JEREMÍAS 23 - Dios Rimashcata Quillcashcami

Saquirishca israelcuna cutimunamanta

¹ Mandac Diosca: «¡Aij, ñuca ovejacunata caita chaita cachashpa chingachic michiccunalla!» ninmi.

² Chaimantami israelcunata Mandac Diosca ñuca llactamanta gentecunata michiccunataca: «Cancunaca, ñuca ovejacunata cuidanapac randica, manchachishpami caita chaita cachanguichic. Uyaichic, cancuna mana allita ruhuashcamantami llaquichigrini,

³ Shuctac llactaman ñucallatac cachashca ovejacunamanta saquirishca ovejacunataca ñucallatacmi cutin tandachisha. Shina tandachishpami, paicuna causacushca pushtullamantac cutichimusha. Chaipi causashpami achcata miranga.

⁴ Paicunata michichunca michiccunatami churasha. Shina churacpica, mana manchangacunachu, mana chucchungacunachu. Imapish mana illangachu.

⁵ Shamuc punzhacunapica Davidpac huahua huahuapuramantami cashcata ruhuac mandacta churasha. Paica Jatun Mandacmi. Allita mandashpami, cai pachapica imatapish alli ricushpa, cashcata ruhuashpa mandanga.

⁶ Pai mandacui punzhacunapica Judá llactapi causaccunaca quishpiringami. Israelcunapish imata mana manchashpami Mandac Diospi shunguta churashpa causanga. Chaimantami: “Mandac Diosca ñucanchicman cashcata ruhuacmi” nishpa cayangacuna.

⁷ Chai punzhacunapica: “¡Israelcunata Egiptomanta llucchimuc Mandac Diospac shutipi ari nini!” ninaca mana tiyangachu. Chaitaca Mandac Dios ñucami nini.

⁸ Ashtahuanpish: “¡Israelcunapac huahua huahuacunata jahuamanta, tucui llucchishpa cachashca llactacunamanta cutichimuc Mandac Diospac shutipimi ari nini!” ningacuna. Shina cutichimucpimi, paicunapac llactallapitac causanga» ninmi.

Llullac huillaccunamanta

⁹ Jeremiasca: «Llullashpa huillaccunamantaca shungu nanarishpa, yallita llaquirishpami tucui ñuca tullucunacaman chucchucuni. Jucha illac Mandac Dios rimashcata uyashpaca, paipac ñaupapi yuyai chingaricta vinota ubiashca runa shinami tucuni.

¹⁰ Cai llactaca huainayashpa juchacunata ruhuaccuna jundami. Mandac Dios mana alli nicpimi, allpapish shitashca pamba shina, michina pambacunapish tucui chaquishca. Shuccunata llaquichingapacllami sinchi cancuna» nirca.

¹¹ Mandac Diosca: «Ñucamanta huillac runapish, curacunapish ñucataca mana manchancunachu. Ñuca huasipipish mana allita ruhuashcatami ricuni.

¹² Chaimantami paicunapac ñanca pura tutapi lluchcarina ñan shina canga. Chaipica ñuca tangacpimi, urmashpa llaqui tucunga. Ñucallatacmi paicunamanca yallita llaqui punzhacunata apamusha.

¹³ Samaria llacta huillaccunataca mana allita huillacuctami ricurcani. Paicunaca Baal diospac shutipi huillashpami, ñuca acllashca israelcunataca pandachirca.

¹⁴ Shinallatac Jerusalenmanta huillaccunataca mana ricuipaccunata ruhuacuctami ricurcani. Paicunaca huainayashpa juchacunata ruhuashpa, llullashpallami purincuna. Shinallatac mana allita ruhuaccunatami cushichin. Chaimantami ñucapacmanca pipish mana cutin. Ñuca ñaupapica tucui paicunami Sodoma pueblopi causaccuna shina. Cutin Jerusalenpi causaccunaca Gomorrapi causaccuna shinami.

¹⁵ Chaimantami tucuita Mandac Dios ñuca chai huillaccunahuan piñarishpaca: “Paicunamanmi jayac ajenjota carashpa, veneno yacuta ubiachigrini. Jerusalenpi huillaccunamantami tucui mana allita ruhuanacunaca tucui llactapi mirarishca” ninmi ningui» nirca.

¹⁶ Tucuita Mandac Diosca: «Chai huillaccuna huillashcataca ama uyanguichicchu. Paicunaca yangallata huillashpami crichincuna. Paicunaca Mandac Dios ñuca muscuipi shina ricuchishcataca mana huillancunachu. Ashtahuanpish paicunapac yuyashcallatami huillan.

¹⁷ Paicunaca ñuca rimashcata piñaccunataca: “Cancunaca cushillami causanguichic” nincunami. Shinallatac maijanpish paicunapac shungu munashcata ruhuashpa causaccunataca: “Cancunaca mana llaqui tucunguichicchu” ninmi» nirca.

