ISAÍAS 37 - Dios Rimashcata Quillcashcami

Senaqueribpac maquimanta Judá llactata Dios quishpichishcamanta

¹ Chashna nicpimi, jatun mandac Ezequiasca paipac churanata lliquirishpa, sharpa churanata churarishpa, Mandac Diospac huasiman shamurca.

² Chai quipami mayordomo Eliaquimtapish, quillcac Sebnatapish, curacunata pushac yuyaccunatapish sharpa churanata churachishpa Dios ima nishcata huillac Isaiaspacman cacharca. Isaiasca Amozpac churimi carca.

³ Paicunaca: —Ezequiasca: “Cunan punzhaca yalli llaquichishca, pingaichishca, mai llaquillami canchic. Chaica, sajuarina punzha pactacpi, chai sajuaric huarmi mana fuerzata charic shinami canchic.

⁴ Asiria llactata jatun mandac quipa mandacta Mandac Diosta camishpa rimarishcata uyashpa, llaquichishca cashpachari alli canman. Chaimanta cunanca, caipi maijan saquirishcacunamanta Mandac Diosta mañaiyari” ninmi— nirca.

⁵ Chaita huillangapacmi Ezequiasta serviccunaca Isaiaspacman rirca.

⁶ Isaiasca paicunataca: —Cancunapac amotaca: “Mandac Diosca: Asiria llactata jatun mandac paita serviccuna camishpa ñucata yallita rimashcamantaca ama manchaichu.

⁷ Riquichic, ñucami paipac shungupica manchai espirituta churasha. Chaimantami ima uyaricpica, manchashpa, paipac llactaman cutinga. Paitaca paipac llactapi huañuchichunmi saquisha” ninmi ninguichic— nirca.

⁸ Quipa mandacca Asiria llactata jatun mandac Laquis llactaman ña rishcata yachashpa cutimushpaca, Libna llactapi causaccunahuan jatun mandac macanacuctami ricurca.

⁹ Chai quipami jatun mandacca: «Etiopía llactata jatun mandac Tirhacami paihuan macanacungapac shamun» ninacucta uyarca. Chaita uyashpami, paipac huillaccunata Ezequiaspacman cachashpaca:

¹⁰ «Judá llactata jatun mandac Ezequiastaca: “Can shunguta churashca cambac Dios pandachichunca, ama saquinguichu. Paica Jerusalentaca Asiria llactata jatun mandacpac maquipica mana churashachu.

¹¹ Asiria llactata jatun mandaccuna tucui llactacunata tucuchishcataca canllatac uyarcanguimi. ¿Chashna cashca jahuachu, canca quishpirigringui?

¹² Ñucanchic ñaupa taitacuna Gozán, Harán, Resef llactacunapi causaccunatapish, Edén llactapi tiyac Telasar llactapi causaccunatapish tucuchicucpica, ¿maijan dioscuna quishpichi pudircachu?

¹³ ¿Maipitac Hamat, Arfad, Sefarvaim, Hena, Iva llactacunata jatun mandaccunaca?” ninguichic» nirca.

¹⁴ Ezequías jatun mandac cachashca quillcata paicunapac maquimanta japishpa rezashpaca, Mandac Diospac huasimanmi huichai rirca. Chaipimi chai quillcataca Mandac Diospac ñaupapi pascarca.

¹⁵ Chaita Ezequías ricuchishpa, Mandac Diosta mañashpaca:

¹⁶ «Israelcunapac tucuita Mandac Dioslla, canca querubincunapac chaupipimi causangui. Canllami tucui cai pachata mandaccunapac Mandac Dios cangui. Jahua pachatapish, cai pachatapish canmi ruhuarcangui.

¹⁷ Mandac Dioslla, cambac ringrihuan uyaiyari. Mandac Dioslla, cambac ñahuita pascashpa ricuiyari. Senaquerib causac Diosta camishpa rimachun cachashcata uyaiyari.

¹⁸ Mandac Dioslla, Asiria llactata jatun mandacca shuctac llactacunatapish, allpacunatapish tucuchircami.

¹⁹ Chaipi tiyac dioscunatapish rupachircami. Chaicunaca mana dioscunachu carca. Ashtahuanpish runacuna caspimanta, rumimanta ruhuashcallami carca. Chaimantami chashna tucuchirca.

²⁰ Mandac Dioslla, cunanca tucui cai pacha jatun mandaccuna canlla Mandac Dios cashcata yachachun, ñucanchicta paicunapac maquimanta quishpichiyari» nirca.

