ISAÍAS 65 - Dios Rimashcata Quillcashcami

Mana cazuccunata Dios llaquichinamanta

¹ Mandac Diosca: «Manapish tapuccuna, manapish mashcaccunami ñucataca tarirca. Ñuca shutita manapish cayaccunamanmi: “¡Caipimi cani, caipimi cani!” nircani.

² Punzhantami mana cazushpa, quiquin munashca ruhuashpa causac gentecunataca maquita chutashpa cayarcani.

³ Paicunaca huertacunapi animalta cushpa huañuchishpa, ladrillo jahuacunapi inciensota rupachishpami ñucataca punzhanta piñachirca.

⁴ Enterrashca jutcucuna chaupipimi pacalla pacarin. Cuchi aichatami micuncuna. Mana micuna mapa aicha caldomi paicunapac mangapica tiyacun.

⁵ Chashna cashpapish: “Carupi caichic, ama cuchuyaichicchu. Ñucanchicca canta yalli Diospaclla chicanyachishcami canchic” nincunami. Chai gentecunaca rupacuc cushni shinami ñucataca punzhanta umata nanachin.

⁶ Paicuna ruhuashcaca ñuca ñaupapimi quillcashca tiyacun. Mana upalla saquishachu. Ashtahuanpish paicuna imata ruhuashca shinami,

⁷ paicuna mana allita ruhuashcamantapish, cancunapac taitacuna mana allita ruhuashcamantapish llaquichigrini. Paicunaca urcucunapi, lomacunapi inciensota cushnichishpami, ñucataca yallita piñachirca. Chaimantami ñaupa huatacuna imata ruhuashcamantapish paicuna imata ruhuashca shina llaquichisha» ninmi.

⁸ Mandac Diosca: «Maijan shuc racimopi alli uvasta tarishpaca: “Chai uvasmantaca alli vinomi llucshinga. Chaimanta ama shitanguichu” ninmi. Chai shinallatacmi ñucata serviccunata cuyashcamanta mana tucui tucuchisha.

⁹ Jacobomantaca huahua huahuacunata mirachishami. Ñuca urcucunataca Judapac huahua huahuacunami japinga. Ñuca acllashcacunami llactataca paicuna causangapac japinga. Chaipica ñucata serviccunami causanga.

¹⁰ Sarón pambaca ñuca acllashcacuna ovejata michina pamba, Acor pambaca paicunapac huagracuna shayanami tucunga.

¹¹ Ashtahuanpish cancunaca Mandac Dios ñucatami saquircanguichic. Ñucapaclla urcutapish cungarircanguichicmi. Suerteta cuc diosman carangapacmi mizata tendircanguichic. Causaipi alli mandac nishca diosmanmi vinota curcanguichic. Chaimantami chai allpacunataca mana japinguichic.

¹² Chaimantami cancunataca espadahuan huañuchichun saquisha. Huañuchiccunapac ñaupapimi cunguringuichic. Cancunaca ñuca cayacpipish, ñuca rimacpipish, mana uyarcanguichicchu. Chaipac randica ñuca ñaupapimi mana allita ruhuarcanguichic. Ñuca millanayachishcataracmi ruhuanata munarcanguichic» ninmi.

¹³ Chaimantami Mandac Diosca: «Ñucata serviccunaca yallita micucungami, ashtahuanpish cancunaca yarcaihuanmi canguichic. Ñucata serviccunaca yacuta ubiacungami, ashtahuanpish cancunaca yacunayaihuanmi canguichic. Ñucata serviccunaca cushicungami, ashtahuanpish cancunaca pingaihuanmi canguichic.

¹⁴ Ñucata serviccunaca tucui shunguhuanmi yallita cushicushpa cantanga. Ashtahuanpish cancunaca shungu nanaihuanmi caparinguichic. Cancunapac shungu paquirishpami, yallita llaquiringuichic.

¹⁵ Ñucata serviccunataca mushuc shutipimi cayasha. Ashtahuanpish cancunapac shutitaca shuctac runacunata maldiciangapacmi cayangacuna. Mandac Dios ñucami cancunataca huañuchisha.

¹⁶ Maijanpish cai pachapi bendicionta mañashpaca, cashcata nic Diosmantami japinga. Maijanpish cai pachapi ari nicca cashcata nic Diosmantami ari ninga. Utcapi tiyashca llaquica illangami. Ñuca ñaupapica mana ashtahuan ricuringachu.

Mushuc jahua pachamantapish, mushuc cai pachamantapish

¹⁷ Ñucami jahua pachatapish, cai pachatapish mushucta ruhuasha. Utcapi ima tucushcataca cungaringami. Shungullapipish mana yuyaringachu.

¹⁸ Ashtahuanpish ñuca ruhuashcata ricushpami huiñaita cushicunguichic. Ñucami Jerusalenpi causaccunataca cushichisha. Chaimantami paicunaca yallita cushicunga.

¹⁹ Ñucapish Jerusalenmantami cushicusha. Ñuca acllashcacunahuanmi yallita cushicusha. Jerusalenpica llaquihuan huacashcaca jaicapi mana uyaringachu.

²⁰ Chaipica asha punzhallata causac huahuacunaca mana tiyangachu. Yuyaccunapish huañuna punzha manarac pactacpica, mana huañungachu. Patsac huatayuc huañushpaca, huambraracmi huañunga. Manarac patsac huatayuc huañushpaca, Dios mana alli nishca juchayuc runa nishcami canga.

²¹ Huasita shayachishpaca, chaipimi causanga. Uvas chagrata ruhuashpaca, chai pucushcatami micunga.

²² Mana shuccuna causachun huasita shayachingachu. Shuccuna micuchunpish mana tarpungachu. Ñuca acllashcacunaca yuracuna shinami unaita causanga. Ñuca acllashcacunaca paicunapac maquihuan ruhuashcahuanmi cushicunga.

²³ Mana yanga trabajangachu. Huahuacunapish mana llaqui tucungapacchu huacharinga. Paicunapish, paicunapac huahua huahuacunapish Mandac Dios bendiciashcami canga.

²⁴ Manarac cayacpimi, ñucaca uyasha. Paicuna rimaricucllapitacmi ñucaca uyasha.

²⁵ Atucca ovejahuan ishcai tucushpami puringa. Leonca huagra shinami quihuata micunga. Culebraca allpatami micunga. Ñucapaclla tucui urcupica llaquichicpish, millaita ruhuacpish mana tiyangachu» ninmi.