JEREMÍAS 28 - Dios Rimashcata Quillcashcami

Hananías llullashpa huillashcamanta

¹ Jatun mandac Sedequías Judá llactata chuscu huata pichca quillata mandacucpimi, Gabaón llactamanta Azurpac churi huillac Hananiasca Mandac Diospac huasipi curacunapac, gentecunapac ñaupapi ñucaman huillashpaca:

² «Israelcunapac tucuita Mandac Diosca: “Babilonia llactata jatun mandacpac yugotaca paquircanimi.

³ Ishcai huata quipami ñuca huasipi ima tiyashcacunata Babilonia llactata jatun mandac Nabucodonosor Babilonia llactaman apashcacunataca caiman cutichimusha.

⁴ Shinallatac Joacimpac churi Judá llactata jatun mandac Joacimtapish, Judá llactamanta Babilonia llactaman prezu apashcacunatapish cutichimushami. Ñucallatacmi Babilonia llactata jatun mandacpac yugotaca paquisha. Chaitaca Mandac Dios ñucami nini” ninmi» nirca.

⁵ Chaimanta Dios ima nishcata huillac Jeremías Mandac Diospac huasipi curacunapac, gentecunapac ñaupapi huillac Hananiastaca:

⁶ «¡Chashna cachun! Mandac Diosca chashna ruhuachunlla. Can huillashca shina, Mandac Diospac huasipi ima tiyashcacunata apashcatapish, prezu apashcatapish Babilonia llactamanta caiman cutichimuchun.

⁷ Shina cacpipish, cambac ñaupapi, gentecunapac ñaupapi ñuca rimashcata alli uyai.

⁸ Chaica, sarun huatacunapi canpish, ñucapish manarac tiyacpimi, huillaccunaca llactacunapipish, jatun llactacunapipish macanacuicuna, llaquicuna, yalli ungüicuna tiyanata huillashca.

⁹ Maijan huillac cushi causaimanta huillacpi, chai huillashca pactacpimi, ciertotac Mandac Dios cachashca huillac cactaca yachanchic» nirca.

¹⁰ Shina nicpimi, Hananiasca Jeremiaspac cungamanta yugota anchuchishpa paquirca.

¹¹ Quipaca Hananiasca gentecunapac ñaupapi rimashpaca: «Mandac Diosca: “Ishcai huata quipami Babilonia llactata jatun mandac Nabucodonosor tucui llactacunapi causaccunapac cungapi churashca yugotaca paquisha” ninmi» nirca. Shina nicpica, Jeremiasca chaimanta rircallami.

¹² Hananías Dios ima nishcata huillac Jeremiaspac cungamanta yugota japishpa, paquishca quipami Mandac Diosca Jeremiastaca:

¹³ «Rishpa, Hananiastaca: “Mandac Diosca: Canca caspi yugotaca paquircanguimi. Chai yugopac randica, fierro yugotami ruhuangui.

¹⁴ Chaica, israelcunapac tucuita Mandac Diosca: Babilonia llactata jatun mandac Nabucodonosorta servishpa causachunmi tucui cai llactacunapi causaccunapac cungapi fierro yugota churarcani. Tucuimi paita servishpa causanga. Sacha animalcunatapish pai mandachunmi paipac maquipi churarcani” ninmi nigri» nirca.

¹⁵ Chaimanta Jeremiasca Hananiastaca: «¡Hananías allita uyai! Mandac Diosca mana canta huillachun cachashcachu. Ashtahuanpish canca llullashpallami cai gentecunataca crichishcangui.

¹⁶ Chaimantami Mandac Diosca: “Canca ñucata cai gentecuna mana cazuchunmi parlarcangui. Chaimantami cai pachamanta anchuchigrini. Cai huatallatami huañungui” ninmi» nirca.

¹⁷ Hananiasca chai huatallatami canchis quilla tucucpi huañurca.