¹⁸ Jeremiasca: «Shina cacpipish, ¿pitac Mandac Dios cunashcata yacharca? ¿Pitac pai rimashcatapish uyarca? ¿Pitac pai rimashcataca cushilla uyarca?

¹⁹ Mandac Dios piñarishcaca mancharina acapana huaira shinami shamun. Paica acapana huairahuan shinami, mana allita ruhuaccunata llaquichinga.

²⁰ Mandac Diosca pai yuyashca shinata ruhuashpa, pactachingacamanmi pai piñarishcataca manatac pasachinga. Quipa punzhacunami chaicunataca allita yachanguichic» nirca.

²¹ Mandac Diosca: «Ñucaca chai huillaccunataca mana cacharcanichu. Paicunallatacmi callparca. Paicunamanca imatapish mana nircanichu. Ashtahuanpish llullashpami huillarca.

²² Ñuca acllashcacuna ñuca cunashcata uyashca cacpica, ñuca rimashcatami huillaiman carcani. Shina huillashpaca, mana alli causaccunatapish, mana allita ruhuaccunatapish allita ruhuanatami yachachishpa ñucapacman cutichimuiman carca» ninmi.

²³ Mandac Diosca: «¿Ñucaca ladollapi cac Dioschu cani? ¿Manachu carupi cac Dios cani?

²⁴ ¿Maijanpish ñuca ñaupamantaca miticui pudingachu? ¿Manachu ñucaca tucui jahua pachapipish, tucui cai pachapipish cani?

²⁵ Ñucaca chai huillaccunataca: “Muscurcanimi, muscurcanimi” nishpa llullashpa ñuca shutipi huillacuctami uyarcani.

²⁶ Chai huillaccunaca, ¿ima horascamantac chashna huillacunga? ¿Ima horascamantac paicunapac shungu munashcallata, yuyarishcallata llullashpa huillanga?

²⁷ Tucui paicuna muscushcata paicunapac ricsishcacunaman parlashpaca, ñuca acllashcacuna ñaupa taitacuna shina ñuca shutita cungarishpa, Baal dioscunata catichunmi parlashpa purincuna.

²⁸ Huillac runaca pai muscushcata parlachun. Ñuca rimashcata chasquicca mana llullashpa huillachun. Cupahuan trigohuanca mana chashnallatacchu.

²⁹ Ñuca rimashcaca, ¿manachu nina japiricuc shina? Shinallatac, ¿manachu rumita paquic martillo shina?

³⁰ Chaimantami shuhuashpa, llullashpa huillaccunataca llaquichigrini. Chaitaca Mandac Dios ñucami nini.

³¹ Chaica: “¡Diosmi huillachun cachan” nishpa huillaccunataca ñucami llaquichigrini! Chaitaca Mandac Dios ñucami nini.

³² Muscushcata llullashpa huillaccunahuanca piñarishcami cani. Paicunaca uyanalla shimicunata parlashpami, ñuca acllashcacunataca pandachin. Ñucaca paicunataca mana huillachun cacharcanichu. Cai gentecunamanca ima allitapish mana ruhuancunachu. Chaitaca Mandac Dios ñucami nini.

³³ Jeremías canta: “Cai llactapi causac maijancuna, mana cashpaca shuctac huillac, mana cashpaca cura: ¿Mandac Diosca imatatac huillan?” nishpa tapucpica: Canca: “Mandac Diosca: ‘Ñucaca cancunataca shitagrinimi’ ninmi ningui” nirca.

³⁴ Maijan huillac, maijan cura, shinallatac cai pueblopi causac maijan gentecuna: “Mandac Diosmi chashna huillan” nicpica paitapish paipac huasi ucupuratapish yallitami llaquichisha.

³⁵ Cancunahuan apanacucta, cancunapac huauquitaca: “¿Mandac Diosca imatatac nirca? ¿Mandac Diosca imatatac rimarca?” ninguichic.

³⁶ Cancunaca jaicapi: “Mandac Diosmi huillachun nirca” nishpaca, ama ninguichicchu. Chaica maijanpish chai rimashcata huillacpica, chai huillashcaca llashac carga shinami tucunga. Causac Diospac, tucuita Mandac ñucanchic Diospac rimashcata mana allita ruhuashcamantami chashnaca tucunga.

³⁷ Chai huillactaca: “¿Mandac Diosca imatatac cutichirca? ¿Imatatac nirca?” nishpa tapungui.

³⁸ Shina tapucpi cancuna: “Mandac Diosmi huillachun nirca” nicpica, Mandac Diosca: “Ñuca huillashcami ama nichun nishca jahua: ‘Mandac Diosmi huillachun nirca’ nicpica,

³⁹ cancunataca shitashpami saquisha. Cancunatapish, cancunaman, cancunapac taitacunaman cushca llactatapishmi ñuca ñaupamanta tucui chingachisha.

⁴⁰ Shina ruhuashpami, cancunataca punzhanta pingaipi causachun saquisha. Chashnami jaicapi mana cungarishpa yalli pingaichishca huiñaita causanguichic” ninmi» ningui.