JEREMÍAS 24 - Dios Rimashcata Quillcashcami

Canashta higota muscuipi shina ricushcamanta

¹ Babilonia llactata jatun mandac Nabucodonosorca Joacimpac churi Judá llactata jatun mandac Joaquintapish, chai llacta shuctac mandaccunatapish, artesanocunatapish, fierrerocunatapish Jerusalenmanta Babilonia llactaman prezu apashca quipami, Mandac Diosca paipac huasi ñaupapi ishcai canashta higota ricuchirca.

² Shuc canashtapica punta pucushca sumac higocunami tiyacurca. Chaishuc canashtapica maita mana micuipac mana alli higocunami tiyacurca.

³ Chaita ricuchishpami Mandac Diosca: «Jeremías, ¿imatatac ricungui?» nirca. Shina nicpimi ñucaca: «Higocunatami ricuni. Alli higocunata, sumac higocunatami ricuni. Shinallatac mana alli higocunata, maita mana micuipac higocunatami ricuni» nircani.

⁴ Shina nicpimi, Mandac Dios ñucataca:

⁵ «Israelcunata Mandac Dios ñucaca: Sumac higocuna shinaca, Judá llactamanta caldeocunapac llactaman ñuca llucchishpa cachashca gentecunami.

⁶ Paicunata cuidashpami, cai llactaman cutin cutichimusha. Chashna cutichimushpaca, mana cutin llaquichishachu. Ñuca tarpushca shina yuracunataca mana cutin sapindi llucchishachu.

⁷ Ñucaca Mandac Dios cashcata ricsichunmi paicunamanca alli yuyaita cusha. Paicunaca ñuca acllashcacunami canga. Ñucaca paicunapac Diosmi casha. Chaica, paicunaca tucui shunguhuanmi ñucapacman cutinga.

⁸ Cutin maita mana micuipac mana alli higocunaca Judá llactata jatun mandac Sedequías, pai churashca mandaccuna, Jerusalenpi causacpuramanta saquirishcacuna, Egipto llactapi causaccunami.

⁹ Paicunataca tucui llactacunapi causaccuna asichun, mancharishpa parlanacuchun, yuyarina parlocunata paicunamanta llucchishpa, burlachunmi saquisha. Chashnami mai llactaman ñuca cachacpipish, llaqui tucunga.

¹⁰ Paicunataca jatun macanacuipi, yarcaipi, mancharina ungüihuan llaqui tucuchunmi saquisha. Paicunamanpish, paicunapac ñaupa taitacunamanpish cushca llactapi tucuringacamanmi chashna llaquichisha» nirca.