ISAÍAS 43 - Dios Rimashcata Quillcashcami

Mandac Diosca quishpichic cashcamanta

¹ Jacobopac huahua huahua Israel llactata callarichic Mandac Diosca: «Ama manchaichu, Ñucami quishpichircani. Cantaca shutipimi cayarcani, ñucapacmi cangui.

² Yacuta pasacucpipish canhuanmi casha. Jatun yacuta pasashpapish mana ucuyanguichu. Nina jahuata purishpapish mana rupanguichu. Cunyacuc ninapish mana rupachingachu.

³ Ñucami Mandac Dios cani. Quishpichic, israelcunapac jucha illac Diosmi cani. Cancunata quishpichingapacca Egiptopi causaccunatami curcani. Etiopía, Seba llactacunapi causaccunatami cancunapac randi curcani.

⁴ Ñuca ñahuipica yalli valishcapish, alli nishcapish, cuyashcapishmi cangui. Chaimantami quishpichingapacca runacunatapish, shuctac llactacunatapish cuni.

⁵ Ñucaca canhuanmi cani. Chaimanta ama manchaichu. Cambac huahuacunataca inti llucshina ladomantapish, inti tigrana ladomantapish tandachishpa pushamushami» ninmi.

⁶ Jahua lado llactataca: «¡Paicunata cutichichic!» nishami. Ura lado llactataca: «¡Paicunata ama jarcaichicchu! Ñuca churicunataca carumanta, ñuca ushicunataca cai pacha tucurimanta pushamuichic.

⁷ Ñuca shutipi cayashcacunataca tucuita cachaichic. Paicunataca sumaimana cachunmi ruhuarcani» ninmi.

Israelcunaca Diosmanta huillac cashcamanta

⁸ Mandac Diosca: «Ñuca acllashcacunata llucchimuichic. Paicunaca ñahuita charishpapish mana ricunchu. Ringrita charishpapish mana uyanchu.

⁹ Tucui llactapi causaccunapish, tucui cai pachapi causaccunapish tandanacuichic. Cancunapurapica, ¿caicunata huillacpish, sarun huatacuna ima tucushcata huillacpish tiyanchu? Tiyashpaca shuccuna uyashpa: «Chaica chashnatacmi» nichun huillaccunata apamuichic.

¹⁰ Cancunami ima tucushcata huillaccuna canguichic. Ñucata servic, ñuca acllashcacunami canguichic. Chaica, cancuna ñucata ricsishpa crichun, ñuca pi cashcata yachachunmi acllarcani. Ñucapac puntaca pi dios mana tiyarcachu, quipapish mana tiyangachu.

¹¹ Ñucallami Mandac Dios cani. Ñucallami quishpichicca cani.

¹² Ñucami cancunaman huillashpa quishpichircani. Cancuna uyachunmi huillachircani. Chaicunataca mana shuctac dioschu ruhuarca. Ñucallami Diosca cani. Chaitaca cancunaca allimi yachanguichic.

¹³ Ñaupa punzhacunamanta pachami ña tiyarcani. Ñuca maquimantaca quichucca pi mana tiyanchu. Ñuca imata ruhuanata munashcataca pi mana jarcai pudingachu» ninmi.

¹⁴ Cancunata quishpichic, israelcunapac jucha illac Diosca: «Cancunata quishpichingapacmi Babilonia llactapi causaccunata llaquichichun cachani. Paicunataca miticuc runacunata shinami callpachisha. Barcocunapi jatun tucushpa puric caldeocunataca chai barcocunallapitacmi cutichishpa cachasha.

¹⁵ Mandac Dios ñucami, cancunapac jucha illac Dios cani. Israel llactata callarichic, cancunata Jatun Mandacmi cani» nin.

¹⁶ Mama cucha chaupita, jatun yacu chaupita ñanta pascac,

¹⁷ caballocunata, carretacunata, sinchi soldadocunata llucchishpa cachac, jaicapi mana jataripacta urmachic, lamparata huañuchic shina, chingachic Mandac Diosca:

¹⁸ «Ñaupa punzhacuna ima tucushcatapish, ñaupa huatacuna ima tucushcatapish ama yuyarichicchu.

¹⁹ Ñucaca cancuna mana ricushca mushuctami ruhuacuni Chaitaca ñallami ricuchisha. Chaitaca, ¿manachu ricunguichic? Cutinmi shitashca pambata ñanta pascashpa, chaquishca pambacunapica jatun yacucunata llucchisha.

²⁰ Ñuca acllashcacuna ubiachun shitashca pambapi yacuta llucchicpi, chaquishca pambapi yacuta cucpimi, sacha animalcunapish, chacal animalcunapish, huahua avestruzcunapish ñucata alli ningacuna.

²¹ Cai acllashcacunataca ñucapac cachunmi ruhuarcani. Tucui paicunami ñucataca alli nishpa cantanga.

²² Jacobopac huahuacunalla, chashna cacpipish, ñucata mana mañashpami causarcanguichic. Israelcunalla, ñucapaclla causanataca amirircanguichicmi.

²³ Ñucaman cushpa, rupachingapac animalta mana apamurcanguichicchu. Ñucata alli ningapac mana animalcunata curcanguichicchu. Ñucaca ofrendatapish mana mañashcanichu. Inciensota mañashpapish mana piñachircanichu.

²⁴ Mishquillata ashnacuctapish ñucaman mana randircanguichu. Huiratapish mana ñucaman cushpa rupachircanguichicchu. Chaipac randica cancunapac juchacunatami ñucaman apachic shina cushpa llaquichircanguichic. Millaita ruhuashpa causashpami, ñucata shaicuchircangui.

²⁵ Chaica, ñucami, ñucallatac munashcamanta cancuna mana cazushpa, juchacunata ruhuashcata pichashpa, mana cutin yuyarisha.

²⁶ Ñucata yuyachichishpa, Taripachun imata cashpapish ricuchichiclla. Cashcata ruhuashca ricuringapac cancunarac rimaichiclla.

²⁷ Cancunapac punta taitapish juchata ruhuarcami. Cancunata yachachiccunapish, mana cazushpami ñucata piñachirca.

²⁸ Chaimantami ñucapaclla huasipi mandaccunataca cumurichircani. Jacobopac huahua huahuatapish llaquipi churashpa, israelcunataca yangallata ruhuarcani.