ISAÍAS 64 - Dios Rimashcata Quillcashcami

¹ ¡Jahua pachata lliquic shina, urai shamushpaca, allichari canguiman! Can ricuricpica, urcucunapish chucchunmanmi.

² Cunyacuc nina rupachicuc shina, nina cunyashpa yacuta timbuchic shinami chucchunga. Chashna tucucpica, cambac shutitaca canta piñaccuna ricsinmanmi. Llactacunapi causaccunapish cambac ñaupapi chucchunmanmi.

³ Jaicapi ñucanchic mana yuyashca mancharinacunata ruhuangapac can urai shamucpica, urcucunapish cambac ñaupapi chucchurcami.

⁴ Canta yuyarishpa shuyaccunaman ima ruhuashcataca jaicapi pipish mana uyashcachu, mana ricushcachu. Can shina shuctac Dios tiyashcataca pipish mana ricushcachu.

⁵ Cushicuihuan cashcata ruhuaccunahuan, canta yuyarishpa causaccunahuan tupangapac llucshircanguimi. Riqui, ñucanchic juchata ruhuashcamantaca piñarircanguimi. Cai tucui huatacunatami juchallata ruhuashpa catircanchic. Chashna cashpaca, ¿quishpirishunchu?

⁶ Tucui ñucanchicmi mapayashca runa shina canchic. Ñucanchic cashcata ruhuashcapish mapa llachapa shinami. Tucui ñucanchicmi chaquishca panga shina urmashcanchic. Ñucanchic mana allita ruhuashcallatacmi huaira shina aparca.

⁷ ¡Cambac shutita mañacca pipish mana tiyanchu! ¡Pipish canhuan cangapac mana sinchiyanchu! Chaimantami cambac ñahuitaca ñucanchicmanta pacarcangui. Ñucanchic mana allicunata ruhuashcacunallatac mandac shina, charicucpimi, anguyac shina, llaquita apachun saquircangui.

⁸ Mandac Dioslla, cunanca canmi ñucanchic Taita cangui. Ñucanchicca allpa turullami canchic. Canmi ñucanchictaca ruhuarcangui. Ñucanchicca can ruhuashcami canchic.

⁹ Mandac Dioslla, ama yallita piñarichu. Ñucanchic yalli mana allita ruhuashcatapish ama huiñaita yuyarichu. ¡Riqui, tucui ñucanchicmi can acllashca canchic! ¡Chaimanta yuyariyari!

¹⁰ Cambaclla acllashca llactaca shitashcami siricun. Sión urcupish, Jerusalén llactapish shitashca pambami siricun.

¹¹ Ñucanchic taitacuna can Diosta alli nina cambaclla huasipish rupashcami siricun. ¡Ñucanchic charishca sumaccunapish tucuimi tucurishca!

¹² Mandac Dioslla, cai tucuita ricushpaca, ¿manachu imata ruhuagringui? ¿Chashna upalla saquishpachu, ñucanchictaca llaquichicunguilla?