ISAÍAS 50 - Dios Rimashcata Quillcashcami

Mandac Diosca paipi shunguta churaccunata ayudac cashcamanta

¹ Mandac Diosca: «¿Maipitac cancunapac mama shina, Israel llactata shitashcata ricuchic quillcaca? Mana cashpaca, ¿pimantac debimanta caturcani? Riquichic, cancuna mana allita ruhuashcamantami catushca carcanguichic. Cancunallatac mana cazushcamantami cancunapac mama shina, llactaca millana tucushca.

² Ñuca shamushpaca, ¿imamantatac pitapish mana ricurcani? ¿Ñuca cayacpica, ima nishpatac pi mana cutichirca? ¿Manachu ñuca maquica cancunata quishpichipac? Cancunata quishpichingapacca, ¿manachu poderta charini? Riquichic, ñucaca rimashpallami mama cuchata chaquichini. Jatun yacucunatapish chaquishca pambatami ruhuani. Chaipi tiyac challuacunaca yacu mana tiyashcamantami huañushpa ismun.

³ Jahua pachataca tapac shinami, amsa tutata ruhuani. Sharpa churanata churachic shinami tapani» ninmi.

⁴ Mandac Diosmi ñucataca shaicushca causaccunata samachichun yachachirca. Tucui tutamantami pai yachachishcata tucui shunguhuan uyachun ricchachin.

⁵ Mandac Diosmi ñuca ringrita pascarca. Chaimantami huashaman mana cutirishpa, paita uyashpa cazurcani.

⁶ Ñucata macaccunamanmi ñuca huashata ricuchircani. Ñuca barbasmanta chutaccunamanmi ñuca ñahuita ricuchircani. Ñucata tucashpa burlacmantapish ñahuita mana pacarcanichu.

⁷ Chaica, Mandac Dios ayudacpimi, ñucaca mana pingaichishca carcani. Chaimantami ñucaca ñahuita sinchi rumita shina ruhuashpa, llaquita aparcani. Ñuca mana pingaichishcachu casha.

⁸ Ñucata cuidacca ñuca ladopimi. Chaimanta, ¿pitac ñucahuan shayaringa? ¡Tandanacuichic! ¿Pitac ñucata juchanchicca? ¡Ñucapacman cuchuyamuichiclla!

⁹ Riquichic, ñucataca Mandac Diosmi ayudanga. ¿Pitac ñucata juchanchi pudinga? Tucui paicunami churana shina, maucayashpa tucuringa. Polilla curumi micushpa tucuchinga.

¹⁰ Cancunapuramantaca, ¿pitac Mandac Diosta manchashpa, paita servic huillashcatapish uyaccuna canguichic? Luz illac cashcamanta amsa purapi puricushpaca Mandac Diospac shutipi shunguta churaichic. Paipac maquipi chariraichic.

¹¹ Tucui cancunami ninatapish, antorchatapish japichinguichic. ¡Shina cashpaca, chai nina achicllapitac, antorcha achicyachishcallapitac puricuichiclla! ¡Chaica ñucami llaquichini! Cancunaca llaquinayaita huañushpami tucuringuichic.