ISAÍAS 32 - Dios Rimashcata Quillcashcami

Cashcata ruhuac jatun mandac tiyanamanta

¹ Shamuc punzhapica cashcata ruhuac jatun mandacmi mandanga. Shinallatac alli ricushpa, mandaccunapish tiyangami.

² Chai jatun mandacca sinchi huairamanta, acapana huairamanta jarcac shinami canga. Chaquishca pambapi yacu llucshicuc shina, yallita rupai llandurina rumi shinami canga.

³ Chaimantami ñahuicunapish mana ashtahuan amsayanga. Ringripish mana huichcaringa.

⁴ Shungupi mana entendiccunapish allita entendishpami allita imatapish ruhuanga. Jarca jarca rimariccunapish allitami rimanga.

⁵ Misa runataca misa runa nishpallatacmi cayanga. Llulla runatapish llulla runa nishpallatacmi cayanga.

⁶ Misa runaca misa canamantami parlan. Paipac shungupica millaita ruhuanallatami yuyaricun. Mandac Diostapish mana cazushpami burlan. Yarcaihuan caccunatapish chushac maquitami saquin. Yacunayaihuan caccunamanpish yacuta mana cunchu.

⁷ Llulla runaca ima shina pandachinallatami yuyarishpa purin. Llaquilla caccunata llullashpa pandachingapacmi pacalla yuyarishpa purin. Huacchacuna mandaccunapac ñaupapi cashcata ruhuachun mañacpipish llullashpami atin.

⁸ Ashtahuanpish alli shungu runaca allita ruhuanatami yuyarin. Shina alli ruhuashcamantami allita ruhuashpa causan.

Jerusalén huarmicunata rimashcamanta

⁹ Imatapish mana llaquic huarmicuna ñuca rimashcata jatarishpa uyaichicyari. Ima llaqui shamunata mana yuyaric huarmicuna ñuca imata yuyarishpa huillashcata uyaichicyari.

¹⁰ Ima llaqui shamunata mana yuyarishpa causac huarmicunalla, caimanta huata quipaca uvas chagra mana valicpi, ña mana pallana tiyangachu.

¹¹ Ima llaqui shamunata mana yuyarishpa causac huarmicunalla, manchaihuan chucchuichicyari. Sharpa churanata churarishpa llaquilla caichicyari.

¹² Sumacta pucuc pambacunamanta, alli uvas chagracunamanta pechopi huactarishpa huacaichicyari.

¹³ Ñuca acllashcacunapac llactapica cashacuna, cardoscunami jundanga. Cushicuna huasi jahuacunapipish, cushicuna plazacunapipish chashnami canga.

¹⁴ Mandashpa tiyana huasipish shitashcami canga. Llactapi causac achca gentecuna bullashcapish mana uyaringachu. Lomapish, chapana torrecunapish sacha burrocuna huiñaita causana, ovejacuna shayanami tucunga.

¹⁵ Jahua pachamanta Espirituta ñucanchic jahuaman cachangacaman, shitashca pambacuna alli pucuc allpa tucungacaman, shinallatac pucuc allpa, sacha allpa tucungacamanmi chashnaca canga.

¹⁶ Shina cacpimi, chai alli allpapica allita ricushpa ruhuanapish, cashcata ruhuanapish tiyanga.

¹⁷ Cashcata ruhuashcamantaca cushi causaimi tiyanga. Cashcata ruhuashpa, causashcamantami samanapish, cushi causaipish huiñaita tiyanga.

¹⁸ Ñuca acllashcacunaca cushilla llactapimi causanga. Ima llaquipish illac huasipimi cushilla samaringa.

¹⁹ Sachacunapi rundu urmashpa tucuchicpipish, chai llactapi causaccunata yallita pingaichicpipish,

²⁰ tucui yacu patapi tarpuccuna huagrata, burrota cacharishpa michiccunapish cushicuichicyari.