ISAÍAS 28 - Dios Rimashcata Quillcashcami

Efraín aillu llaquita apanamanta

¹ ¡Aij, machashpalla causac jatun tucushca Efraín aillulla! Sumac chagra pambamanta jahua uma quingraipi tiyac corona shinami. Vinota ubiashpallami causan. Paicunaca anguyaclla sisa shinami.

² Riquichic, Mandac Diosca manchana rundu shina, jatun acapana huaira shina, pi mana jarcaipac yacu shina, imatapish tucuchiclla, jatun poderyuc runatami cachan. Paimi cai llactataca pambaman urmachinga.

³ Machashpalla causac jatun tucushca Efraín aillutaca paipac chaquihuanmi sarunga.

⁴ Pugru patapi tiyac chai sumaimana chagrapish, sisa shina coronapish punta pucushca grano shinami tucunga. Shinallatac usyai punzhacunapi punta pucushca higota pipish ricushcahuan japishpa micuc shinami tucunga.

⁵ Chai punzhapica tucuita Mandac Diosca pai acllashcapuramanta saquirishcacunapacca sumaimana achic nicuc corona shina, umapi churarina diadema shinami canga.

⁶ Paica allita ricushpa mandaccunamanca cashcata ruhuana yuyaitami cunga. Llacta pungupi cuidac soldadocunataca yallitami sinchiyachinga.

⁷ Huillaccunapish, curacunapish vinota ubiashpami pandarirca. Machana yacuta ubiashpami yuyai illac tucurca. Machana yacuta, vinota ubiashpami macharirca. Chaicunata ubiashpa macharishpami, imatapish muscuipi shina, Dios ricuchishcataca pandata huillarca. Imata ruhuashpapish pandarircami.

⁸ Tucui mizacunapimi arcadashpa mapayachishca. Imapish chuyaca mana tiyanchu.

⁹ Paicunaca: «Alli yachaica, ¿pitatac yachachin? Chai huillashcacunaca, ¿pitatac entendichin? ¿Chuchumanta cunanlla raquishca huahuacunatachu yachachin? Mana cashpaca, ¿raquishca huahuacunatachu yachachin?

¹⁰ Chai mandashcacunallatatac, chai shimicunallatatac, chai yachachishcacunallatatac, asha quillcashcacunallatatacmi cutin cutin yachachin. Ashataca caimanta, ashataca chaimantami yachachin» nincuna.

¹¹ ¡Diosca cai gentecunataca jarca jarca rimac runa shina, mana ricsishca rimaipimi yachachinga!

¹² Paicunatami Diosca: «Caimi samarinaca. Shaicushca runata samachichic. Caica samarina pushtumi» nirca. Ashtahuanpish paicunaca mana uyashun nircachu.

¹³ Chaimantami Mandac Diosca chai mandashcallatatac, chai shimicunallatatac, chai yachaicunallatatac, maijan quillcashcacunallatatac cutin cutin yachachinga. Ashataca caimanta, ashataca chaimantami paicuna llaqui tucungacaman, prezuringacaman rimacungalla.

Jerusalén pueblota rimashcamanta

¹⁴ Cai Jerusalenpi causaccunata burlac mandaccunalla, Mandac Dios rimashcata uyaichic.

¹⁵ Cancunaca: «Ñucanchicca huañuihuanpish, Seolhuanpish ari ninacurcanchicmi. Ñucanchictaca llullami miticuna huasi shina jarcacun. Chaimanta yacu jataric shina, shamushpapish ñucanchictaca mana llaquichingachu. Llullana huasipimi miticushun» nircanguichic.

¹⁶ Chaimantami Mandac Diosca: «Riquichic, ñucaca Sión llactapimi huasita ruhuashpa callaripi churana acllashca sumac sinchi rumita shina churarcani. Chai rumita cricca mana manchashpa callpangachu.

¹⁷ Ñucami alli ricushpa mandanataca cordelhuan shina medisha. Cashcata ruhuanataca nivelashpami ricusha» ninmi. Cancuna miticuna huasi shina, llullataca rundumi tucuchinga. Cancuna miticuna patacunataca yacumi apanga.

¹⁸ Huañuihuan ari nishcapish yangallami canga. Seolhuan ari nishcapish mana sinchi cangachu. Yallita llaquicunami cancunataca saruc shina pasanga.

¹⁹ Chai llaquicunami tucui tutamantacuna, chishicuna, tucui punzhacuna pasanga. Chai shamucta uyashpallami manchashpa urmanguichic.

²⁰ Chutarishpa siriringapacca camaca mana pactanchu, pullupish pilluringapacca mana pactanchu.

²¹ Mandac Diosca Perazim urcupi shinami shayaringa. Gabaón pambapi shinami, yallita piñaringa. Paica cancuna mana ricushca, mana entendipac mancharinata ruhuangapacmi piñaringa.

²² Cunanca, cancunata huatashca huascahuan ama ashtahuan sipichunca mana burlanachu canguichic. Chaica, tucuita Mandac Dios cai llactata tucuchinata yuyarishcatami uyarcani.

²³ Ñucata uyaichic. Ñuca ima nishcata allita uyaichic.

²⁴ Shuc runa tarpungapacca, ¿tucui punzhachu yapucunga? Chambacunata, ¿ñutuchishpallachu chishiyanga?

²⁵ Allpata ñutuchishca quipaca, ¿manachu eneldo muyuta cashpa, comino muyuta shic-huan? ¿Manachu trigotaca huachupi tarpun? ¿Manachu cebadatapish, avenatapish maipi tarpunallapitac tarpun?

²⁶ Tarpuc runataca paipac Diosmi allita ruhuanata yachachicun.

²⁷ Eneldo granotaca mana trillana pambapichu trillan. Comino granotapish mana carretahuanchu trillan. Ashtahuanpish eneldotaca varallahuanmi huactan. Cominotaca caspillahuanmi huactan.

²⁸ Grano urmangacamanllami trillan. Carreta ruedahuan saruchishpaca, mana trillana rueda quirucunahuanchu granota ñutuchin.

²⁹ Chaitaca tucuita Mandac Diosllatacmi ruhuarca. Paica imata ruhuanata yuyarishcapish sumaimanami. Paipac yachaipish mai sumacmi.