JEREMÍAS 26 - Dios Rimashcata Quillcashcami

Jeremiasta huañuchishun nishcamanta

¹ Josiaspac churi jatun mandac Joacim Judá llactata punta huatata mandacucpi, Mandac Dios Jeremiasta rimashpaca:

² «Ñucapac huasi pungupi shayarishpa, ñuca huillashcata Judá llactacunamanta ñucapac huasipi alli ningapac shamuccunaman huillai. Shuc rimashcallatapish mana saquishpa tucuita huillangui.

³ Can huillashcata cazushpa, tucui mashna mana alli causaita saquingapishchari. Paicuna cazucpica, paicuna mana allita ruhuashcamanta llaquichinataca ñucapish saquishami.

⁴ Paicunataca: “Mandac Diosca: Ñuca rimashcata mana uyashpa, cancunapac ñaupapi ñuca churashca mandashcacunata mana cazucpi,

⁵ ñuca ima nishcata huillac serviccunata cutin, cutin cancunapacman huillachun cachacpi, paicunata mana uyasha nicpica,

⁶ ima shinami Silo llactata tucuchircani, chashnallatacmi ruhuasha. Shinallatac tucui cai pachapi causaccuna, mana alli nishpa rimachunmi churasha” ninmi ningui» nirca.

⁷ Mandac Diospac huasipi Jeremías huillashcataca curacunapish, huillaccunapish, gentecunapish tucuimi uyarca.

⁸ Mandac Dios huillachun mandashcata Jeremías huillashca quipa curacunapish, huillaccunapish, gentecunapish paita japishpaca: «¡Huañunatacmi cangui!

⁹ ¿Ima nishpatac canca: “Cai huasica Silo llacta huasicuna shinami tucuchishca canga. Cai llactapish llaquinayaitami tucuchishca canga. Shucllapish mana saquiringachu” nishpa, Mandac Diospac shutipi huillangui?» nirca. Shina nishpami Jeremiasta llaquichingapac tucui mashna Mandac Diospac huasipi tandanacurca.

¹⁰ Judá llacta mandaccunaca chaita uyashpami, jatun mandac tiyarina huasimantaca Mandac Diospac huasiman rishpa, yaicuna mushuc pungu ladopi tiyarirca.

¹¹ Curacunapish, huillaccunapish mandaccunata, tucui gentecunata rimashpaca: «¡Cai runaca cancuna uyashca shinallatacmi cai llactata llaquichinata huillacun! Chaimanta cai runaca huañunami can» nirca.

¹² Shina nicpi, Jeremías chai mandaccunata, tucui gentecunata rimashpaca: «Mandac Diosmi cai huasita, cai gentecunata llaquichinata huillachun cacharca. Pai huillachun cachashcatami cancunaman huillarcani.

¹³ Chaimanta cunanca mana allita ruhuashpa causashcamanta allichirishpa, Mandac Dios rimashcata cazuichic. Shina ruhuacpimi, Mandac Diosca cancunata llaquichinata saquinga.

¹⁴ Ñucaca cancunapac maquipimi cani. Ñucataca cancuna munashcata ruhuaichiclla.

¹⁵ Ashtahuanpish cancunaca caitami yachana canguichic. Cancuna, ñuca manapish faltayuc cacpi, huañuchishpa yahuarta jichashpaca cancunapish, cai gentecunapish, caipi causaccunapishmi juchallinguichic. Ñucataca Mandac Diosllatacmi caita allita cancunaman huillachun cacharca» nirca.

¹⁶ Shina nicpimi, mandaccunapish, gentecunapish curacunata, huillaccunata rimashpaca: «Cai runaca Mandac Diospac shutipimi huillashca. Chaimanta mana huañunachu can» nirca.

¹⁷ Shina nicpimi, Judá llactata pushac yuyaccunapuramanta jatarishpa, tucui tandanacushca gentecunataca:

¹⁸ «Judá llactata jatun mandac Ezequías mandacui huatacunapimi, Moreset llactamanta huillac Miqueas Judá llactapi tucui causaccunaman Dios huillashcata huillarca. Pai huillashpaca: “Tucuita Mandac Diosca: Sión urcuca tarpuna allpa tucushpami yapushca canga. Jerusalenca rumi montón shina, ñuca huasi shayacuc lomaca sacha urcumi tucunga” ninmi.

¹⁹ Miqueastaca, ¿Judá llactata mandac Ezequiaschu, Judá llactapi tucui causaccunachu huañuchirca? ¿Manachu Mandac Diospac ñaupapi, paita manchashpa mañarca? Shina mañacpica, ¿manachu Mandac Diosca paicunata llaquichinata saquirca? Cai runata huañuchishpaca ñucanchicllatac llaquita apangapacmi huañuchishun» nirca.

²⁰ Quiriat-jearim llactamanta Semaiaspac churi Uriaspish Mandac Diospac shutipi huillacmi carca. Paica cai pueblopish, cai llactapish llaquichishca canatami Jeremías huillashca shinallatac huillarca.

²¹ Jatun mandac Joacimpish, pai churashca mandaccunapish, caishuc mandaccunapish pai huillashcataca uyarcami. Chaimantami jatun mandacca Uriasta huañuchinata munarca. Chaita Urías yachashpami, manchaihuan Egiptoman miticushpa rirca.

²² Chaimantami jatun mandac Joacimca Acborpac churi Elnatanta, shuctac runacunata Egiptoman cacharca.

²³ Paicuna Uriasta Egiptomanta llucchishpaca jatun mandac Joacimpacmanmi pusharca. Chaipimi paitaca espadahuan huañuchishpa, tucuita enterrana jutcupi shitarca.

²⁴ Ashtahuanpish Safanpac churi mandac Ahicamca Jeremiasta chaipi tandanacushcacunapac maquipi churachun, huañuchichun mana saquirca.