ISAÍAS 35 - Dios Rimashcata Quillcashcami

Israelcuna Sionman cutimunamanta

¹ Chaquishca pambaca cushicungami. Yuracunapish cushicushpami, sumac rosas sisa shina sisanga.

² Chashna sisashpami cushicushpa cantanga. Líbano urcuta shina, Carmelo urcuta shina, Sarón pambata shinami Mandac Diosca sumacta ruhuanga. Paicunaca Mandac Dios sumaimana cashcatapish, paipac achic nicuctami ricunga.

³ Irquiyashca maquicunatapish, mucucunatapish sinchiyachichic.

⁴ Manchaihuan causaccunataca: «¡Sinchiyaichic, ama manchaichicchu! Mandac Diosmi cancunata piñaccunata llaquichingapac shamunga. Paillatacmi quishpichingapac shamunga» ninguichic.

⁵ Pai shamucpica, mana ricuccunapac ñahuipish, mana uyaccunapac ringripish pascaringami.

⁶ Suchupish taruga shinami saltanga. Mana rimai pudicpish sumactami cantanga. Shitashca pambapi allacpipish yacuca llucchingami. Chaquishca pambacunatami yacuca callpacunga.

⁷ Chaquishca rupacuc tiyupish yacu cuchami tucunga. Chaquishca allpacunataca yacumi callpacunga. Chacal animalcuna causanapica carrizocuna, totoracunami huiñanga.

⁸ Chaipica chaqui ñanmi tiyanga. Chai ñantaca jucha illac ñan ningacunami. Chai ñantaca juchayuc runapish, yuyai illacpish mana puringachu. Chai ñantaca Mandac Dios munashca shina causaccunallami puringa.

⁹ Chaipica leoncunapish mana tiyangachu. Chaitaca shuctac millai animalcunapish, mana huichai shamungachu. Chaipica ima animalcunapish mana tupangachu. Chaitaca quishpirishcacunallami puringa.

¹⁰ Mandac Dios quishpichishcacunaca cushicushpami, Sión llactaman cantashpa yaicunga. Paicunaca huiñai huiñaitami cushicunga. Paicuna yallita cushicuihuan cacpica, ima llaquipish mana japingachu.