ISAÍAS 7 - Dios Rimashcata Quillcashcami

Jatun mandac Acazman Isaías huillashcamanta

¹ Uziaspac churi, Jotampac churi, Acaz mandacui punzhacunapimi Remaliaspac churi jatun mandac Pekaca Israel llactata mandacurca. Paimi Siria llactata jatun mandac Rezinhuan tandanacushpa, Jerusalenpi causaccunahuan macanacungapac huichai rirca. Chashna rishpapish Jerusalentaca mana japi pudircachu.

² Chaita Davidpac huahua huahuapura Acazman huillangapac shamushpaca: «Siria llactapi causaccunaca Efrainpac llactahuan tandanacushpami canhuan macanacungapac shamushca» nirca. Chashna nicpimi, jatun mandac Acazpac shungupish, Jerusalenpi causaccunapac shungupish huairahuan sachacuna caiman chaiman cuyuric shina chucchurca.

³ Chaimantami Mandac Diosca Isaiastaca: «Cunanca canpish, cambac churi Sear-jasubpish jahua tanqueman shamuc yacu patapi Acaz-huan tupagrichic. Chai tanqueca tacshaccunapac allpaman rina ñan ladopimi can.

⁴ Acaztaca: “Siria llactamanta Rezinhuan, Remalias-huanmi piña shamucun. Shina cacpipish, canca alli yuyaihuan, mana manchashpa shuyailla. Paicunaca nina chiriyashca, ishcai cushnicuc caspi shinami.

⁵ Siria llacta runacunahuan, Efraín aillucunahuan, Remaliaspac churicunahuan tandanacuccunaca canta llaquichingapacmi millaita yuyarishpa:

⁶ ‘Judá llactapi causaccunahuan macanacungapac rishpa manchachishunchic. Chai llactata japishpaca, ñucanchicpura chaupinacushunchic. Chai llactata jatun mandac cachunca, Tabeelpac churita churashunchic’ nincuna” ningui.

⁷ Ashtahuanpish Mandac Diosca: “Mana chashna tucungachu.

⁸ Chaica, Siria llactata mandacca Damascomi. Damascopac mandacca Rezinmi. Sucta chunga pichca huatapica Efrainpac llactaca ña mana llacta saquiringachu.

⁹ Efrainpac llactata mandacca Samaria llactami. Samaria llactapac mandacca Remaliasmi. Cancuna mana ñucata alli crishpaca, tucuringuichicmi” nishpa huillai» nirca.

¹⁰ Mandac Diosca Acazman huillachun cachashpaca:

¹¹ —Mandac Dios allpa ucupi, mana cashpaca, jahua pachapi shuc señalta canman ricuchichun mañai— nirca.

¹² Shina nicpimi Acazca: —Ima ricuchinacunata ruhuachun nishpa, Mandac Diosta mana piñachisha ninichu— nirca.

¹³ Shina nicpimi Isaiasca: —Davidpac huahuacuna uyaichic. ¿Cancunaca runata piñachina ashalla cacpichu, ñuca Diostapish piñachicunguichic?

¹⁴ Cunanca, Mandac Diosllatacmi shuc señalta ricuchigrin. Carihuan manarac chayarishca solterami huicsayuc tucushpa shuc cari huahuata charinga. Chai huahuataca Emanueltami shutichinga.

¹⁵ Chai huahuaca ima alli cacta, mana alli cacta yachangacamanmi mantequillata, abeja mishquillata micushpa causanga.

¹⁶ Chai huahua ima alli cacta, mana alli cacta manarac yachacpimi, can manchana ishcai jatun mandaccunapac llactaca shitashca saquiringa.

¹⁷ Mandac Diosca cantapish, can mandacuc llactapi causaccunatapish, cambac huasi ucupuracunatapishmi llaquichinga. Judá aillumanta Efraín aillu chicanyarishca punzhamanta cunancaman mana ricushca llaquicunami shamunga. (Chashnami Asiria llactata jatun mandactaca llaquichinga).

¹⁸ Chai punzhapimi Mandac Diosca Egiptopi tiyac jatun yacu patapi causaccunataca chuspicunata pucushpa cachac shina cachanga. Asiria llactapi causaccunataca bungacunata shinami cachanga.

¹⁹ Chashna shamushpami tucui pugru pambacunapipish, shitashca pambacunapipish, jatun rumi ucucunapipish, casha yuracunapipish, tucui yuracunapipish jundanga.

²⁰ Chai punzhapica Mandac Diosca Eufrates yacu lado llactapi alquilashca navajahuanmi cancunata uma acchatapish, barbastapish, chaqui millmatapish pitinga. Chai navaja shinaca Asiria llactata jatun mandacmi canga.

²¹ Chai huatapica shuc runallami shuclla vacata, ishcai ovejallata huiñachinga.

²² Chai animalcuna achca lecheta cucpimi, mantequillata micushpa causanga. Cai llactapi tucui saquirishcacunami mantequillata, abeja mishquita micushpa causanga.

²³ Chai huatapica chunga shuc kilo yalli pezac cullqui valic huaranga uvas yuracunata tarpuna pambapica cashacuna, cardos yuracunami huiñanga.

²⁴ Tucui llactacunapi cashacuna, cardos yuracuna huiñashca cacpimi, chaimanca flechacunahuan, arcocunahuan ringacuna.

²⁵ Azadonhuan tarpuna lomacunapica cashacuna, cardos yuracuna junda cacpimi, manchashpa pipish mana yaicunga. Ashtahuanpish huagracuna, ovejacuna michina pambami canga— nirca.