ISAÍAS 27 - Dios Rimashcata Quillcashcami

Israelcuna llaquimanta quishpirinamanta

¹ Chai punzhami Mandac Diosca dragontapish pilluric culebratapish, leviatán culebratapish paipac manchana espadahuan huañuchinga. Mama cuchapi tiyac manchana animalcunatapish huañuchingami.

² Mandac Diosca: «¡Chai punzhapica sumaimana vinota ruhuana chagrata cantanguichicmi!

³ Chai chagrataca Mandac Dios ñucami cuidashpa, yacutapish punzhanta churasha. Pipish ama yaicushpa dañachunmi punzhapish, tutapish cuidasha.

⁴ Chai chagrataca mana piñashachu. Casha yuracuna, cardos yuracuna tiyacpica, tucuita anchuchishpa, sarushpa, tucui rupachisha.

⁵ Maijanpish ñucahuan alli tucusha niccunallami saquiringa. ¡Ari, ñucahuan alli tucusha niccunaca alli tucuchunlla!» nisha.

⁶ Jacobopac huahua huahuacuna yura shina sapiyana punzhami shamunga. Israelcunaca sisac shinami sisanga. Chashnami paicunaca cai pachapi achca grano pucushca shina jundanga.

⁷ Dios paicunataca mana piña runacunata shinachu llaquichirca. Mana huañuchic runacunata shinachu huañuchirca.

⁸ Paicunataca mana yallita llaquichingachu. Inti llucshina ladomanta sinchi huairahuanmi caruman apanga.

⁹ Chashnami Jacobopac huahuacunapac yalli juchacunataca cungaringa. Paicuna rumimanta ruhuashca altarcunataca cabia rumita shina ñutuchishpa, Asera huarmi diosman riccha caspicunatapish, intiman riccha yanga dioscunatapish urmachishpa, Jacobopac huahuacunapac juchataca perdonanga.

¹⁰ Muyundita pircashca llactataca llaquinayaitami tucuchishca. Achca carpa huasicunaca shitashcami saquiringa. Chaipimi becicunata michincuna. Chai vecicunami yura ramacunata micushpa tucuchinga.

¹¹ Chai ramacuna chaquicpica, paquishpami saquinga. Chaicunataca huarmicunami yantashpa rupachinga. Cai gentecunaca mana entendincunachu. Chaimantami paicunata ruhuac Diosca manatac llaquinga. Paicunata ruhuac Diosca mana llaquishpami llaquichinga.

¹² Chai punzhapica Mandac Diosmi Eufrates jatun yacu ladomanta Egipto jatun yacu ladocaman trillac shina tandachinga. Chaipimi can israelcunataca shucllancaman tandachinga.

¹³ Chai punzhapica jatun trompetapi tocacpimi, Asiria llactapish chingarishca puriccunapish, Egiptoman apashcacunapish shamunga. Chashna shamushpami Mandac Diostaca paipaclla urcupi tiyac Jerusalenpi mañanga.