, chaipi pucushcata micuichic’ nishpami cacharca” ningui» nirca.

²⁹ Chai cartataca Sofonías curami Dios ima nishcata huillac Jeremiaspac ñaupapi rezarca.

³⁰ Chaimantami Mandac Diosca Jeremiastaca:

³¹ «Mandac Dios Nehelam llactamanta Semaiasta ima nishcata tucui chaiman prezu apashcacunaman quillcai. Mandac Diosca: “Semaiasca manapish ñuca cachacpimi, llullashpa ñuca shutimi huillashpa, cancunata crichishca.

³² Chaimantami Mandac Dios ñucaca: Nehelam llactamanta Semaiastapish, paipac huahua huahuacunatapish llaquichigrinimi. Paicunapuramantaca shucllapish cai gentepurapica mana saquiringachu. Ñuca acllashcacunaman ñuca ima mana allita ruhuactaca pipish mana ricungachu. Chaica, Mandac Dios ñucata mana cazuchun huillashcamantami chashna tucunga” nishpa quillcai. Chaitaca Mandac Dios ñucami nini» nirca.