JEREMÍAS 17 - Dios Rimashcata Quillcashcami

Judá llacta juchacunamanta

¹ Judá llactapi causaccunapac juchacunaca cincel fierrohuanmi quillcashca. Shinallatac diamante rumi puntahuanmi tablapi quillcashca shina, cancunapac shungupipish, cancunapac altar gachucunapipish quillcashca tiyacun.

² Cancunapac huahuacunaca jatun yuracuna ladopi tiyac Asera huarmi diosta yuyarina altarta, jatun lomacunapi cancuna churashca altarta,

³ jahua urcu pambacunapi tiyac altarcunatami yuyarin. Chashna juchata ruhuashcamantami cancunapac ima charishcacunatapish, ima sumaccunatapish shuhuaccuna apachun saquisha.

⁴ Ñuca cushca llactatapish shitashpa, cancuna mana ricsishca llactacunapi cancunata piñaccunata servishpa causachunmi saquisha. Cancuna yallita piñachishcamantami nina japiric shina piñarishca cani. Chai ninaca huiñaitami rupacungalla.

⁵ Mandac Diosca: «Ñucamanta anchurishpa, huañuclla runapi shunguta churashpa causacca llaqui tucungatacmi. Paipac shungupish ñucamanta anchuricunmi.

⁶ Shitashca pambapi huiñashca retama yura shinami canga. Ima alli shamuctapish mana ricushpa, gentecuna mana causana, shitashca rumi allpapi, cachi allpapimi causanga.

⁷ Ashtahuanpish Mandac Dios ñucata shuyashpa causacca alli nishcami canga.

⁸ Paica yacu ladopi huiñashca, callpacuc yacu ladoman sapiyashca yura shinami canga. Usyai huatacunapipish, mana anguyashpami, punzhanta pucucungalla.

⁹ Runapac shunguca tucuita atishpa llullashpa umacmi. ¿Chaitaca pitac entendinga?

¹⁰ ¡Mandac Dios ñucami tucui shunguta ricushpa, imata yuyacushcatapish yachani! ¡Paicuna ima shina causashca shinallatac, imata ruhuashca shinallatac cungapacmi chashnaca yachani!» ninmi.

¹¹ Cashcata mana ruhuashpa yallita chayucyac runaca sacha huallpa manapish paipac rurucunata ucllac shinami. Paica huambrarac cashpami charishcacunata saquishpa huañunga. Pai ruhuashcaca quipamanca yuyai illac runa ruhuashca shinami canga.

¹² Diospac sumaimana tiyana huasica callarimanta pacha tucuita yalli jahuapimi tiyacun.

¹³ Israelcuna shunguta churana Mandac Dioslla, tucui canta cungariccunaca pingaichishcami canga. Yacu llucshicuc shina, causaita cuc Mandac Diosmanta anchuriccunaca ñuto allpapi quillcashca shinami canga.

¹⁴ Mandac Dioslla, ñuca alli nina Diosmi cangui. Ñucata jambiyari. Can jambicpica, alli tucushatacmi. Quishpichiyari. Can quishpichicpica, quishpirishatacmi.

¹⁵ Gentecunaca ñucataca: «¿Maipitac Mandac Dios rimashcaca? ¡Cunanllatac chai rimashcacuna pactachunmi munanchic!» ninmi.

¹⁶ Ashtahuanpish ñucaca paicunata can llaquichichunca mana munarcanichu. Paicunaman jatun llaqui punzha chayachunpish mana munarcanichu. Chaitaca canllatac yachanguimi. Ñuca imata rimashpapish, cambac ñaupallapitacmi rimarcani.

¹⁷ Canca llaqui punzhacunapi ñucata pacacmi cangui. Chaimanta ama manchachichu.

¹⁸ Ñucata pingaichinapac randica, ñucata llaquichiccunata pingaichiyari. Ñucata manchachinapac randica, paicunata manchachiyari. Jatun llaqui punzhacunaca paicunata japichun. Paicunata llaquichishca jahuapish ashtahuan llaquichiyari.

Samana punzhata huacaichinamanta

¹⁹ Mandac Diosca: «Chai llactapi causac gentecuna yaicuna punguman rishpa shayariyari. Chaitaca Judá llactata jatun mandaccunami yaicuncuna, llucshincuna. Jerusalenpi tiyac tucui pungucunapipish shayariyari.

²⁰ Chaipi shayarishpa: “Cai pungucunata yaicuc Judá llactata jatun mandaccunapish, Jerusalenpi causaccunapish Mandac Dios rimashcata uyaichic.

²¹ Mandac Diosca: Cancunallatac llaquirichicyari. Samana punzhapica Jerusalén pungucunata ama imata apashpa yaicuichicchu.

²² Samana punzhapica cancunapac huasimantaca ama imata llucchichicchu. Imatapish ama ruhuaichicchu. Ashtahuanpish cancunapac ñaupa taitacunata mandashca shina, samana punzhataca ñucapaclla cachun chicanyachichic nishpa mandarcani.

²³ Shina mandacpipish, paicunaca mana uyarcacunachu. Ashtahuanpish rimashcata mana cazungapacmi sinchi shungu tucurca.

²⁴ Shina cacpipish, Mandac Dios ñucaca: Cancuna ñucata cazushpaca, samana punzhapi cai llacta pungucunataca ama imata apashpa yaicuichicchu. Ashtahuanpish samana punzhata ñucapaclla cachun chicanyachishpa, ama imata ruhuaichicchu.

²⁵ Shina ruhuacpica, cai llacta pungucunataca David mandashpa tiyarinapi tiyaric jatun mandaccunapish, caishuc mandaccunapishmi caballocunapi, carretacunapi yaicunga. Chashnami cai llactapica huiñaita causanga.

²⁶ Shinallatac tucui Judá llacta llactacunamantapish, Jerusalén muyundimantapish, Benjamín aillupac llactamantapish, Sefela pambamantapish, Neguev urcucunamantapishmi shamunga. Paicunaca ñucaman animalta cushpa rupachingapacmi shamunga. Shinallatac ofrendatapish, inciensotapish, ñucata alli nishpa huañuchishpa cuna animaltapish apamushpami, Mandac Dios ñucapac huasiman shamunga.

²⁷ Ashtahuanpish samana punzhata ñucapaclla cachun mana chicanyachisha nicpi, ñuca mandashcata mana uyacpi, chai samana punzhapi ama imata apashpa Jerusalén pungucunata yaicuchun nishcata mana cazucpica, chai pungucunataca ninata churashpami rupachisha. Chai ninaca Jerusalenpi tiyac mandana huasicamanmi rupachinga. Chai ninaca rupacungallami” ninmi ningui» nirca.