ISAÍAS 51 - Dios Rimashcata Quillcashcami

Sión llacta cushicunamanta

¹ Mandac Diosca: «Cashcata ruhuanata munaccunapish, ñucata mashcaccunapish uyaichicyari. Jatun rumimanta anchurishcacuna chai jatun rumita ricuichicyari. Cancuna llucchishca jatun rumita ricuichicyari.

² Cancunapac ñaupa taita Abrahamtapish, cancunata sajuaric mama Saratapish yuyarichicyari. Ashtahuanpish pai sapalla cacpimi, ñuca cayashpa bendiciashpa, achcata mirachircani.

³ Mandac Dios ñucaca Sión llactapi causaccunata cushichishatacmi. Tucui llaquilla caccunatami cushichisha. Shitashca pambataca sumac sisa huerta shinata, chaquishca pambataca Mandac Dios ñucapac huertata shinatami ruhuasha. Chaipica yallita cushicushpami, ñucata alli nishpa cantangacuna.

⁴ Ñuca acllashcacunalla, ñuca llactalla, ñucata uyaichicyari. Ñucami mandashcacunata huillasha. Cashcata ruhuanaca gentecunapac luz shinami canga.

⁵ Ñami cashcata ruhuagrini. Quishpichina punzhaca ñami callarishca. Ñuca poderhuanmi alli ricushpa, tucui llactacunata mandasha. Mama cucha patapi tiyac llactapi causaccunapish ñuca mandachun, ñuca rigrahuan ayudachunmi shuyacun.

⁶ Jahua pachata huichailla ricuichicyari. Cai pachatapish urai ricuichicyari. Jahua pachaca cushni shinami chingaringa. Allpaca churana maucayac shinami tucuringa. Cai pachapi causaccunaca chuspicuna shinami tucuringa. Shina cacpipish, ñucaca huiñaitami quishpichisha. Ñuca cashcata ruhuanaca manatac tucuringachu.

⁷ Cashcata ruhuanata yachaccunapish, ñuca mandashcata shungupi chariccunapish uyaichicyari. Shuccuna pingaichinata ama manchaichicchu. Paicuna mana alli nishpa rimacpipish, ama irquiyaichicchu.

⁸ Polilla churanata micuc shinami paicunata tucuchinga. Curu millmata micuc shinami, chingachinga. Ashtahuanpish ñuca cashcata ruhuanapish, quishpirinapish huiñai huiñaitami canga» ninmi.

⁹ ¡Mandac Dioslla, riccharishpa, poderta japiyari! Ñaupa huatacuna shina, utca punzhacuna shina shayariyari. ¿Manachu can Rahabtaca ñutuchircangui? ¿Manachu can chai jatun dragontaca chugrichircangui?

¹⁰ ¿Manachu can mama cuchata chaquichircangui? ¿Manachu can quishpichishcacuna pasachun, mama cuchata chaquichishpa ñanta ruhuarcangui?

¹¹ Mandac Dios quishpichishcacunaca cutinllatacmi Sión llactaman cantashpa yaicunga. Paicunaca huiñaitami cushicunga. Paicunaca yallita cushicuihuanmi canga. Nanaipish, llaquipish, huacaipish illangami.

¹² Mandac Diosca: «Ñucami cancunata cushichic cani. ¿Ima nishpatac cupa shina huañushpa chingariclla runata mañanguichic?

¹³ ¿Ñachu cancunatapish, jahua pachatapish ruhuac Mandac Diostaca cungarircangui? Cai pacha callari rumitapish ñucallatacmi churarcani. ¿Ima nishpatac cancunata llaquichiccuna yallita piñarishpa, tucuchingapac shayaricpica, punzhanta mancharicunguichic? ¿Maipitac cancunata yallita piñashpa llaquichicca?

¹⁴ Utcami prezu caccunaca llucchishca canga. Mana huañungacaman prezu causangacunachu. Paicunamanca micunapish mana illangachu.

¹⁵ Ñucami mama cucha yallita cuyuchishpa jatarichic Mandac Diosca cani. Ñuca shutica tucuita Mandac Diosmi.

¹⁶ Cancunapac shimipimi ñuca rimashcata churashpa, cancunataca maquihuan llanduc shina cuidani. Ñucami jahua pachatapish ruhuarcani. Cai pacha callari rumitapish ñucami churarcani. Shinallatac Sión llactapi causaccunataca: “Cancunaca ñuca acllashcacunami canguichic” ningui» nirca.

¹⁷ ¡Jerusalenlla, ricchariyari, ricchariyari, jatariyari! Canca Mandac Dios piñarishca junda copatami paipac maquimanta japishpa tucuringacaman ubiarcangui.

¹⁸ Cambac tucui sajuarishca churicunamantaca canta pushacca pi mana tiyanchu. Can tucui huiñachishca churicunamantaca maquimanta aisacca pi mana tiyanchu.

¹⁹ Cai ishcai llaquicunami cantaca japirca. Cambac llactaca llaquinayaita tucuchishcami carca. Yarcaipish, jatun macanacuipishmi llaquichirca. ¿Pitac cantaca llaquingayari? ¿Pitac cantaca cushichingayari?

²⁰ Cambac churicunaca linchipi churarishca taruga shinami, tucui ñancunapi huañunalla siricurca. Mandac Dios yallita piñarishpa llaquichicpimi, chashnaca tucurca.

²¹ Manapish vinota ubiashpa machashca llaquilla huarmilla, caita uyaiyari.

²² Pai acllashcacunata cuidac, Mandac Diosca: «Ñuca yallita piñarishca copataca cambac maquimanta anchuchircanimi. Machana vasotaca ñami anchuchircani. Ñuca yallita piñarishca chai copamantaca mana ashtahuan ubianguichu.

²³ Chai copata canta yallita llaquichiccunapac maquipi churashpaca: “Ñucanchic sarushpa pasangapac cumuri” niccunapac maquipimi churagrini. Shina nicpica, canca ñan allpan shina tucushpa, cambac jahuata pasachunmi saquingui» ninmi.