ISAÍAS 29 - Dios Rimashcata Quillcashcami

Ariel llactata piñaccunamanta

¹ ¡Aij, Ariel llactalla! ¡David causana Ariel llactalla! Ima fiestacunata huatanta ruhuashpa cushicuichiclla.

² Ashtahuanpish Ariel llactataca llaquihuan muspachigrinimi. Chaimantami yallita llaquirishpa huacanga. Chai llactaca animalta rupachina altar shinami tucunga.

³ Ñucami cancunapac muyundipi carpacunata shayachishpa, achca soldadocunahuan muyunacushpa chapasha. Baluartecunatapishmi shayachisha.

⁴ Chashna ruhuacpica, pambapi urmashpami caparingui. Caparishcaca allpa ucumanta shinami pambamanta ashalla uyaringa. Shinallatac ñuto allpa ucumantami aya rimashca shina ashalla uyaringa.

⁵ Canta piñac achca runacunaca ñuto allpa shinami tucunga. Cutin, mana llaquic runacunaca huairapi ric tamo shinami tucunga. Chaica, cungaillami chashna tucunga.

⁶ Tucuita Mandac Diosca tulun nishpa, allpata chucchuchishpa, sinchita tulun nichishpa, yalli rundu tamya huairahuan, tucuchic ninahuan llaquichingapacmi shamunga.

⁷ Ariel llactahuan macanacuc tucui llactacunapish, muyunacushpa shamuc soldadocunapish, baluarteta ruhuashpa chapaccunapish, sueñushpa muscuipi ricuc shinami chingaringa.

⁸ Yarcanayaihuan sueñushpa, micucushcata muscushpapish riccharishpaca yarcanayaihuan cac runa shina, yacunayaihuan sueñushpa, yacuta ubiacushcata mushcushpapish riccharishpaca yacunayaihuan cunga chaquishca runa shinami tucunga. Chashnami Sión urcupi causaccunahuan macanacungapac tucui llactamanta shamuc soldadocunaca tucunga.

Israelcunaca mishqui shimi, ñahui illac shina cashcamanta

⁹ ¡Cancunaca mancharichicyari! ¡Ñahui mana ricuccuna shina tucuichicyari! ¡Machashca caichicyari, shinapish mana vinohuan! ¡Machashpa caiman chaiman tigracuichicyari, shinapish mana machana yacuhuan!

¹⁰ Mandac Diosmi cancunamanca sueñuchic espirituta cacharca. Paimanta huillaccunapac ñahuitaca huichcarcami. Ima tucunata huillaccunapac umataca pañohuanmi taparca.

¹¹ Muscuipi shina ricushcaca quillcashca librota sellashca shinami canga. Chai librota rezanata yachacta: «Caita rezashpa uyachi» nicpica: «Sellashcami, mana rezai pudinichu» ningami.

¹² Cutin, rezanata mana yachacta: «Caita rezashpa uyachi» nicpica: «Mana rezanata yachanichu» ningami.

¹³ Chaimantami Mandac Diosca: «Cai gentecunaca shimillahuanmi ñucataca mañan. Jahua shimillahuanmi alli nincuna. Ashtahuanpish paicunapac shunguca ñucamanta carupimi. Shinallatac runacuna yachachishcata catishcallamantami ñucataca manchan.

¹⁴ Chaimantami cutinllatac jatun mancharinacunata ruhuashpa, cai gentecunaman ricuchigrini. Chashna ricuchicpica, alli yachaccunapac yachaipish, allita entendiccunapac entendishcapish yangami canga» nini.

¹⁵ ¡Aij, paicuna yuyarishcata ruhuangapac Mandac Diosmanta miticuccunalla! Paicunaca: «¿Ñucanchictaca pitac ricucun? ¿Pitac yachan?» nishpami, amsa tutapi imatapish ruhuancuna.

¹⁶ ¡Yallita millaitamari yuyanguichic! ¿Allpamanta mangata ruhuacca mangata ruhuana allpa shinachu canga? ¿Pai ruhuashca mangaca: «Mana canchu ñucataca ruhuarcangui» nishpa tapunchu? ¿Manga ruhuana allpapish mangata ruhuactaca: «Ima ruhuacushcata mana yachanguichu» ninchu?

Israelcuna llaquimanta llucshishcamanta

¹⁷ Caimanta asha quipaca Líbano urcuca alli pucuc allpacunami tucunga. Alli pucuc allpacunaca achca sacha allpami tucunga. ¿Chaitaca manachu yachanguichic?

¹⁸ Chai punzhapica ringri mana uyaccunapish libropi ima nicushcata uyangami. Ñahui mana ricuccunaca amsa cacpipish, pura tuta cacpipish ricungami.

¹⁹ Chaimantami cuyailla caccunaca cutinllatac Mandac Dios-huan cushicunga. Yalli huacchapish israelcunapac jucha illac Dios-huanmi cushicunga.

²⁰ Mana llaquic runacunaca tucuringami. Burlac runacunapish tucui chingaringami. Millaita ruhuana yuyailla causaccunapish, mana allita rimashpa,

²¹ shuccunata juchallichiccunapish, llacta pungupi cancunata rimaccunata urmachingapac tucllata churaccunapish, cashcata ruhuac runata yanga juchanchishpa, llaquichiccunapish tucuringami.

²² Chaimantami Abrahamta quishpichic Mandac Dios Jacobopac huahua huahuacunataca: «Cunanca, Jacoboca mana ashtahuan pingaichishpa, ñahui pucayachishcachu canga.

²³ Chaica, paicunapac chaupipi ñuca mancharinacunata ruhuashcata ricushpami, ñuca shutitaca jucha illacmi ninga. Israelcunapac Diostami alli ninga.

²⁴ Panda yuyaita chariccunaca alli yuyaita japingami. Juchanchiccunapish yachacungacunami» nirca.