ISAÍAS 31 - Dios Rimashcata Quillcashcami

Egipto runacunaca runacunalla cashcamanta

¹ ¡Aij, Egiptopi causaccunata ayudai ningapac urai riccunalla! ¡Aij, caballocunapi ric soldadocunapi, achca carretacunapi, sinchi caballocunapi shunguta churashpa “paicunaca ayudangallami” nishpa yuyaccunalla! Shina yuyacushpapish, israelcunapac jucha illac Diostaca mana yuyarincunachu. Mandac Diospac ayudata mana mañancunachu.

² Ashtahuanpish Mandac Diosca alli yachacmi. Chaimanta paica llaquichingami. Pai llaquichisha nishpaca llaquichintacmi. Millaita ruhuaccunatapish, chai millaita ruhuanata ayudaccunatapish piñarishpa llaquichingami.

³ Egipto runacunaca mana dioscunachu. Paicunapac caballocunapish aichallami, mana espirituchu. Mandac Dios maquita alzacpica, ayudaccunapish, ayudachun mañaccunapish tucuimi urmashpa tucuringa.

⁴ Mandac Diosca: «Shuc león ovejata japishpa micushpaca, tucui michiccuna tandanacushpa manchachingapac shamucpipish, mana manchanchu. Chashnami tucuita Mandac Dios ñucapish, ñucapac Sión urcupi macanacungapac urai shamusha.

⁵ Tucuita Mandac Dios ñucaca alasyuc animalcuna cuzhata misashpa volanacuc shinami Jerusalenpi causaccunataca cuidasha. Chashna cuidashpami quishpichisha. Chashna misashpami cacharichisha» nirca.

⁶ ¡Israelcunalla, cancuna yallita mana cazushpa, llaquichishca Mandac Diospacman cutichicyari!

⁷ Chai punzhapica cullquimanta, curimanta ruhuashca dioscunatapish yanga shitangami. Chaicunataca cancunami juchayuc quiquin maquihuan ruhuarcanguichic.

⁸ Chai punzhapica Asiria llacta runacunaca jatun macanacuipimi huañunga. Shina cashpapish mana runacunachu paicunataca huañuchinga. Mana runacunapac espadahuanchu tucuringa. Jatun macanacuimantami miticushpa callpanga. Mosocunaca sinchita servishpami causanga.

⁹ Paicunaca manchaihuanmi irquiyashca saquiringa. Mandaccunapish yallita mancharishpami, paicunapac banderacunata shitashpa callpanga. Sión urcupica ninata japichishpami shuyacun. Jerusalenpica hornota rupacyachishpami shuyacun. Chaitaca Mandac Diosca ñucami nini.