ISAÍAS 4 - Dios Rimashcata Quillcashcami

¹ Chai punzhacunapi shuclla carita canchis huarmicuna quichunacushpaca: «Ñucanchicllatacmi micunatapish, churanatapish mashcashun. Ama pingaichishca cangapac ñucanchic-huan cazarashpa, cambac shutita cui» ningacunami.

Quipa punzha alli causai tiyanamanta

² Chai huatacunapica Mandac Diospac retoñoca sumaimanami huiñanga. Chai llactapi pucushca granoca maijanlla saquirishca israelcunamanca sumac nishcapish, alli nishcapishmi canga.

³ Shinallatac Sionpi, Jerusalenpi saquirishcacunaca Diospaclla chicanyachishca nishcami canga. Jerusalenpi saquirishcacunapac shutita quillcashcami canga.

⁴ Mandac Dios llaquichishpa, tucuchic Espirituhuan Sión llactapi causac huarmicunapac tucui mapacunata, Jerusalenpi causaccuna huañuchishca yahuarta maillacpimi, chashnaca canga.

⁵ Chai quipami Mandac Diosca punzhaca yana puyuta, tutaca rupacuc achicyachic ninata Sión urcupi tiyac tucui huasicunapac jahuapi churanga. Diosca paicunataca sumaimana achic nicuc-huan shinami tapanga.

⁶ Paimi punzha inti rupachinamantaca llandunga. Jatun tamya huairamantapish ucllac shinami pacanga.