ISAÍAS 42 - Dios Rimashcata Quillcashcami

Mandac Diosta servicmanta

¹ Mandac Diosca: «Ñuca acllashca, ñucata servic runataca ñucami cuidasha. Paimi ñucataca cushichin. Paipimi ñuca Espiritutaca churarcani. Paimi jatun llactacunapica cashcata ruhuanamanta huillanga.

² Paica mana caparingachu, mana sinchita rimangachu. Ñancunapipish pai rimashcaca mana uyaringachu.

³ Chictarishca carrizotapish mana paquingachu. Huañugricuc lamparatapish mana huañuchingachu. Imatapish cashcatami ruhuanga.

⁴ Paica cashcata ruhuaccuna cai pachapi tiyangacaman manatac shaicungachu, mana samaringachu. Mama cucha patapi causaccunapish paipac mandashcatami shuyanga» nirca.

⁵ Jahua pachatapish, cai pachatapish, chaipi tiyaccunatapish ruhuac, cai pachapi causaccunamanpish causaita cuc, cai allpapi puriccunaman samaita cuc Mandac Diosca:

⁶ «Mandac Dios ñucami cantaca cashcata ruhuachun cayashpa, maquimanta aisashpa cuidasha. Cantaca ñuca acllashcacunahuan ari nishcata ruhuachun, shuc llactapi causaccunapac luz shina cachun,

⁷ ñahui mana ricuccunapac ñahuita pascachun, prezumanta cacharichichun, amsapi caccacunata llucchichunmi churasha.

⁸ Ñucallami Mandac Dios cani. Shuctac dioscunata sumacyachichunca mana saquishachu. Ruhuashcalla dioscunata alabachunpish mana saquishachu.

⁹ Ñuca utcaman huillashcaca ñami pactashca. Cunanca manarac pasashca, manarac tucushcatami huillacuni» nirca.

Mandac Diosta cantashcamanta

¹⁰ Mandac Diostaca mushuc cantohuan cantaichicyari. Tucui llactacunapi causaccuna alabaichicyari. Mama cuchata puriccunapish, chai yacupi tiyaccunapish, mama cucha patapi tiyac llactacunapish, chaipi tiyaccunapish alabaichicyari.

¹¹ Shitashca pambapish, chaipi tiyac llactacunapish, chai muyundipi causac Cedar aillucunapish alabaichicyari. Sela llactapi causaccunapish, yallita cushicushpa urcucunaman llucshishpa cantaichicyari.

¹² Mandac Diosta sumaimanami cangui nichicyari. Mama cucha patacunapi huillashpa paita cushichichicyari.

¹³ Mandac Diosca sinchita macanacuc jatun soldado shinami, tucuchina yuyaihuan shayaringa. Paita piñaccunahuanca caparishpa, sinchita rimashpami manchachishpa mishanga.

¹⁴ Mandac Diosca: «Ñucaca unai huatacunatami upalla carcani. Mana ricushca shina, mana uyashca shinami carcani. Cunanca, sajuaric huarmi nanaihuan caparic shina caparishpami llaquinayaita huañuchishpa tucuchisha.

¹⁵ Urcucunapi, lomacunapi tiyac tucui quihuata chaquichishpami shitashpa saquisha. Jatun yacucunatapish chaquishca pamba shinatami saquisha. Cuchacunatapish chaquichishami.

¹⁶ Ñahui mana ricuccunataca paicuna mana ricsishca ñantami pushasha. Paicuna mana ricsishca chaqui ñantami allita pushasha. Paicunapac ñaupapica pura tutataca achictami ruhuasha. Mana puripac ñancunata sumac pamballata ruhuashpami, paicunataca mana saquisha.

¹⁷ Ruhuashcalla dioscunata yuyarishpa causaccunaca yallita pingai tucushpami, huashaiman cutinga. Paicunaca yacuyachishpa, imamanpish ricchata ruhuashcataca: «Ñucanchic dioscunami canguichic» nincunami.

Dios llaquichicpipish, israelcuna mana cazushcamanta

¹⁸ ¡Ringri mana uyaccuna, alli uyaichicyari! ¡Ñahui mana ricuccunapish ñahuita pascashpa ricuichicyari!

¹⁹ ¿Pi serviccunata yalli ñahui mana ricucca? ¿Pitac ñuca cachashcacunata atishpa ringri mana uyaccunaca? ¿Pitac ñuca acllashcacuna shina, Mandac Dios ñucata serviccuna shina mana ricuccunaca?

²⁰ Paicuna imata ricushpapish mana yuyarinchu. Ringrita charishpapish mana uyancunachu.

²¹ Shina cacpipish, Mandac Dios ñucami cashcata ruhuac cashpa, mandashcacunataca sumac cashcata, jatun cashcata ricuchichun curcani.

²² Ashtahuanpish cai gentecunaca imatapish quichushca, sarushcami causan. Tucui paicunami jutcucunapi japi tucushpa, prezushca pacalla tiyacun. Paicunata imapish quichushca causachunmi churashca. Paicunata quishpichicca pi mana tiyanchu. Paicunamanta quichushcataca Pi: “¡Cutichichic!” mana ninchu» ninmi.

²³ Cancunapuramantaca, ¿pitac caitaca uyangayari? Shamuc punzhacuna ima tucunata huillacpipish, ¿pitac yuyaita japingayari?

²⁴ Jacobopac huahuacunataca, ¿pitac prezuchircayari? ¿Pitac israelcunataca shuhuaccunapac maquipi churarcayari? ¿Manachu Mandac Dios ñucanchic mana cazushcamanta llaquichicun? Pai mandashcacunata mana cazushpami, pai munashca shina mana causarca.

²⁵ Chaimantami paica israelcunahuan yallita piñarishpa, jatun macanacuita jatarichishpa llaquichirca. Muyundita ninata japichicpipish, mana entendircacunachu. Nina culun nishpa tucuchicucpipish, mana yuyarircacunachu.