ISAÍAS 40 - Dios Rimashcata Quillcashcami

Mandac Dios Sión llactata cushichishcamanta

¹ Mandac Diosca: «¡Ñuca acllashcacunata cushichichic, cushichichic!

² Jerusalenpi causaccunaman sumacta huillashpaca: “Cancunapac juchacunata perdonana huatacunaca ñami pactamushca. Cancunapac juchacunamantaca ñami chaupi yalli llaquihuan Mandac Diosca llaquichishca” nichic» ninmi.

³ Shitashca pambapi caparishpaca: «¡Mandac Diospac ñanta allichichic! ¡Shitashca pamba quingu ñancunatapish ñucanchic Diosman derechaichic!

⁴ ¡Tucui pugru pambacunataca allpata jundachishpa, urcucunatapish, lomacunatapish pamballata ruhuashpa allichichic! ¡Huishtu ñancunataca sumacta ancho ñancunata ruhuaichic!

⁵ Chaipimi Mandac Diosca paipac poderta ricuchinga. Chaitaca tucui gentecunami ricunga. Chaitaca Mandac Dios ñucami nini» nirca.

⁶ Shuc rimashca uyarishpaca: «¡Caparishpa huillaiyari!» nirca. Shina nicpimi ñucaca: «¿Imapactac caparishpa huillashayari?» nircani. Shina nicpimi: «Tucui gentecunaca quihua shinallami. Paicuna sumac cashcapish pambapi tiyac sisa shinallami.

⁷ Mandac Diospac huairata cachacpica, quihuapish chaquinllami. Sisapish anguyashpa urmanllami. Gentecunaca quihua shinami.

⁸ Quihuapish chaquinmi, sisapish anguyanmi. Ashtahuanpish Dios rimashcaca huiñai huiñaita causacungallami» nirca.

⁹ Alli huillaita huillac Sión urculla, jatun lomaman huichai riyari. Alli huillaita huillac Jerusalén llactalla, sinchita caparishpa huillaiyari. Judá llactapi tiyac llactacunapi causaccunata sinchita caparishpa: «¡Cancunapac Diosta ricuichic. Paica caipimi!» nichicyari.

¹⁰ Riquichic, Mandac Diosca jatun poderhuanmi shamun. Paipac rigrahuanmi allicunamanca allita cunga. Mana allicunataca llaquichinga.

¹¹ Shuc michic shinami, paipac ovejacunataca michinga. Huahua ovejacunataca rigra jahuapimi apanga. Cunanlla huachashca ovejacunataca alli cuidashpami huiñachinga.

Israelcunapac Dios-huanca imahuan mana chimbapuraipac cashcamanta

¹² ¿Pitac mama cucha yacutaca maqui shunguhuan, cutin jahua pachataca dedohuan medirca? ¿Pitac cai pacha ñuto allpataca paipac quimsa dedohuan tandachirca? ¿Pitac urcucunatapish, lomacunatapish balanzapi pezashpa churarca?

¹³ ¿Pitac Mandac Diospac yuyaitaca yacharca? ¿Pitac cunashpa yachachirca?

¹⁴ Allita entendingapacca, ¿pitatac cunachun mañarca? Mana cashpaca, ¿pitatac cashcata ruhuanata yachachichun nirca? Mana cashpaca, ¿pitac allita yachachishpa, alli ñanpi churarca?

¹⁵ Diosmanca gentecunaca baldepi tamya urmacuc shinami. Ñuto allpata balanzapi churashca shinami. Riquichic, islacunataca ñuto allpata shinami pezan.

¹⁶ Diosman animalta cushpa, tucui rupachingapacca tucui Líbano animalcunapish mana pactangachu.

¹⁷ Paipac ñaupapica tucui llactacunaca mana tiyashca shinami. Paihuanca imahuan mana chimbapuraichu.

¹⁸ ¿Imahuantac Diosta chimbapurai pudinguichic? Mana cashpaca, ¿ima ruhuashcahuantac chimbapurai pudinguichic?

¹⁹ Fierrota yacuyachishpa, imatapish ruhuanata yachacca, fierromantami diosta ruhuan. Cullquimanta imatapish ruhuanata yachacca, curita tacashpa jahuallata churashpami cullqui cadenata ruhuan.

²⁰ Huaccha runa ofrendata cungapacca, mana polillac caspitachu mashcan. Chai quipaca imamanpish ricchata ruhuachunmi, alli yachac runata mashcashpa, mana cuyuric diosta ruhuachin.

²¹ Cancunaca, ¿manachu yacharcanguichic? ¿Manachu uyashcanguichic? Callarimanta pacha, ¿manachu pipish huillarca? Cai pachata ruhuashca punzhamanta pacha, ¿manachu pipish yachachirca?

²² Diosca cai pacha tucui muyundipimi tiyacun. Chaipi causaccunaca langosta curucuna shinami. Paimi jahua pachataca pañota tendic shina, carpa huasita shayachic shina ruhuarca.

²³ Paica jatun poderta chariccunataca yangallata ruhuan. Cai pachata mandaccunatapish yangapimi churan.

²⁴ Cunanlla plantashca yurata shina, cunanlla tarpushca yurata shina, cunanlla huiñashpa, sapita mana charic yurata huaira huactashpa chaquichic shinami, utca chaquichin. Chaquicpica, acapana huaira shamushpami ucshata shina apan.

²⁵ Jucha illac Diosca: «¿Imatatac ñucaman ricchata ruhuai pudinguichic? Mana cashpaca, ¿imahuantac ñucataca chimbapurai pudinguichic?» ninmi.

²⁶ Cai tucuita ruhuashcata cancunapac ñahuita alzashpa ricuichic. Paimi tucui ima tiyashcatapish yupashpa yachan. Paimi tucuita shutipi cayan. Pai cayacpica, shucllapish mana illangachu. Paica, chashna tucuita ruhuai pudic cashpami, tucuita mandan.

²⁷ Jacobopac huahua huahuacunalla, ¿ima nishpatac caparicunguichic? Israelcunalla, ¿ima nishpatac cancunaca: «Mandac Diosca ñucanchic imata ruhuashcatapish, mana yachanchu. Shinallatac ñami ñucanchicta tariparca» ninguichic?

²⁸ Huiñaita causac Diosca Mandac Diosmi. Chaitaca, ¿manachu yacharcanguichic? ¿Manachu uyashcanguichic? Paimi tucui cai pachataca ruhuarca. Paica mana shaicunchu, mana fuerza illac saquirinchu. Paipac yuyaitaca pi mana yachai pudinchu.

²⁹ Shaicushcacunamanpish paimi fuerzata cun. Fuerza illaccunataca sinchiyachinmi.

³⁰ Huambracunapish shaicunmi, mosocunapish shaicushpa urmanllami.

³¹ Ashtahuanpish Mandac Diosta shuyashpa causaccunaca mushuc fuerzatami japinga. Volac animalcuna shinami, mana shaicunga. Yallita purishpapish, yallita callpashpapish mana fuerza illac saquiringachu.