ISAÍAS 34 - Dios Rimashcata Quillcashcami

Edom llacta llaqui tucunamanta

¹ ¡Tucui llactacunapi causaccuna ñucata uyangapac tandanacuichicyari! ¡Tucui gentecuna alli uyaichicyari! Cai allpapish, chaipi ima tiyaccunapish, cai pachapish, chaipi ima tiyaccunapish uyaichicyari.

² Mandac Diosca tucui llactapi causaccunahuan, chai llacta soldadocunahuanmi yallita piñarishca. Paicunataca huañuchiccunapac maquipi churashpami tucuchinga.

³ Chai huañushca cuerpocunataca shitashpami saquinga. Chai cuerpocunaca yallitami ashnanga. Paicunapac yahuarhuanmi urcucunaca yacuyanga.

⁴ Jahua pachapi tucui tiyaccunami yacuyashpa tucuringa. Jahua pachaca papel shinami pilluringa. Lucerocunaca yuramanta uvas shina, higo yuramanta panga urmac shinami urmanga.

⁵ Mandac Diospac espadami jahua pachapi ricuringa. Edom llactapi causaccunata llaquichishpa tucuchingapacmi urai shamunga.

⁶ Mandac Diosca Bosra llactapica animalcunata rupachingapac huañuchic shinami huañuchinga. Edom llactapipish achcatami huañuchinga. Espadaca maltón ovejacunapac, cari chivocunapac yahuarhuan, Maltón ovejacunapac riñón huirahuanmi yallita cahuiringa.

⁷ Paicunahuanmi sacha huagracunatapish, becicunatapish huañuchinga. Chaimantami paicunapac llactaca yahuarhuan, allpapish huirahuan chapurishca canga.

⁸ Mandac Dios llaquichina punzhami chayamushca. Sionpi causaccunata llaquichishcamantami Edom llactapi causaccunata llaquichinga.

⁹ Edom llacta yacucunaca breami tucunga. Ñuto allpaca azufremi tucunga. Allpaca rupac brea shinami rupacyanga.

¹⁰ Chashnami punzhapish, tutapish mana chiriyashpa cushnicungalla. Huiñaitami shitashca pamba saquiringa. Chaitaca pi mana puringachu.

¹¹ Ashtahuanpish pucucuna, erizo animalcuna, chushiccuna, cuervocunami causanga. Cordelta, nivelta churashpami chai llactataca pichashpa, chushacllata saquinga.

¹² Chai llactataca: «Jatun mandacta mana charic» nishpami cayanga. Mandaccunapish yangallami tucunga.

¹³ Paicuna mandana huasipica casha, torrecunapica chinicuna, cardosmi huiñanga. Ucucunapica chacal animal causana, pungu pambapica avestruzcuna tiyarinami tucunga.

¹⁴ Shitashca pambapi causac animalcunami hiena animalcunahuan chapurishpa puringa. Sacha chivocunaca chapurishpa, puringapacmi mashcashpa puringa. Chaipica chushiccunami causanga.

¹⁵ Pucupish cuzhata ruhuashpami, huahuacunata llucchinga. Chai huahuacunataca alas ucupimi charinga. Chaillapitacmi condorcunaca huarmi condorcunahuan tandaringa.

¹⁶ Mandac Dios rimashpami, paipac Espirituhuan tandachirca. Chaimanta Mandac Diospac librota mashcashpa rezaichic. Cai animalcunamantaca imapish mana illanchu. Tucui animalcunami cari, huarmi canga.

¹⁷ Paillatacmi suerteta ruhuashpa, maipi churana cacpipish, cordelhuan medishpa allpata curca. Chaipica huahua huahuacamanmi huiñaita causanga.