ISAÍAS 59 - Dios Rimashcata Quillcashcami

Israelcunapac juchacunamanta

¹ Riquichic, cancunata quishpichingapacca Mandac Diospac poderca mana chingarishcachu. Cancuna mañashcata mana uyangapacca, paipac ringrica mana huichcarishcachu.

² Ashtahuanpish cancuna mana allita ruhuashcallatacmi Diosmanta caruyachishca. Cancunapac juchallatacmi cancuna mañashcata uyanata jarcashca. Chaimantami paipac ñahuita pacashca.

³ Cancunapac maquica huañuchishca yahuarpi cahuirishcami. Cancunapac dedocunaca millaita ruhuashpami mapayashca. Cancunapac shimica llullallatami riman. Cancunapac calluca mana allillatami parlan.

⁴ Cashcata ruhuachun caparishpa mañacca pipish mana tiyanchu. Pipish mana cashcata ruhuangapac juezpacman rinchu. Ashtahuanpish yanga juchanchishpa, rimangapacllami rin. Millaita huicsayuc shina tucushpaca, imatapish mana allitami sajuarin.

⁵ Paicunaca culebrapac rurucunata ucllac shina, araña telata ahuac shinami causan. Maijanpish chai rurucunata micushpaca huañungami. Chai rurucunata tucyachicpica, culebracunami llucshinga.

⁶ Paicuna ahuashca telaca churaringapacpish mana valinchu. Paicuna imata ruhuashcahuanca mana tapari pudingachu. Imata ruhuashpapish mana allillatami ruhuan. Paicunapac maquicunaca imatapish llaquillatami ruhuan.

⁷ Paicunapac chaquicunaca mana allita ruhuangapacllami callpan. Mana faltayuc runata huañuchishpa yahuarta jichangapacllami utca rin. Paicunaca millaita ruhuanallatami yuyacun. Maita rishpapish llaquichishpa tucuchishpallami purin.

⁸ Cushilla causanataca mana yachanchu. Paicunapac causaipica cashcata ruhuanapish mana tiyanchu. Paicuna purina ñancunapish huishtumi. Maijanpish chai ñanta puricca cushi causaitaca mana ricsingachu.

⁹ Chaimantami cashcata ruhuashpa quishpichinapish ñucanchicmanta caruyashca. Allita ruhuanapish mana ñucanchicpacman cuchuyanchu. Achiclla punzhata shuyacucpica, pura tutami shamun. Achicta shuyacushpapish, tutapi shinami purinchic.

¹⁰ Ñahui mana ricuc shinami, maquihuan tantiashpa purinchic. Chaupi punzhapi cashpapish, pura tutapi shinami mitcarinchic. Huañushca shinami, amsa ucupi causanchic.

¹¹ Tucui ñucanchicmi osocuna shina huacacunchic. Palomacuna shina, llaquillata huacacunchic. Cashcata ruhuachun shuyacucpica, pi cashcata ruhuacca mana tiyanchu. Quishpichicca ñucanchicmanta carupimi.

¹² Ñucanchicca cambac ñaupapi yallitami mana cazushcanchic. Ñucanchicpac juchacunallatacmi ñucanchic mana alli cashcata ricuchin. Ñucanchicca millaita ruhuanataca mana saquishcanchicchu. Chaitaca yachanchicmi.

¹³ Ñucanchicta Mandac Diosta mana cazushpa, paita piñachishpami, paimanta anchurishcanchic. Pitapish llaquichinallata, Diosta mana cazunallatami rimanchic. Pandachishpa llaquipi churanallatami yuyashpa purinchic.

¹⁴ Chashnami allita ruhuanaca huashapi saquirirca. Cutin cashcata ruhuanaca ñucanchicmanta caruyarcami. Cashcata ninaca plazapimi mitcarishpa urmac shina tucurirca. Chaimantami allita ruhuanaca mana yaicui pudirca.

¹⁵ Cashcata rimanaca tucurishcami. Millaita ruhuanata saquishca runacunamantaca tucui pai charishcatami shuhuancuna. Mandac Diosca allita ruhuanata saquishcata ricushpami yallita piñarirca.

¹⁶ Mandac Diosca chashna millaita ruhuashpa causacucta ricurcami. Chashna ruhuacucpipish, pi mana ayudac tiyacpimi, yallita llaquirirca. Chaimantami paipac poderhuan quishpichirca. Shinami cashcata ruhuac cashcata ricuchirca.

¹⁷ Cashcata ruhuanataca fierro churanata shina, quishpirinataca cascota shinami, umapi churarirca. Paita mana cazushca shinallatac llaquichinataca churanata churaric shinami churarirca. Yallita cuyaihuanmi jahualla churaric shina taparirca.

¹⁸ Paita piñaccunataca llaquichina cashca shinallatacmi llaquichinga. Paita mana ricunayachiccunatapish, paita piñaccunatapish yallita piñarishpami llaquichinga. Mama cucha patapi causaccunatapish paicuna piñashca shinallatacmi llaquichinga.

¹⁹ Mandac Diospac shuti achic nicucta ricushpaca, inti llucshina ladomanta, inti tigrana ladocamanmi manchanga. Paica, paipac huaira tangacpi, jatun yacu shamuc shinami shamunga. Chashnami Mandac Diospac Espirituca shamunga.

²⁰ Mandac Diosca: «Sión urcumanmi quishpichicca shamunga. Millaita ruhuanata saquishca Jacobopac huahua huahuacunapacmanmi shamunga» ninmi.

²¹ Mandac Diosca: «Cancunahuanmi ari nini. Ñuca Espiritupish, cancunapac shimipi ñuca churashca rimaicunapish cunanmanta pachami cancunamanta, cancunapac huahuacunamanta, cancunapac nietocunamanta huiñai huiñaita mana caruyan» ninmi.