ISAÍAS 63 - Dios Rimashcata Quillcashcami

Mandac Dios paita piñaccunata llaquichinamanta

¹ ¿Pitac chai Edom llactamanta, Bosra llactamanta puca churanata churarishca shamucun? ¿Pitac jagan nicuc churanata churarishca jatun poderhuan shamucun? Quishpichingapac jatun poderyuc, cashcata rimac Diosmi cani.

² ¿Imamantatac churanaca puca? ¿Imamantaca uvaspi sarushca shina puca?

³ Ñucallami uvasta cutanapica uvasta sarucurcani. Gentepuramanta pi mana ñucahuan carcachu. Yallita piñarishpami sarucurcani. Chashna sarucucpimi, ñuca churanapi paicunapac yahuar chiraparishpa, tucui churanata cahuirca.

⁴ Paicunata llaquichina punzha chayamucuctami ñuca shungupi yuyaricurcani. Ñuca quishpichina huatami shamushca.

⁵ Ñuca muyundita chapacpica, pipish ñucata ayudac mana tiyarcachu. Chaita ricushpaca mancharishpa saquirircani. Chaimantami ñuca rigrallahuantac macanacushpa misharcani. Ñuca yallita piñarishcami sinchiyachirca.

⁶ Ñuca yallita piñarishpami, gentecunataca sarurcani. Chashna yallita piñarishpami machashca shinata saquishpa, paicunapac yahuartaca allpapi jicharcani.

Mandac Dios israelcunata cuyashcamanta

⁷ Mandac Dios yallita llaquic cashcata yuyarishami. Shinallatac Mandac Dios ñucanchicman mai sumaccunata ruhuashcamanta alli nina cashcatapish yuyarinimi. Mandac Diosca yallita llaquic cashcamanta, pai yallita cuyac cashcamantami israelcunamanca cai tucui allicunata ruhuashca.

⁸ Paica: «Paicunaca ñuca acllashca, mana llullac ñuca huahuacunami» nishpami, paicunataca quishpichirca.

⁹ Paicuna llaquilla japicpica, paipish llaquillami tucurca. Paica, mana paipac angelta cachashpachu quishpichirca. Ashtahuanpish pai llaquishcamanta, yallita cuyashcamantami quishpichishpa pushamurca. Chashnami sarun huatacunapi shina, tucui punzhacunapi jatarichishpa pushamurca.

¹⁰ Ashtahuanpish paicunaca mana cazushpami, paipac jucha illac Espirituta piñachirca. Chaimantami Diosca paicunata piñashpa, paicunahuan macanacurca.

¹¹ Shina cacpipish, ñaupa punzhacuna israelcunata Moisés llucchimushcatami yuyarirca. Chaimantami paicunaca: «¿Maipitac michic shina paipac ovejacunata mama cuchata pasachishpa, huichai pushamucca? ¿Maipitac paicunapac ñaupapi paipac jucha illac Espirituta churacca?

¹² ¿Pitac poderhuan Moisesta ayudashpa pushamurca? ¿Pitac paicunapac ñaupapi jatun cucha chaupita pasachishpa, huiñaita yuyarina shuti tucurca?

¹³ Paimi shitashca pambata caballo apamuc shina, manchana yacu chaupita mana mitcachishpa pushamurca.

¹⁴ Mandac Diospac Espiritumi pugru pambaman shamuc animalcunata shina michirca. Chashnami cambac shutita sumaimana cachun, can acllashcacunataca michircangui.

Llaquimanta llucchichun Diosta mañashcamanta

¹⁵ Jahua pachamanta ñucanchicta ricuiyari. Can causana, cambaclla sumaimana huasimanta chapaiyari. ¿Maipitac cambac jatun cuyaica? ¿Maipitac cambac poderca? ¿Maipitac ñucanchicta tucui shunguhuan llaquichicca? ¿Manachu llaquingui?

¹⁶ Abraham ñucanchicta mana yuyaricpipish, taita Israel ñucanchicta cungaricpipish canmi ñucanchic taita cangui. Mandac Dioslla, huiñaita ñucanchicta quishpichicmi cangui.

¹⁷ Mandac Dioslla, ¿ima nishpatac ñucanchictaca cambac ñanta ama catichun pandachircangui? ¿Ima nishpatac canta ama manchachun ñucanchic shunguta sinchiyachircangui? ¡Canta serviccunata, can cushca allpacunapi causac aillucunata cuyashcamantaca alli tucuiyari!

¹⁸ Asha huatacunallatami cambac acllashcacunaca cambaclla huasipica causarcanchic. Ashtahuanpish cunanca ñucanchicta piñaccunami cambaclla huasipica sarucun.

¹⁹ Jaicapi mana can mandashca causac shinami, llaquichishca cashcanchic. Jaicapi cambac shutita mana cayashca shinami tucushca canchic.