ISAÍAS 56 - Dios Rimashcata Quillcashcami

Dios-huan ari nishcata pactachinamanta

¹ Mandac Diosca: «Ñuca quishpichina punzhapish, ñuca cashcata ruhuana punzhapish ñami chayamugrin Chaimanta allita ruhuashpa, cashcata ruhuashpa causaichic» ninmi.

² Chaita pactachic runaca cushicuchun. Samana punzhatapish mana yangapi churashpa, millaita ruhuanamantapish jarcarishpa causac runaca yallita cushicuchun.

³ Caru llacta runa Mandac Diosta catic cashpaca: «Mandac Diosca pai acllashcapuramantaca ñucataca chicanyachingami» ama nichun. Eunuco runapish: «Ñucaca chaquishca yura shinami cani» ama nichun.

⁴ Chaica, Mandac Diosca: «Eunuco runa ñuca chicanyachishca samana punzhacunata huacaichishpa, ñuca munashcata ruhuashpa, ñucahuan ari nishcata ucllaric shina, chai yuyailla causacpica,

⁵ ñuca huasi pircapimi paipac shutita quillcasha. Chaimi churicunatapish, ushicunatapish yalli alli canga. Chai shutitaca tucui causaipimi jaicapi mana cungaringa.

⁶ Caru llacta runacunapac churicuna Mandac Dios ñucata servingapac, ñuca shutita cuyashpa ñucata servingapac shamucpi, shinallatac samana punzhata mana yangapi churashpa, ñuca ari nishcatapish ucllaric shina, chai yuyailla causacpica,

⁷ ñucapaclla urcuman pushashpami ñucata mañana huasipi samachisha. Animalta huañuchishpa, ñuca altarpi tucui rupachishpa ñucaman cushcatapish chasquishami. Ñuca huasica tucui gentecuna ñucata mañana huasi shutimi canga» nini.

⁸ Caita chaita rishca israelcunata tandachic Mandac Diosca: «Ñucaca tandachishcamanta yalli achcatami caiman cutin pushamusha.

Mana allita ruhuaccunata rimashcamanta

⁹ Pambapi causac animalcunapish, sacha animalcunapish micungapac shamuichic.

¹⁰ Israelcunata chapac runacunami ñahui mana ricuccuna shina, imata mana yachaccuna can. Paicunaca mana ladranata pudic allcucuna shinami, upalla siricun. Sueñunallatami munancuna.

¹¹ Paicunaca micushpapish mana sacsac allcucuna shinami can. Michiccuna cashpapish imata mana entendinchu. Quiquin munashcata ruhuashpa, quiquinpacllata mashcashpa, munashcallata ruhuancuna.

¹² Paicunaca: “¡Shamuichic, vinota, machana yacuta ubiashpa machashunchic! ¡Cayapish cunan punzha shinallatac, mana cashpaca ashtahuan allimi canga!” ninmi» nirca.