JEREMÍAS 13 - Dios Rimashcata Quillcashcami

Lino chumbimanta

¹ Mandac Diosca: «Lino chumbita randishpa chumbilliri. Chai chumbitaca ama yacupi satinguichu» nirca.

² Ñucaca Mandac Dios mandashca shinallatacmi chumbita randishpa chumbillirircani.

³ Mandac Dios cutinllatac rimashpaca:

⁴ «Can randishca chumbita cinturamanta pascarishpa, Eufrates jatun yacuman rishpa, rumi quingraipi pacai» nirca.

⁵ Shina nicpimi, ñucaca Mandac Dios mandashca shinallatac Eufrates jatun yacu pataman rishpa pacarcani.

⁶ Ña tauca punzhacuna quipami Mandac Diosca: «Jatarishpa, ñuca pacachun cachashca chumbita Eufrates jatun yacu patamanta apamugri» nirca.

⁷ Shina nicpimi, Eufrates yacu pataman rishpa, pacashca pushtupi chai chumbita tarircani. Chai chumbica imapacpish mana vali, ismushcami cashca carca.

⁸ Chai quipami Mandac Dios cutinllatac rimashpaca:

⁹ «Judá llactapi, Jerusalenpi causac yallita jatun tucushca gentecunatapish ismuchishca chumbita shinami tucuchigrini.

¹⁰ Cai millai gentecunaca ñuca yachachishcata mana uyasha nincunachu. Paicunapac shungu munashcata ruhuashpami, shuctac dioscunata servishpa, paicunapac ñaupapi cungurishpa catin. Chaimantami chai ismushca chumbi shina, imapacpish mana vali tucunga.

¹¹ Israelcunapish, Judá llactapi causaccunapish chumbi runapac cinturapi pilluric shina, ñucahuan tandarishpa, ñuca llacta tucushpa, ñucata allimari cangui nichunmi cayarcani. Ashtahuanpish paicunaca mana cazurcachu. Chaitaca Mandac Dios ñucami nini» nirca.

Judá llactapi causaccunata tucuchinamanta

¹² Shinallatac canca: «Israelcunata Mandac Diosca: “Tucui puñumi vino jundachishca canga” ninmi ningui. Shina nicpimi paicunaca: “Tucui puñupi vino jundanataca, ¿manachu yachanchic?” ningami.

¹³ Shina nicpica canca: Mandac Diosca: “Ñucaca cai llactapi causaccunatapish, David tiyarinapi tiyaric jatun mandaccunatapish, curacunatapish, ñucamanta huillaccunatapish, shinallatac tucui Jerusalenpi tucui causaccunatapishmi yallita machachigrini.

¹⁴ Paicunataca paicunapura macanacuchishpami llaquichigrini. Taitacunatapish, churicunatapish llaquichigrinimi. Paicunataca mana cuyashachu. Ashtahuanpish mana llaquishpami, tucui tucuchisha” ninmi ningui» nirca.

Judá llactapi causaccunata prezu apanamanta

¹⁵ Jeremiasca: «¡Mandac Diosmi cancunata rimacun! ¡Ama jatun tucuichicchu, allita uyaichicyari!

¹⁶ Manarac amsa tuta tucucpi, manarac cancunapac chaquicuna pura urcucunapi mitcaricpi, cancunata Mandac Diostaca “sumaimanami cangui” nichicyari. Cancunaca achicyachic luzta shuyacucpipish, yallita pura tutatami tucunga.

¹⁷ Ashtahuanpish cancuna caita mana uyashpa, jatun tucucpica, ñuca shungullapimi pacalla huacasha. Mandac Diospac ovejacunata prezu apashcamantami yallita llaquirishpa, ñuca ñahuimanta huiquita jichasha.

¹⁸ Jatun mandacta, jatun mandacpac mamataca: “Cancuna sumac mandac cashcata ricuchic coronaca cancunapac umamanta urmashcami. Chaimanta cumurishpa, allpapi tiyarichicyari” niyari.

¹⁹ Neguev pambapi tiyac llactacunapish huichcashcami, pipish chaita mana pasanchu. Judá llactapi causaccunatapish tucuimi prezu apashca. Shucllatapish mana saquishpami apashca.

²⁰ Jahua lado llactamanta shamuccunata huichai ricuichicyari. ¿Maipitac canman saquishca sumac ovejacunaca?

²¹ Canllatac yachachishca, canhuan apanacuccunata Dios mandachun churacpica, ¿imatatac ninguiman? ¿Manachu canca huarmita sajuarina nanai japic shina llaqui tucungui?

²² Cambac shungupica: “¿Imamantatac cai llaquicunaca japinyari?” ninguipishchari. Chaica, can yallita juchallishcamantami japirishpa, churanata llatanashpa, lluchu changata saquic shina ruhuarca.

²³ ¿Etiopiamanta runaca yurac tucui pudinchu? ¿Muru leonpish shuctac color tucui pudinchu? Chashnallatacmi cancunapish mana allita ruhuac cashpaca, allitaca mana ruhuai pudinguichic.

²⁴ Chaimantami cancunataca shitashca pambamanta shamuc huaira tamota caiman chaiman shitac shina shic-huasha.

²⁵ Mandac Dios ñucami canta llaquichigrini. Ñucata cungarishpa llullata crishpa, causashcamantami can mana allita ruhuashca shinallatac llaquichigrini.

²⁶ Ñucallatacmi cambac churanataca ñahuicaman llatanachishpa ricuchishpa pingaichisha.

²⁷ Can yallita huainayashpami pucushca caballo shina lomacunapi caparishpa, jatun mana allita ruhuarcangui. Pambapica jatun millanacunata ruhuacuctami ricurcani. ¡Aij, Jerusalenlla! ¿Ima horascamantac ñucapac ñaupapica mapa illac tucugringui?» ninmi.