ISAÍAS 33 - Dios Rimashcata Quillcashcami

Mandac Dioslla quishpichic cashcamanta

¹ ¡Aij, imatapish quichuc runalla! Canmantaca pi mana quichushcachu. Shuccunata pandachishpa llaquichicpipish, cantaca manarac chashnallatac llaquichishcachu. Imata quichushpa tucuchishca quipaca cantapish chashnallatacmi ruhuanga. Shuccunata mana cazushpa, can llaquichishpa tucuchishca quipaca cantapish chashnallatacmi ruhuanga.

² Mandac Dioslla, ñucanchicta llaquiyari. Canllatami shuyacunchic. Tutamanta cambac rigrahuan ayudaiyari. Ñucanchic jatun llaquipi cacpipish quishpichiyari.

³ Can rimashca culun nishpa uyaricpica, gentecunaca miticuncunami. Can jataricpica, llactacunapi causaccunaca caita chaitami callpan.

⁴ Oruga curucuna micuc shinami, paicuna imalla charishcacunataca tandanga. Langosta curucuna shinami, chai charishcacunata quichunga.

⁵ ¡Jahua pachapi causac Mandac Diosca jatunyachishca cachun! Paimi Sión llactapica allita mandanatapish, cashcata mandanatapish churarca.

⁶ Paica allitami mandanga. Cushi causaimi tiyanga. Shinallatac alli yuyaipish, quishpirinapish yallimi tiyanga. Mandac Diosta manchanami yalli valishcacunatapish yalli valin.

⁷ Jatun mandacpac huillaccunaca canzhapimi caparin. Cushi causaimanta huillaccunaca yallitami huacan.

⁸ Ñancunapish shitashcami. Pipish ña mana purincunachu. Huillaccunataca mana cazushpami, ari nishcatapish mana pactachin. Pitapish mana manchancunachu.

⁹ Allpapish yallita llaquillami. Líbano urcu yuracunapish pingaihuanmi. Sarón pambapish shitashca pambami tucushca. Basán urcupish, Carmelo urcupish chaquishcami saquirishca.

¹⁰ Mandac Diosca: «Cunanmi jatarigrini. Cunanmi tucuipac alli nishcapish, jatunyachishcapish casha.

¹¹ Cancuna yurarishcaca sacha panga shinallami. Chaimantami tamota sajuaringuichic. Chaitaca cancunapac samaillatacmi nina shina tucuchinga.

¹² Gentecunaca rupashca uchupa shinami canga. Pitishca cashacuna shinami, rupashpa chingaringa.

¹³ Caru llactapi causaccunalla, ñuca ruhuashcata ricuichicyari. Cuchulla llactapi causaccunalla, ñuca poderta ricsichicyari» ninmi.

¹⁴ Sión llactapimi juchasapacunaca chucchuncuna. Chashna chucchushpaca: «Ñucanchicpuramantaca, ¿pitac tucuchic ninapi causai pudingayari? Ñucanchicpuramantaca, ¿pitac huiñai huiñaita rupacuc ninapica causai pudingayari?» ninacun.

¹⁵ Maijanpish cashcata ruhuac, mana llullac, pimanta quichushpa mana chayucyac, allita ruhuangapac imata mana pacalla japic, huañuchina yuyaita mana uyasha nic, ima mana allita mana ricusha nicmi

¹⁶ mana manchashpa causanga. Paita jarcac rumica jatun torrecunami canga. Paimanca micunapish, yacupish mana illangachu.

¹⁷ Cambac ñahuihuanmi Jatun Mandactaca sumaimana tiyacucta ricungui. Llactatapish mai carucaman cashcatami ricungui.

¹⁸ Llaquita yuyarishpami cambac shungupica: «¿Maipitac impuestota japishcata yupacca? ¿Maipitac impuestota pezashpa japicca? ¿Maipitac torrecunata yupacca?» ningui.

¹⁹ Ashtahuanpish canca chai cari tucushca, mana entendipacta rimac, mana allita rimac gentecunataca mana ashtahuan ricunguichu.

²⁰ Jatun fiestacunata ruhuac ñucanchic Sión llactata ricuichic. Jerusalenpica mana manchashpa causacuctapish, mana pascaipac carpa huasicunatapish ricunguimi. Carpacunata charicuc ishtacacunatapish pi mana llucchingachu. Carpacuna huatashca huascacunataca shucllatapish mana pitingachu.

²¹ Chaipimi Mandac Diosca ñucanchicta sinchiyachinga. Chaipica tendirishpa, callpacuc yacu shinami canga. Chaitaca uchilla barcocunapish, jatun barcocunapish mana puringachu.

²² Mandac Diosmi ñucanchic juez. Mandac Diosllatacmi mandashcacunata cucca. Mandac Diosllatacmi ñucanchic Jatun Mandacca. Paillatacmi ñucanchicta quishpichin.

²³ Barcota purichic telata huatashca huascacunapish pitirircami. Chai telata jahuaman sinchita huatanataca mana pudinchu. Shina cacpimi, ima quichumushcatapish japishun. Suchu runacunacamanmi quichushpa chaupinacunga.

²⁴ Chaipi causaccunamanta maijan: «Ungushcami cani» mana ningachu. Sión llactapi causac gentecuna mana allita ruhuashcataca perdonangami.