²¹ Shina nicpimi, Amozpac churi Isaiasca Ezequiastaca: «Israelcunata Mandac Diosca Asiria llactata mandac Senaquerib mañashcataca uyashcami.

²² Chaimantami Mandac Diosca chai jatun mandactaca: “Carihuan manarac chayarishca soltera shina Sión llactalla burlashpa asishcami cangui. Jerusalenpi causaccunaca can cutishpa callpacpica, umata cuyuchishpami asinga.

²³ ¿Pitatac camishpa rimarcangui? ¿Pitatac jatun tucushpa, llaquichishpa, ñahuita alzashpa rimarcangui? ¡Israelcunapac jucha illac Diostami chashna rimarcangui!

²⁴ Canta serviccunatami Diosta camichishcangui. Chashna cachashpaca: ‘Ñucapac carretacunahuanmi urcu lomacunaman, Líbano urcu jahuaman rircani. Chaipimi cedro yuracunata, ashtahuan alli ciprés yuracunata tigrachircani. Ashtahuan jahua urcu lomaman, sumac quihua pambamanmi rircani.

²⁵ Ñucaca shuctac llactacunapimi junduta allashpa, yacuta ubiarcani. Egiptopi tiyac jatun yacucunataca ñuca chaquihuan sarushpami chaquichircani’ nishcanguimi.

²⁶ Chaicunataca utca huatacunallatac ruhuasha nishcata, utca punzhacunallatac yuyaricushcata, ¿manachu yacharcangui? Chaicuna cunan pactachunmi munani. Canmi muyundita jarcashca llactacunataca urmachishpa, rumi montonllata saquingui.

²⁷ Chai llactapi causaccunaca cumurichishca cashpami, imatapish mana ruhuai pudincuna. Paicunaca pambacunapi micunalla llullu quihua shina, huasi jahuapi manarac alli huiñashpa, chaquic quihua shinami.

²⁸ Can ima shina cactaca tucuitami yachani. Can maiman llucshictapish, cutictapish, can ñucata yallita piñarishcatapish yachanimi.

²⁹ Canca ñucata yallita piñarishpami, jatun tucushpa ñuca ringriman uyaricta rimarcangui. Cambac singapica argollata, shimipica frenota churachishpami, can maita shamushca ñanllatatac cutichishpa cachasha” ninmi.

³⁰ Jatun mandac Ezequiaslla, caimi canmanca shuc señal canga: Cai huatapish, shamuc huatapish paillatac huiñashpa, pucushca granotami micunguichic. Ña quimsa huata tucucpica, tarpushpa cosechaichic. Uvastapish tarpushpa, pucuchishpa micunguichic.

³¹ Judá llactapi puchushca gentecunamanta maijan saquirishcacunaca allpa ucupi sapi saquirishpa, huiñashpa cutin pucuc shinami miranga.

³² Maijan saquirishcacunaca Jerusalenmanta, Sión urcumantami llucshinga. ¡Tucuita Mandac Dios yallita cuyashcamantami chaitaca pactachinga!

³³ Mandac Dios Asiria llactata jatun mandacta rimashpaca: “Mana cai llactaman yaicungachu. Cai llactapica shuc flechallatapish mana shitangachu. Mana cai llacta ñaupapi Escudota shayachingachu. Baluartetapish mana ruhuangachu.

³⁴ Cai llactaman mana yaicungachu. Maita shamushca ñanllatatacmi cutinga. Chaitaca Mandac Dios ñucami nini.

³⁵ Ñucallatac cuyarishcamanta, ñucata servic Davidta cuyashcamantami cai llactapi causaccunata ayudashpa quishpichisha” ninimi» nirca.

³⁶ Chai tutallatacmi Mandac Diospac angelca asiriocunapac carpacunaman rishpa, patsac pusac chunga pichca huaranga soldadota huañuchirca. Cayandi tutamanta jatarishpaca, tucui huañushpa siricuctami ricurca.

³⁷ Chaimantami Asiria llactata jatun mandac Senaqueribca Nínive llactaman rishpa, chaipi causarca.

³⁸ Shina cacpipish, Senaquerib paipac dios Nisrocpac huasipi paita adoracucpimi, paipac churicuna Adramelec, Sarezer espadahuan huañuchirca. Shina huañuchishpaca Ararat llactamanmi miticushpa rirca. Paipac randica paipac churi Esarhadonmi mandai callarirca.