ISAÍAS 22 - Dios Rimashcata Quillcashcami

Muscuipi ricushcalaya pugru pamba llaqui tucunamanta

¹ Muscuipi ricushcalaya pugru pamba llaqui tucunamanta huillashpaca: ¿Imapactac cunanca llactapurallatac huasi jahuaman llucshinguichic?

² ¡Sinchita caparishpa, ima shinapish cushicuc gentecunalla! Caipi causaccunaca espadapi, mana jatun macanacuipichu huañurca.

³ Tucui cancunata mandaccunaca miticushpami callparca. Paicunataca mana flechahuanchu japirca. Paicuna caimanta llucshishpa, caruta rishca cacpipish, tucuitami prezurca.

⁴ Chaimantami ñucaca: «Yallita caparishpa huacangapac ñucamanta caruyai. Ñuca llactapi causaccunapac llaquimanta huacacpi, ama cushichinguichicchu» nircani.

⁵ Chaica, tucuita Mandac Diosmi llacta muyundi jatun pircata urmachingapac muscuipi ricushcalaya pugru pambaman yallita caparishpa, mancharishpa musparina punzhata cachashca. Urcuman uyarictami yallita caparin.

⁶ Elam llactamantaca flechacunata huacaichinata apashpami, caballocunapi, carretacunapi huichai rirca. Kir llactamanta soldadocunaca escudocunatami llucchirca.

⁷ Cancunapac sumac pugru pambacunapica carretacunami jundarca. Llacta pungupica caballocunapi ric soldadocunami carpacunata shayachishpa tiyarirca.

⁸ Judá llactapi causaccunapac jarcarinaca illanmi. Chai punzhacunami urcu caspicunahuan shayachishca huasipi macanacunata huacaichishca tiyacucta ricurcanguichic.

⁹ Davidpac llacta pircacunatapish caipi chaipi chictarishcatami ricurcanguichic. Urapi tiyac tanquepimi yacutapish tandarcanguichic.

¹⁰ Muyundi jatun pircataca ashtahuan sinchita shayachingapacmi Jerusalén huasicunatapish yupashpa urmachircanguichic.

¹¹ Mauca tanquemanta yacuta japingapacmi ishcai jatun pirca chaupipi tanqueta allichircanguichic. Ashtahuanpish chai tanqueta ruhuac Diostaca mana cazurcanguichicchu. Chaita utcallapitac ruhuashcata mana yuyarircanguichicchu.

¹² Tucuita Mandac Diosca chai punzhapica yallita llaquirichun, yuyarishpa huacachun, acchata pitirichun, sharpa churanata churarichun cayarca.

¹³ Huagracunata, ovejacunata huañuchishpa, micushpa, vinota ubiashpa yallita cushicushpami: «¡Micushunchic, ubiashunchic, cayaca huañushunmi!» ninguichic.

¹⁴ Tucuita Mandac Dios ñuca ringripi rimashpaca: «Cai juchata ruhuashcataca cancuna huañungacaman manatac perdonashachu» nirca. Chaitaca tucuita Mandac Diosmi nirca.

Sebna, Eliaquim runacuna llaqui tucunamanta

¹⁵ Tucuita Mandac Diosca: «Jatun mandacpac huasita ricuc Sebna mayordomopacman rishpa:

¹⁶ “¿Canca caipica imatatac charingui? Mana cashpaca, ¿pitac enterrangapacta lomacunapi, quingraicunapi jutcuta ruhuaccuna shina, enterrana jutcuta caipi ruhuachircangui?

¹⁷ Sinchi runalla, Mandac Diosmi caruman shitac shina, caru llactaman prezu apachun saquigrin.

¹⁸ Pelotata shitac shinami caruta cachanga. Can chaipi huañucpimi, can sumacta purina carretacunapish tucuringa. Cambac amopac huasitapish pingaichinguimi.

¹⁹ Mandac Dios ñucami can mandashpa tiyarinata anchuchishpa, can imata ruhuanamanta llucchisha.

²⁰ Chai punzhami Hilquiaspac churi ñucata servic Eliaquimta cayasha.

²¹ Cambac churanata paiman churachishpami, cambac chumbihuan chumbillichishpa, can mandanataca paiman cusha. Paimi Jerusalenpi causaccunapacpish, Judá aillupacpish taita shina canga.

²² Davidpac huasi llavetapish paimanmi cusha. Pai pascashcataca pi mana huichcangachu. Pai huichcashcataca pi mana pascangachu.

²³ Paitaca sinchi pushtupi clavashca clavota shinami sinchita churasha. Chaipimi paipac taitapac familiacunapac alli nishca canga.

²⁴ Paimantami taitapac huasi ucupurapish, paicunapac churicunapish, nietocunapish causanga. Tucui ima charishcacunapish, uchilla jarrocunamanta, vasocunamanta callarishpa, jatun tenajacunacamanmi paipi huarcushca shina canga.

²⁵ Chai punzhapimi sinchi pushtupi clavashca clavoca urmanga. Paipi huarcushcacunapish urmashpa tucuimi ñuturinga. Chaitaca Mandac Dios ñucami nini” ninmi ningui» nirca.