ISAÍAS 39 - Dios Rimashcata Quillcashcami

Babilonia llactamanta cachashcata Ezequías chasquishcamanta

¹ Chai punzhacunapimi Babilonia llactata jatun mandac Baladanpac churi Merodac-baladanca Ezequías ungushpa, alliyashcata yachai chayarca. Chaimantami quillcanatapish, shuctac caranacunatapish cuchun cacharca.

² Chashna cachacpimi, Ezequiasca cushilla paicunata chasquirca. Chaimantami paipac yalli valishcacunata huacaichina huasita ricuchirca. Chaipica cullquipish, curipish, mishquilla ashnacuc jambicunapish, yallita valishca aceitepishmi carca. Shinallatac macanacunata huacaichishca huasitapish, ima shuc sumaccunata huacaichina ucutapishmi ricuchirca. Ezequiasca imata mana pacashpami paipac huasipi, pai mandacuc llactacunapi tucui ima tiyashcacunata ricuchirca.

³ Chai quipami Dios ima nishcata huillac Isaías jatun mandac Ezequiasta ricungapac rishpaca: —Chai runacunaca, ¿maimantatac shamurca? ¿imatatac nirca?— nirca. Shina nicpimi Ezequiasca: —Paicunaca caru llacta Babiloniamantami shamushca— nirca.

⁴ Shina nicpimi Isaiasca: —Cambac huasipica, ¿imatatac ricurca?— nirca. Shina nicpimi Ezequiasca: —Ñuca huasipica tucui ima tiyashcatami ricurca. Valishcacunata huacaichishca huasipica imata mana pacashpami tucuita ricuchircani— nirca.

⁵ Shina nicpimi, Isaiasca Ezequiastaca: —Tucuita Mandac Dios rimashcata uyai. Paica:

⁶ “Riqui, cambac huasipi tucui ima tiyashcacunatapish, cambac ñaupa taitacuna cancunaman tucui ima huacaichishcacunatapish Babilonia llactaman apana punzhacunami chayamucun. Imata mana saquishpami apanga.

⁷ Cambac maijan churicunataca Babilonia llactata jatun mandac mandana huasipimi eunuco tucushpa causachunmi apanga” ninmi— nirca.

⁸ Shina nicpimi, Ezequiasca Isaiastaca: —Can ñucaman huillashca Mandac Dios rimashcacunaca tucuimi alli— nirca. Paica: “Ñuca causacui punzhacunaca ima llaquipish mana japishca, cushillami causasha” yuyarcami.