ISAÍAS 38 - Dios Rimashcata Quillcashcami

Ezequiasta Dios alliyachishcamanta

¹ Chai punzhacunapi Ezequías yallita ungushca cacpimi, Dios ima nishcata huillac Amozpac churi Dios ima nishcata huillac Isaías ricungapac rirca. Chashna rishpaca: «Mandac Diosca: “Canca mana causanguichu, huañugringuimi. Chaimanta cambac huasi ucupurata imata nina cashpaca utca nilla” ninmi» nirca.

² Shina nicpimi, Ezequiasca pirca ladoman tigrarishpa, Mandac Diosta mañashpaca:

³ «Mandac Dioslla, cambac ñaupapi mana llullashpa, tucui shunguhuan canta cazushpa causashcatapish, cambac ñaupapi allita ruhuashpa causashcatapish yuyariyari» nishpami, yallita llaquirishpa huacarca.

⁴ Mandac Diosca Isaiastaca:

⁵ «Ezequiaspacman rishpa: “Ñaupa taita Davidta Mandac Diosca: Can mañashcata uyarcanimi. Cambac huiquitapish ricurcanimi. Riqui, can causana punzhacunataca chunga pichca huatatami mirachini.

⁶ Cantapish, cai llactapi causaccunatapish Asiria llactata jatun mandacpac maquimanta quishpichishpa ayudashami.

⁷ Mandac Dios ñucaca imata ruhuasha nishcata pactachingapacmi cai señalta ricuchini.

⁸ Riqui, Acazpac reloj shina gradacunata chunga gradacunata pasashca cacpipish, ñucaca cutinmi huashaiman cutichisha” ninmi ningui» nirca. Chai quipaca intica chunga gradacunata pasashca cashpapish cutin huashaiman cutircami.

⁹ Judá llactata jatun mandac Ezequías ungüimanta alliyashpa cantashpaca:

¹⁰ «Ñucaca: “Ñuca causana chaupi punzhacunapimi Seolman rigrini. Shuctac chaupi punzhacunataca quichushcami” yuyarcanimi.

¹¹ Ñucaca: “Runacuna causana cai pachapica Mandac Diostaca mana ashtahuan ricushachu. Cai pachapica shuc runallatapish mana ashtahuan ricushachu.

¹² Ñuca causana huasipish ovejata michina carpata shinami, shuc ladoman anchuchirca. Ahuac runa ahuashcata pitic shinami, cai ungüihuan ñuca causaica pitirin. Punzha cashpa, tuta cashpapish tucurigrinimi” yuyarcami.

¹³ Punzhayangacamanmi huacacurcanilla. Shuc león micushpa, tucui tullucunata polvoc shinami nanachicungui. Punzhapish, tutapish nanaihuanmi tucuchicungui.

¹⁴ Golondrina shina, grulla animalcuna huacac shinami huacacuni. Paloma shinami llaquirishpa huacacuni. Ñuca ñahuihuanca huichai ricucunillami. Mandac Dioslla, yalli llaquihuanmi cani. Chaimanta ayudaiyari.

¹⁵ Paillatac chashna llaquichisha nishpa llaquichicpica, ¿imatatac nishayari? Chashnami ñuca shungupi yallita llaquirishpa causacushalla.

¹⁶ Mandac Dioslla, chai rimashcacunahuanmi runacunaca causan. Ñuca espiritupish chaipimi causaita charin. ¡Mandac Dioslla, sinchiyachishpa, causaita cuiyari!

¹⁷ Riqui, ñucapac allipacllatami chai llaquica japirca. Shina cacpipish, cuyashpami jutcupi ñuca ismugrinamanta quishpichircangui. Ñuca juchacunata huashaiman shitac shina, perdonashpami quishpichircangui.

¹⁸ Seolpi caccunaca cantaca mana pagui nincunachu. Huañushcacunaca cantaca mana alabancunachu. Enterrana jutcuman riccunapish can pactachinataca mana shuyanchu.

¹⁹ ¡Maijanpish causacushparacmi cunan ñuca canta pagui nic shina, pagui ninga! Shuc taitaca causacushparacmi can pactachinataca paipac huahuacunaman huillanga.

²⁰ Mandac Diosmi quishpichinga. Chaimantami punzhanta tucui causaipi Mandac Diospac huasipi arpapi tocashpa, paita cantacunchiclla» nishpami quillcarca.

²¹ Isaiasca Ezequías huañunalla cacpimi: —Higota tacashpa nanacuc pushtupi churai. Chashna churacpica alliyangami— nishca carca.

²² Shina nicpimi, Ezequiasca Isaiastaca: —¿Imata ricushpatac Mandac Diospac huasiman rishayari?— nirca.