JEREMÍAS 22 - Dios Rimashcata Quillcashcami

Judá llactata llaquichinamanta

¹ Mandac Diosca: «Judá llactata jatun mandacpac huasiman rishpa, caita huillai.

² Paitaca: “Davidpac jatun tiyarinapi tiyarishpa, mandacuc jatun mandaclla, canpish, canta serviccunapish, cai punguta yaicuc gentecunapish Mandac Dios rimashcata uyaichic.

³ Mandac Diosca: Imatapish allita, cashcata ruhuachic. Llaquihuan causac runata llaquichic runapac maquimanta cacharichichic. Shuctac llacta runacunatapish, taita mama illac huahuacunatapish, viudacunatapish ama llaquichichicchu. Mana faltayuc runata huañuchishpa, ama yahuarta jichaichicchu.

⁴ Ñuca mandashcacunata cazucpica, David mandashpa tiyarinapica jatun mandaccunaca mana illangachu. Mandana huasimanca yaicuna pungutami carretacunapi, caballocunapi yaicunga. Chashnami paicunapish, paicunata serviccunapish, paicunapac gentecunapish yaicunga.

⁵ Ashtahuanpish cai mandashcacunata mana cazucpica, cai huasitaca shitashca pamba shinatami saquisha. Chaitaca Mandac Diosca ñucami ari nini” ninmi ningui» nirca.

⁶ Mandac Diosca Judá llactata jatun mandacpac aillutaca: «Canca Galaad urcu shina, Líbano urcu pamba shinami cangui. Shina cacpipish, pipish mana causana shitashca pambatami saquisha.

⁷ Canta tucuchichunca runacunatami hachahuan cachasha. Paicunami cambac ashtahuan alli cedro yuracunataca pitishpa rupachinga.

⁸ Achca gentecuna cai llactata pasashpa, caishuc chaishuc tapunacushpaca: “¿Cai jatun llactataca imamantatac Mandac Diosca chashna llaquichirca?” ningacunami.

⁹ Shina nicpica: “Caipi causaccuna Mandac Dios-huan ari nishcata saquishpa, shuctac dioscunata servishpa, alli nishcamantami chashna tucushca” ningacuna» nirca.

¹⁰ Jatun mandac Josiasmantaca ama huacaichicchu. Pai huañushcamantaca ama llaquirichicchu. Ashtahuanpish shuctac llactaman prezu apacpi, pai huacharishca llactaman jaicapi mana cutina cashcamantami huacana canguichic.

¹¹ Josiaspac churi Judá llactata mandac Salumca paipac taita Josías huañucpimi, paipac randi mandarca. Mandac Diosca cai llactamanta apashca Salummanta rimashpaca: «Paica ashtahuan mana caimanca cutimungachu,

¹² ashtahuanpish paita prezu apashca llactapi huañushpami, cai llactataca mana cutinca ricunga.

Joacim ima tucunamanta

¹³ ¡Aij, shuhuashpa, sumac huasita ruhuac runalla! ¡Paica paipac ricsishca runata yanga trabajachishpami, imata mana pagan!

¹⁴ Maijanpish: “Ñucamanca jatun ucucunayuc huasita shayachisha. Jatun ventanacunata churashpami, ucucunataca cedro tablacunahuan ruhuashpa, pucahuan pintasha” ningami.

¹⁵ ¿Cedro caspicunamanta huasita ruhuashpallachu, jatun mandacmi cani nishpa yuyangui? Cambac taitaca, ¿manachu allita, cashcata ruhuashpa mandashpaca alli micushpa, ubiashpa causarca? ¿Manachu paica alli causarca?

¹⁶ Paica llaquilla causaccunamanpish, huacchacunamanpish allita mandashpami alli causarca. Ñucata ricsishcamantami chashnaca causan.

¹⁷ Shina cacpipish, cambac ñahuipish, cambac shungupish shuccunata llaquichishpa, yallita chayucyanallatami munan. Shinallatac mana faltayuc runata yahuarta jichanallata, llaquichinallata, millaita ruhuanallatami munan. Chaitaca Mandac Dios ñucami nini» ninmi.

¹⁸ Chaimanta Mandac Dios Josiaspac churi Judá llactata jatun mandac Joacimmanta rimashpaca: «Pai huañucpica, pipish: “¡Aij, ñuca huauquilla, ñuca panilla!” nishpaca, mana huacangachu. Shinallatac: “¡Aij, ñuca amolla, aij, ñuca jatun mandaclla!” nishpapish, mana llaquiringachu.

¹⁹ Aisashpa apashpami, Jerusalén pungumantaca canzhaman shitanga. Burro huañushcata shinami jutcupi enterranga.

Jerusalén ima tucunamanta

²⁰ Cambac tucui cuyashcacunaca tucurishcami. Chaimanta cunanca Líbano urcuman, Basán urcuman huichai rishpa, Abarim urcucunamanta sinchita capari.

²¹ Ñuca can alli causacucpi, rimacpi canca: “¡Manatac uyashachu!” nircanguimi. Canca chashnami huambramanta pacha ñuca rimashcata manatac uyasha nishpa causarcangui.

²² Cambac michiccunataca huairami apanga. Cambac cuyashcacunataca prezumi apanga. Shina tucucpica, can mana allita ruhuashpa causashcamantaca yallita pingaichishca, llaquichishcami cangui.

²³ Líbano urcu caspicunahuan shayachishca huasipimi, cedro caspicunapi cuzhata ruhuac shina causarcangui. ¡Canta yalli llaqui japicpica, shuc huarmi sajuarina nanaihuan caparic shinami caparingui!» ninmi.

²⁴ Mandac Diosca: «¡Ñuca shutipimi nini: Joacimpac churi Judá llactata jatun mandac Conías can ñuca alli lado maquipi sortejas shina cacpipish, chaimanta llucchimanmi!

²⁵ Shina llucchishpaca can manchana, canta huañuchinata munaccunapac, Babilonia llactata jatun mandac Nabucodonosorpac, caldeocunapac maquipimi cantaca churasha.

²⁶ Cantapish, canta sajuaric mamatapish cancuna mana huacharishca shuctac llactaman prezu apachunmi saquisha. Cancunaca chaipimi huañunguichic.

²⁷ Quiquin llactaman cutinata tucui shunguhuan munashpapish manatac cutimui pudinguichicchu.

²⁸ ¿Coniasca pipish mana ricusha nishca, allpamanga paquirishca shinachu? ¿Pipish mana munashca allpa plato shinachu? ¿Ima nishpatac paipish, paipac huahua huahuacunapish mana ricsishca llactaman llucchishpa cachashca cancuna?

²⁹ ¡Cai pacha llactacuna, Mandac Dios rimashcata uyaichicyari!» ninmi.

³⁰ Mandac Diosca: «Cai runa ima tucunata quillcaichic. Paica, paipac tucui causaipimi shuc huahuallatapish mana charinga. Paica mana alli causangachu. Paipac huahua huahuacunamantaca pipish David mandashpa tiyarinapica mana tiyaringachu. Judá llactatapish mana mandangachu» ninmi.