ISAÍAS 23 - Dios Rimashcata Quillcashcami

Tiro llacta llaqui tucunamanta

¹ Tiro llacta llaqui tucunamanta huillashpaca: Chai llactaca shuc huasillapish mana saquirishpami, barcocuna shayachinapish tucurishca nishpami Quitimmanta shamuccuna huillarca. Tarsis llacta jatun barcocunata purichiccuna huacaichicyari.

² Mama cucha patapi causaccunapish, Sidón llactapi catushpa, randishpa causaccunapish upallaichicyari. Paicunami cancunamanca mama cuchata pasashpa, imatapish catuc carca.

³ Nilo yacu patapi pucushca chagracunatapish, chai yacu chimba ladopi pucushca granotapish apamuc carca. Chaimantami Tiro llactapi causaccunaca achca cullquita japic carca.

⁴ Mama cucha patapi tiyac muyundita pircashca llactalla, Sidón llactalla pingaiyari. Mama cuchaca: «Ñucaca jaicapi mana sajuarina nanaita ricsinichu. Mana sajuarishcanichu. Shuc cari huahuallatapish, shuc huarmi huahuallatapish mana huiñachishcanichu» nircami.

⁵ Egiptopi causaccuna Tiro llacta ima tucushcata uyashpaca llaquingami.

⁶ Tarsis llactaman richic. Tucui mama cucha patapi causaccunalla huacaichicyari.

⁷ ¿Cai llactachu ñaupa huatacunamanta pacha yallita cushicuc llacta? ¿Manachu chai llactapi causaccunaca chaquillahuan rishpa, caru llactacunapi causagriccuna carca?

⁸ Coronata churachic, catushpa, randishpa puriccuna causana Tiro llactataca, ¿pitac chashna llaquichinata yuyarishcayari? Paicunaca tucui catungapac, randingapac alli nishcami carca.

⁹ Tucuita Mandac Diosmi alli nishca, jatun tucushcacunata yangapi churashpa, pingaichingapac yuyarishca.

¹⁰ Tarsis llactapi causaccunalla, cancunapac barcocuna shayarinaca ña mana tiyanchu. Chaimanta jatun yacu Nilo patapi chagracunata ruhuagrichic.

¹¹ Mandac Diosmi paipac maquita mama cucha jahuata chutashpa, llactacunataca chucchuchishca. Paillatacmi Canaán llacta muyundi pircata tucuchichun mandarca.

¹² Cutinllatac paica: «Sidón llactapi llaquichishca carihuan mana chayarishca solteracunalla, ña mana ashtahuan cushicunguichu. Quitim llactaman pasangapac jatarichicyari. Chaipipish mana samaringuichu» nirca.

¹³ ¡Caldeocunapac llactata ima tucushcata ricuichicyari! Chai llactaca ña mana tiyanchu. Chai llactataca Asiriapi causaccunami jatun torrecunata shayachishpa, mandana huasicunatapish tucuchishca. Chashnami shitashca pambapi causac animalcuna causanata ruhuarca.

¹⁴ Tarsis llactamanta jatun barcocunata purichiccunalla, caparishpa huacaichicyari. Cancunapac sinchi torrecunaca tucurishcami.

¹⁵ Chai punzhacunapimi Tiro llactaca jatun mandaccuna causana huatapi shina, canchis chunga huatata cungarishca canga. Chai canchis chunga huata quipami Tiro llactapi causaccunaca cullquimanta huainayac huarmita shina, cantana tucunga.

¹⁶ Cullquimanta huainayac cungarishca huarmilla, canta tucui yuyarichunca cambac arpata japishpa sumacta tocashpa, cutin cutin cantashpa, tucui llactata muyuiyari.

¹⁷ Canchis chunga huata quipaca, Mandac Diosca Tiro llactapi causaccunataca cutin catushpa, randishpa causachunmi saquinga. Chaimantami paicunaca cai pachapi tiyac tucui llactacunahuan cutinllatac huainayanga.

¹⁸ Shina cashpapish, paicuna catushpa, randishpa tucui japishcaca Mandac Diospaclla chicanyachishcami canga. Paicuna catushpa, randishpa charishcacunataca mana huacaichingachu. Mana mirachingacunachu. Ashtahuanpish chaicunaca Mandac Diospac ñaupapi allita ruhuashpa causaccunapacmi canga. Chai allita ruhuaccuna alli micuchun, alli churarichunmi canga.