ISAÍAS 66 - Dios Rimashcata Quillcashcami

Diosta alli ninamanta

¹ Mandac Diosca: «Jahua pachaca ñuca mandashpa tiyanami. Cai pachaca ñuca chaqui sarunami. ¿Maipitac ñuca huasitaca shayachinguichic? ¿Maipitac ñuca samarinataca ruhuanguichic?

² Tucui caicunataca ñucami ruhuarcani. Chaimantami tucui caicunaca tiyan. Ñucaca shungupi llaquirishpa, ñuca mandashcata manchashpa, causac huaccha gentecunatami alli nishami.

³ Huagrata huañuchishpa ñucaman cushcaca shuc runata huañuchishpa cushca shinami. Ovejata huañuchishpa cushcaca allcuta huañuchishpa, cushca shinami. Ima ofrendata ñucaman cushcaca cuchi yahuarta cushca shinami. Inciensota cushnichishcaca yanga diosta mañashca shinami. Chashna paicuna quiquin munashcata ruhuashpa, millanayaita ruhuashpa shungupi cushicushcamantaca,

⁴ ñucapish chashnallatacmi paicunataca mana alli nishpa, paicuna manchana jatun llaquita cachasha. Paicunata ñuca cayacpica, pipish mana cutichircachu. Ñuca rimacpica, mana uyarcachu. Chaipac randica ñuca ñaupapi mana allita ruhuashpami, ñuca millashcatarac ruhuanata munarcanguichic» ninmi.

⁵ Mandac Diosta manchaccuna pai rimashcata uyaichicyari. Paica: «Ñuca shutita mañashcamanta millanayachishpa, llucchishpa cachashca cancunapac huauquicunaca: “¡Cancunapac cushicuita ricungapac, Mandac Diosca sumaimanami nishca cachun!” nincunami. Ashtahuanpish paicunaca pingaichishcami canga.

⁶ ¡Jerusalenpica yallita caparinacuimi uyaricun! ¡Diospac huasipi rimashcami uyaricun! ¡Mandac Dios paita piñaccunata rimashpa llaquichishcami uyaricun!

⁷ ¡Manarac sajuarina punzha pactacpimi, huahuata sajuarirca! ¡Manarac sajuarina nanai japicpimi, cari huahuata sajuarirca!

⁸ ¿Pitac chashna tucushcataca uyarca? ¿Pitac chashna tucunataca ricurca? ¿Shuc punzhallapichu cai pachaca sajuaringa? ¿Shuc cutinllachu shuc llactaca sajuaringa? Sión urcupi causaccunaca sajuarina nanai japicpimi, huahuacunata sajuarirca.

⁹ Ñucallatac sajuarina cuerpota pascac cashpaca, ¿manachu sajuarichi pudini? Chashna sajuarichic cashpaca, ¿imapactac jarcashayari?» nini. Chaitaca Mandac Dios ñucami nini.

¹⁰ Jerusalenta cuyaccunaca paihuan yallita cushicuichicyari. Tucui paimanta yana churanata churarishpa llaquilla caccunaca yallita cushicuichicyari.

¹¹ Mana nicta chuchuc shinami, yallita cushicunga. Chashnami leche jundashcata chuchushpa cushicunguichic» ninmi.

¹² Chaimantami Mandac Diosca: «Riquichic, ñucaca paimanca cushi causaitami jatun yacuta shina churani. Llactapi causaccunamanca yacu tallirishpa shamuc shinami, ima charinacunata cusha. Paicunami cancunataca chuchuchinga. Rigrapi marcashpami apamunga. Changa jahuapi churashpami cuyachishca cangui.

¹³ Shuc mama huahuata cushichic shinami ñucapish cancunataca cushichisha. Jerusalenpimi cushilla canguichic» ninmi.

¹⁴ Cancunaca chaita ricushpami, tucui shunguhuan cushicunguichic. Cancunapac tullucunapish quihua sisac shinami mushucyanga. Mandac Diosca paipac poderta paita serviccunaman ricsichingami. Ashtahuanpish paita piñaccunataca piñangami.

¹⁵ Mandac Diosca yallita piñarishpa, ninahuan jarcashpa yallita llaquichingapacmi rupacuc nina chaupipi, jatun acapana huaira shina, callpac carretacunahuan shamunga.

¹⁶ Mandac Diosca tucui gentecunatami ninahuan, espadahuan llaquichishpa taripanga. Mandac Dios huañuchishcacunaca achcami canga.

¹⁷ Mandac Diosca: «Mapa illac cangapac allichirishpa, huerta chaupiman catinacui rishpa, cuchi aichata, ucucha aichata, ima shuctac millana animalcunapac aichata micuccunataca tandachishpami tucuchisha.

¹⁸ Ñucaca paicuna imata ruhuashcatapish, imata yuyaricushcatapish yachanimi. Tucui llactamanta chican chican rimaita rimac, tucui runacunata tandachina punzhacunami chayamunga. Paicuna shamushpami, ñuca poderta ricunga.

¹⁹ Ñucaca paicunapica shuc señaltami churasha. Chai quipami miticushpa quishpirishcacunataca shuc llactacunaman cachasha. Chashnami Tarsis llactaman, arcocunahuan macanacuc Fut, Lidia llactacunaman, Tubal, Grecia llactaman cachasha. Shinallatac ñucata mana uyac, ñuca poderta mana ricuc llactaman, mama cucha patacunapi tiyac caru llactacunamanmi cachasha. Paicunami ñuca poderyuc cashcataca shuctac llactacunapi huillanga.

²⁰ Paicunami tucui cancunapac huahuacunataca tucui llactamanta pushamunga. Ñucaman cungapacmi caballocunapi, carretacunapi, tuldushca huandunacunapi, mulacunapi, camellocunapi montachishpa, ñucapaclla Jerusalenpi tiyac urcuman pushamunga. Israelcunaca Mandac Dios ñucaman cungapacmi ofrendata mapa illac imapish charinacunapi ñucapac huasiman apamushpa cuc shina, ñuca ñaupapi churanga.

²¹ Paicunapuramantaca maijantaca curacuna cachun, levitacuna cachunmi acllasha» ninmi.

²² Cutinllatac Mandac Diosca: «Ñuca ruhuashca mushuc jahua pachapish, mushuc cai pachapish huiñaicamanmi ñuca ñaupapi canga. Cancunapac huahua huahuacunapish huiñaicaman mana chingaringa.

²³ Quillanta, samana punzhantami tucui mashna ñuca ñaupaman shamushpa, ñucata alli ninga.

²⁴ Ñuca ñaupamanta llucshishpa cachashca, ñucata mana cazushpa cariyaccuna huañushpa, siricuctami ricunga. Paicunata micuc curucunaca manatac huañungachu. Paicunata rupachic ninaca manatac huañungachu. Paicunaca tucui gentecunapac ñaupapimi millanayachishca canga» ninmi.