ISAÍAS 24 - Dios Rimashcata Quillcashcami

Cai pachata Dios llaquichinamanta

¹ Riquichic, Mandac Diosca cai pachataca chushacllatami saquinga. Cai pachapi causaccunataca caita chaita cachashpami, cai allpataca chushacllata ruhuanga.

² Chai llaquica llactapi causactapish, curatapish, amotapish, servictapish, amatapish, servic huarmitapish, randictapish, catuctapish, cullquita mañachictapish, cullquita mañactapish, imata mañachictapishmi llaquichinga.

³ Tucui allpaca chushaclla, tucui imapish illacmi saquiringa. Chaitaca Mandac Diosmi nin.

⁴ Cai allpaca chaquishpami huañushca shina tucun. Tucui cai pachami chaquishpa turicun. Cai pachapi alli gentecunami yura chaquic shina huañun.

⁵ Cai pachapi causaccunaca Dios mandashcacunata mana cazushpami, pandata ruhuashpa, huiñaita Dios-huan ari ninacushcatapish mana pactachirca. Chai juchacunamantami cai pachaca mapayarca.

⁶ Chaimantami cai pachataca Dios cachashca llaqui tucuchicun. Cai pachapi causaccunaca shitashcami saquirin. Cai pachapi causaccuna juchata ruhuashcamantami chashna llaquichin. Chaimantami cai pachapi causaccunaca chingarishpa, maijanlla saquirishca.

⁷ Uvas chagrapi ungüi yaicucpimi, vinopish tucurirca. Shungupi yallita cushicushpa causaccunami llaquirishpa huacan.

⁸ Panderopi huactashpa cushicunapish, yallita cushicushpa caparinapish, arpapi tocashpa cushicunapish tucurinmi.

⁹ Ña mana vinota ubiashpa cantangacunachu. Machachic yacupish jayacmi tucunga.

¹⁰ Llactacunapish tucurishpami llaquilla tucushca. Ama pi yaicuchun, pungucunapish huichcashcami.

¹¹ Ñancunapica vino illashcamantami huacashpa purincuna. Tucui cushicuimi tucurishca. Cuchicunaca cai pachapimi chingarishca.

¹² Llactacunaca llaquitami tucurishca. Pungucunapish tucui paquirishpa urmashpami siricun.

¹³ Tucui cai pachapi causaccunaca olivos yurata cuyuchishpa granota pallacpi, maijanlla saquiric shina, uvasta cosechashpa, tucui pallashca shinami saquiringa.

¹⁴ Chai saquirishcacunami Mandac Dios jatun cacta ricushpa, yallita cushicushpa cantanga. Yacu chaupipi tiyac llactacunapi causaccunapish alli ningacunami.

¹⁵ Chaimantami inti llucshina ladopi causaccunapish, mama cucha patapi causaccunapish israelcunata Mandac Diosta jatunyachishpa, alli ningacuna.

¹⁶ Cai pachapi causaccunaca: «¡Cashcata ruhuactaca sumaimanami cangui nichicyari!» nishpa cantashcatami uyarcanchic. Chaita uyashpami ñucaca: «¡Aij, ñucaca llaquipimi cani!» nircani. Mana cazushpami ñucataca llaquichin. Urmachic runacunami ñucataca urmachin.

¹⁷ Cai pachapi causaccunalla, cancunamanca yallita manchana jutcu urmachic tucllami llaquichingapac shuyacun.

¹⁸ Jahua pachamanta ventanata pascashpa, manchana llaquita cachacpica, miticushpa callpacushpaca jutcupimi urmanga. Chaimanta llucshishpaca tucllapimi japi tucunga. Cai pacha allpapish tucuimi cuyuringa.

¹⁹ Cai pachaca tucui ñutuchishpa tucushcami canga. Tucui cai pachapimi yallita manchai tiyanga.

²⁰ Cai pachaca machashca runa shinami, sansa nicunga. Chuclla shinami yallita cuyuringa. Cai pachapica jucha yallita miracpimi, tucui urmashpa manatac jataringa.

²¹ Chai punzhapica Mandac Diosmi jahua pacha angelcunatapish, cai pachapi tiyac jatun mandaccunatapish llaquichinga.

²² Paicunaca jutcupi prezucunata montonashca shinami canga. Carcelpi unaita prezushca quipami paicunataca yallita llaquichinga.

²³ Quillapish pingangami, intipish musparingami. Chaica tucuita Mandac Diosmi Sión urcupi tiyac Jerusalenpi mandacunga. Pai acllashca pushac yuyaccunapac ñaupapimi sumaimana achic nicuc tiyacunga.