JEREMÍAS 10 - Dios Rimashcata Quillcashcami

Mandac Diosmantapish, ruhuashcalla dioscunamantapish

¹ Israelcunalla, Mandac Dios rimashcata uyaichic.

² Paica: «Shuctac llacta gentecuna ruhuashcataca ama yachacuichicchu. Jahua pachapi ima señalcuna ricuricpi, shuctac llactapi causaccuna mancharicucpipish, cancunaca ama mancharinguichicchu.

³ Chai gentecuna paicunapac yachachishcaca yangallami. Sachamanta shuc yurata pitishpami, caspita allichic runaca azuelahuan llacllashpa, shuc diosta ruhuan.

⁴ Chai quipaca sumac ricurichunmi cullquihuan, curihuan jahuallata cahuin. Ama cuyurichunca martillohuan clavashpami, sinchita shayachin.

⁵ Pepino chagra chaupipi volac animalcunata manchachichun churashca shinami, mana rimarishpa shayacun. Mana puri pudicpimi, huandushpa apan. Chaicunaca ima allitapish, ima mana allitapish mana ruhuai pudinchu. Chaimanta ama manchaichicchu» ninmi.

⁶ ¡Mandac Dioslla, can shinaca pi mana tiyanchu! Canllami jatun cangui. Cambac shutica jatun poderyucmi.

⁷ Tucui llactacunata Jatun Mandaclla, ¿pitac cantaca mana manchangayari? Canllatami manchana canchic. Tucui llactacunapi causac alli yachaccunapurapipish, mandaccunapurapipish can shinaca mana tiyanchu.

⁸ Tucui paicunami imatapish mana yachac, mana entendiccuna. Paicunapac caspi diosca imapac mana vali yanga cashcatami ricuchin.

⁹ Paicunaca Tarsis llactamantaca cutashca cullquita, Ufaz llactamantaca curitami apamun. Shina apamucpimi, cullquita yacuyachic runaca allichishpa shuc diosta ruhuan. Chashna ruhuashpa, azul, yana, puca churanata churachin. Tucui chaicunaca yachac runacuna ruhuashcallami.

¹⁰ Ashtahuanpish Mandac Diosca cashcata nic Diosmi. Paica huiñaita Mandac, causac Diosmi. Pai yallita piñaricpica, allpapish chucchunmi. Shuctac llactacunapi causaccunapish pai piñaricpica, mana causai pudincunachu.

¹¹ Paicunataca: «Jahua pachata, cai pachata mana ruhuac dioscunaca cai pachamanta chingaringami» ningui.

¹² Mandac Diosmi cai pachataca paipac maquihuan ruhuarca. Jahua pachatapish alli yachaihuanmi churarca.

¹³ Pai rimacpica, jahua pacha yacucunapish tandarinmi. Paimi puyutapish tucui cai pacha patacunamanta huichaiman apan. Paimi relampahuan tamyachishpa, huairataca, huaira tiyana pushtumanta llucchin.

¹⁴ Tucui gentecunami yuyai illac, imata mana yachaccuna. Cullquita yacuyachishpa ruhuashca dioscunaca yanga llullallami. Chaicunapica samaipish mana tiyanchu. Chaimantami cullquita yacuyachishpa, yanga dioscunata ruhuac runacunaca pingai tucushca.

¹⁵ Chaicunaca imapacpish mana vali burlanami. Dios llaquichicui punzhapica tucuringami.

¹⁶ Jacoboman tucuita cuc Diosca mana chai dioscuna shinachu. Paica tucui ima tiyacta ruhuacmi. Israel ailluca pai acllashcacunami. Paipac shutica tucuita Mandac Diosmi.

Judá llactata llaquichishcamanta

¹⁷ Muyundita pircashca llactapi causaccuna, cancuna charishcacunata tandaichic.

¹⁸ Mandac Diosca: «Cunanca cai llactapi causaccunataca huaracahuan shitac shina, yallita llaquichishpami pingaichigrini» ninmi.

¹⁹ Ñucaca: «¡Aij, yallita llaquihuanmi cani! Ñuca chugrica mana jambipacmi. Cai ungüi nanaitaca apanallatami cani. Cai llaquitaca apanallatami cani.

²⁰ Ñuca carpa huasipish urmashcami, huascacunapish tucui pitirishcami. Ñuca huahuacunapish mana cutingapacmi rishca. Ñuca carpata cutin shayachingapacpish, cortinacunata churangapacpish pi mana tiyanchu» nishpa caparircani.

²¹ Ñucaca: «Michiccunapish yuyai illac tucushpami, Mandac Diostaca mana servin. Chaimantami ima allita ruhuanatapish mana pudin. Paicunapac animalcunapish tucuimi caita chaita rishca.

²² Uyaichic, Judá llactapi tiyac tucui llactacunata shitashca pambata saquingapacmi jahua llactamanta manchanayaita caparishca uyarimun. Cai llactacunataca shitashca pambapi puric chacal animalcuna causanatami ruhuanga.

²³ Mandac Dioslla, causaica mana runapacchu. Pipish quiquin causaitaca mana mandai pudinchu. Chaitaca yachanimi.

²⁴ Mandac Dioslla, cashcata ruhuashpa llaquichiyari. Ashtahuanpish mana tucui chingachingapacca, ama yallita piñarishpa llaquichinguichu.

²⁵ Canta mana ricsic llactacunata, cambac shutipi mana mañac gentecunata yallita piñarishpa llaquichiyari. Chaica paicunami Jacobopac llactataca lambishpa micuc shina tucuchirca. Paicunami causana huasitapish shitashcata saquirca» nircani.