JEREMÍAS 19 - Dios Rimashcata Quillcashcami

Allpa puñuhuan chimbapurashcamanta

¹ Mandac Diosca: «Allpamanta puñuta ruhuac runapacman rishpa puñuta randishpa, Jerusalenpi causac pushac yuyaccunatapish, curacunata pushac yuyaccunatapish pushai.

² Chai quipaca inti llucshina ladopi tiyac pungu yaicuna ladoman rishpa, Ben-hinompac churipac pugru pambaman ri. Chaipica ñuca imata huillashcata ningui.

³ Paicunataca: “Judá llactata jatun mandaccunapish, Jerusalenpi causaccunapish Mandac Dios rimashcata uyaichic. Israelcunapac tucuita Mandac Diosca: Ñucami cai llactaman yalli llaquicunata cachagrini. Chai llaquita uyashpaca chucchushpa, ringricamanmi nanachinga.

⁴ Paicunaca ñucamanta caruyashpami, cai llactatapish shuccunapac maquipi churarca. Chashnami paicunapish, paicunapac taitacunapish, Judá llactata jatun mandaccunapish mana ricsishca shuctac dioscunaman inciensota cushnichirca. Shinallatac mana faltayuc runata huañuchishpami, cai llactapi yahuarta jicharca.

⁵ Baal diosman paicunapac churicunata cushpa tucuita rupachingapacmi altarcunata ruhuarca. Chaicunata ruhuachunca mana mandarcanichu, imatapish mana nircanichu. Shinallatac mana yuyarcanillapishchu.

⁶ Cai pugrutaca ña mana Tofet pugru pamba nishpa, shinallatac mana Ben-hinompac churipac pugru pamba nishpa cayangachu. Ashtahuanpish huañuchina pamba ningacunami. Chashna nina punzhacunami chayamunga.

⁷ Judá llactapi, Jerusalenpi causaccuna cai pambapi imata yuyaricushcatapish tucuchishami. Paicunata piñashpa huañuchinata munaccunapac maquipi churashpami, paicunapac ñaupallapitac espadahuan huañuchichun saquisha. Chai huañushcacunataca volac animalcuna, sacha animalcunami micunga.

⁸ Chai llactataca tucuipac mancharinata, burlashpa asinatami ruhuasha. Pipish chaita pasashpaca, yallita mancharingami, shinallatac chai llacta llaqui tucushcamanta burlashpa asingami.

⁹ Chaipi causaccunamanca paicunapac churicunapac, ushicunapac aichallatatacmi carasha. Paicunata piñashpa huañuchinata munac runacuna shamushpa, chai llacta muyundita shayaricpimi, imata mana ruhuai pudishpa, paicunahuan apanacuccunallatatac micunga” nirca.

¹⁰ Chai quipaca canhuan ric yuyaccuna ricucucpi, chai puñutaca paquingui.

¹¹ Shinallatac paicunataca: “Tucuita Mandac Diosca: Caipi causaccunatapish, cai llactatapish ñutuchigrinimi. Puñuta maijan paquicpi, cutin mana allichipactami saquigrini. Huañushcacunatapish maipi enterrana mana tiyacpimi, chai Tofet pamballapitac enterranga.

¹² Ñucaca cai llactatapish, caipi causaccunatapish Tofet pambata shina ruhuashpami llaquichisha.

¹³ Jerusalenpi tiyac huasi jahuacunapipish, Judá llactata jatun mandaccunapac huasi jahuacunapipish jahua pachapi tiyac lucerocunamanmi inciensota cushnichirca. Shinallatac shuctac dioscunamanpish vinota cushpami tallirca. Chaimantami chai huasicunaca Tofet pamba shinallatac mapayashca” ninmi ningui» nirca.

¹⁴ Jeremiasca Tofet pambapi Mandac Dios huillachun mandashcacunata nishca quipaca Mandac Diospac huasimanmi cutirca. Chai huasi canzha pambapi shayarishpami, chaipi tucui tandanacushcacunataca:

¹⁵ «Israelcunapac tucuita Mandac Diosca: Ñuca nishca shinami cai llactamanpish, muyundi uchilla llactacunamanpish yalli llaquita cachagrini. Paicunaca ñuca rimashcata mana uyangapacmi, yallita sinchi shungu tucushca ninmi» nirca.