JEREMÍAS 14 - Dios Rimashcata Quillcashcami

Yalli usyai tiyanamanta

¹ Yalli usyai cacpi, Mandac Dios Jeremiasta rimashpaca:

² «Judá llactapi causaccunaca duelo churashcami. Llacta pungucunapish ña urmanallami. Chaipi causaccunaca yalli llaquihuanmi allpapi siririn. Jerusalenpica caparishpa huacashcami uyarin.

³ Mandaccunami serviccunata yacuman cachan. Paicuna yacu junduman rishpa, mana yacuta tarishpaca, chushac puñucunahuanmi yallita pingaihuan umata taparishpa cutincuna.

⁴ Chai llactapi mana tamyacpimi, allpapish yallita chaquirca. Allpapi trabajaccunaca yallita pingaihuan umata taparin.

⁵ Quihua mana tiyashcamantami pambapi puric tarugacunapish huachashca pushtullapitac huahuata shitashpa rincuna.

⁶ Sacha burrocunaca urcucunaman rishpami, chacal animalcuna shina, huairata aisan. Quihua mana tiyashcamantami yallita irquiyashpa, huañunalla tucuncuna» nirca.

⁷ Mandac Dioslla, ñucanchic juchacunallatac ñucanchic mana alli cashcata ricuchicucpipish, cambac shutita cuyashcamanta quishpichiyari. Ñucanchicca canta mana cazushpa, juchata ruhuashpami yallita canta piñachircanchic.

⁸ Llaqui punzhacunapi quishpichichun israelcuna shuyana, quishpichic Dioslla, ¿ima nishpatac cai llactapica caru llacta runa shina tucungui? ¿Ima nishpatac puric runa pacaringapac carpata shayachic shina tucungui?

⁹ ¿Ima nishpatac mancharishpa imatapish mana ruhuai pudic runa shina tucungui? ¿Ima nishpatac shuc sinchi runa mana quishpichi pudic shina tucungui? Shina cashpapish, Mandac Dioslla, canca ñucanchic-huanmi cangui. Ñucanchicca cambac shutipi cayashcami canchic. ¡Ñucanchictaca ama saquichu!

¹⁰ Mandac Dios chai llactamanta rimashpaca: «Paicunaca mana shaicushpa juchata ruhuanallata, caiman chaiman puricunallatami munan. Chaimantami paicunataca mana chasquini. Cunanmi paicuna juchacunata ruhuashcata yuyarishpa llaquichigrini» ninmi.

¹¹ Mandac Diosca: «Ama cai gentecunaman ñuca allita ruhuachun mañaichu.

¹² Ayunashpa caparishpa mañacpipish ñucaca mana uyashachu. Ñucaman animalcunata cushpa tucui rupachicpipish, ofrendata cucpipish mana chasquishachu. Ashtahuanpish jatun macanacuihuan, yalli yarcaihuan, ungüicunahuanmi tucuchisha» nirca.

¹³ Shina nicpimi ñucaca: «¡Aij, Mandac Dioslla! canmanta huillaccunaca: “Jatun macanacuipish, yarcaipish mana tiyangachu. Ashtahuanpish Diosmi cushi causaita cunga” ninmi» nircani.

¹⁴ Shina nicpimi, Mandac Diosca: «Paicunaca llullashpami ñuca shutipi huillancuna. Mana paicunataca cacharcanichu, mana mandarcanichu, shinallatac imatapish mana nircanichu. Muscuipi shina ricushcata huillashcaca llullallami, yangallami, paicunapac shungupi yuyarishcallatami huillan.

¹⁵ Chaimantami Mandac Dios ñucaca chai manapish ñuca cachacpi rishpa huillaccunataca: “Jatun macanacuipish, yalli yarcaipish mana tiyangachu” nishpa, ñuca shutipi llullaccunaca paicunaracmi jatun macanacuipi yarcaihuan huañunga.

¹⁶ Paicuna huillashcata uyaccunapish jatun macanacuipi yarcaihuanmi huañunga. Chai huañushcacunataca Jerusalén ñancunapimi shitanga. Paicunapac huarmicunatapish, churicunatapish, ushicunatapish pi enterrac mana tiyangachu. Chashnami paicuna mana allita ruhuashca shinallatac llaquichisha.

¹⁷ Canca gentecunataca: “Carihuan manarac chayarishca soltera shina, ñuca llactapi causaccunataca yallita llaqui japishcamanta, paicunapac nanai yalli sinchi cashcamantami ñuca ñahuimantaca tutapish, punzhapish huiquica shutucungalla.

¹⁸ Pambaman llucshishpaca, jatun macanacuipi huañuchishcacunata, llactaman yaicushpaca, yarcaihuan ungushcacunatami ricuni. Diosmanta huillaccunapish, curacunapish paicuna mana ricsishca llactapimi puricurca” ningui» nirca.

¹⁹ Jeremiasca: «Judá llactapi causaccunataca, ¿huiñaitachu shitarcangui? ¿Sión llactataca yallitachu millarcangui? ¿Ima nishpatac mana jambiripacta ñucanchictaca chugrichircangui? Cushi punzhata shuyacucpica, ima alli mana shamurcachu. Jambirina punzhata shuyacucpica, manchaimi shamurca.

²⁰ Mandac Dioslla, ñucanchicpish, ñucanchic taitacunapish canta mana cazushpa canta piñachishcata, mana allita ruhuashcata yuyarishpa llaquirinchicmi.

²¹ Cambac shutita cuyashcamanta ñucanchictaca ama saquichu. Can mandashpa tiyarina sumaimanatapish, ñucanchic-huan ari nishcatapish ama yangapi churaichu. Ñucanchicta yuyariyari.

²² ¿Maijan llacta dioscunamanta maijan tamyachic tiyanchu? Jahua pachapish, ¿pailla tamyata cachai pudinchu? Canca, ¿manachu ñucanchicta Mandac Dios cangui? Can caipi tucui ima tiyaccunata ruhuac cashcamantami canllapi shunguta churanchic» nirca.