JEREMÍAS 16 - Dios Rimashcata Quillcashcami

Mandac Dios Jeremiasta rimashcamanta

¹ Mandac Dios ñucata rimashpaca:

² «Ama cai llactapi cazaranguichu. Churicunatapish, ushicunatapish ama charinguichu.

³ Mandac Dios ñucaca: Cai llactapi huacharishca churicunapish, ushicunapish, paicunapac taitacunapish, mamacunapish

⁴ yalli nanai ungüicunahuanmi huañunga. Chai huañushcacunamantaca pi mana huacangachu, shinallatac mana enterrangachu. Allpapimi huanu tucunga. Paicunaca jatun macanacuipi yalli yarcaihuanmi tucuringa. Chai huañushcacunataca volac animalcuna, sacha animalcunami micunga nini» nirca.

⁵ Mandac Diosca: «Cai gentecunataca mana llaquinichu, mana cuyanichu. Paicunamantaca cushi causaita anchuchircanimi. Canca chai gentecuna huañushca ucumanpish, duelo churarishcapac huasimanpish ama yaicunguichu. Chaipi huacangapacpish, llaquinacungapacpish ama yaicunguichu.

⁶ Cai llactapica uchillacunapish, jatuncunapish huañungami. Paicunamantaca pipish mana huacangachu, mana enterrangachu. Shinallatac pipish churanata lliquirishpa, acchata pitirishpa mana llaquiringachu.

⁷ Llaquihuan cashpa, cushichina micunatapish pi mana carangachu. Shinallatac taita mama huañushcamanta llaquilla cacpipish, cushichina ubianata pi mana cungachu.

⁸ Shinallatac jatun micui tiyac huasiman ama yaicunguichu. Ama chaipi caccunahuan micunguichu. Ama ubianguichu.

⁹ Israelcunapac tucuita Mandac Dios ñucaca: Cai llactapica cushicushpa yallita asinapish mana tiyangachu. Shinallatac noviocuna, noviacuna cushicushpa cantanapish mana tiyangachu. Chashnami cancuna causacui punzhapi, cancunapac ñaupapi tucunga nini.

¹⁰ Cai gentecunaman cai tucuita huillacpica paicunaca: “¿Ima nishpatac Mandac Diosca ñucanchictaca yallita llaquichisha nishpa huillachicunyari? Ñucanchicca, ¿ima mana allitatac ruhuashcanchicyari? Mana cashpaca, ¿ima juchata ruhuashpatac ñucanchic Mandac Diostaca piñachishcanchicyari?” ningami.

¹¹ Shina nicpica canca: “Mandac Diosca: Cancunapac taitacunami ñucata saquishpa, shuctac dioscunapac ñaupapi cungurishpa servirca. Chashnami ñucata cungarishpa, ñuca mandashcacunatapish mana pactachirca.

¹² Cancunacarin ñaupa taitacunatapish yalli ashtahuan mana allicunatami ruhuashcanguichic. Tucui cancunami ñuca nishcata mana uyashpa, cancunapac shungu munashcata ruhuashpa causacunguichic.

¹³ Chaimantami cancunapish, cancunapac ñaupa taitacunapish mana ricsishca llactaman cancunata llucchishpa cachagrini. Chaipimi tutapish, punzhapish shuctac dioscunata servinguichic. Cancunataca manatac llaquishachu” ninmi ningui» nirca.

¹⁴ Cutinllatac Mandac Diosca: «Pipish: “Israelcunata Egiptomanta llucchimuc Mandac Diospac shutipi” mana ari nina, punzhacunami chayamunga.

¹⁵ Ashtahuanpish cancunapac ñaupa taitacunaman cushca llactaman ñuca cutichimusha. Chaimantami: “Israelcunata jahua lado llactamantapish, shuctac llactaman cachashcacunatapish cutin cutichimuc Mandac Diospac shutipimi nini” ningami.

¹⁶ Cunanca tauca challuata japiccunatami israelcunata japimuchun cachagrini. Chai quipaca achca runacunatami tucui urcucunamanta, lomacunamanta quingraicunamanta sacha animalcunata japic shina, israelcunata japichun cachagrini.

¹⁷ Ñucaca paicuna imata ruhuashcacunataca tucuitami ricucuni. Paicuna ruhuashcaca imapish ñuca ñahuimantaca mana pacallachu.

¹⁸ Paicuna mana allita ruhuashcamantaca ashtahuan yallitami llaquichisha. Paicunapac huañushca dioscunahuanmi ñuca allpataca mapayachirca. Ñuca cushca llactapimi chai millanacunata jundachirca» ninmi.

Jeremías Mandac Diosta mañashcamanta

¹⁹ Mandac Dioslla, canca ñucapac sinchi torre shinami cangui. Ñucaman fuerzata cushpa, llaqui punzhacunapi ñucata cuidacmi cangui. Tucui cai pachamanta cambacman shamushpaca: «Ñucanchic taitacunaca imapacpish mana valic, llulla yanga dioscunatami charishca.

²⁰ ¿Runaca paipac dioscunataca ruhuai pudinchu? Ashtahuanpish chaicunaca mana dioscunachu» ningami.

²¹ Chaimantami cunanca ñuca poderta charishcata paicunaman ricsichigrini. Shina ruhuacpimi, ñuca shutica Mandac Dios cashcata yachanga.