ISAÍAS 21 - Dios Rimashcata Quillcashcami

Babilonia llacta llaqui tucunamanta

¹ Mama cucha patapi tiyac shitashca pamba llaqui tucunamanta huillashcami: Shitashca pamba Neguevmanta acapana huaira shamuc shinami, manchana llactamanta shitashca pambata shamunga.

² Muscuipi shina ricuchishpaca sinchitami ricuchirca. Mana cazuc runaca mana cazushpami catin. Huañuchishpa tucuchic runaca tucuchishpami catin. ¡Elam llactapi causaccunalla, macanacungapac huichai richicyari! ¡Media llactapi causaccunalla, Babiloniata muyunacuichicyari! Ña mana llaquihuan caparinacui tiyangachu.

³ Chaimantami ñuca huashaca nanacun. Shuc huarmita sajuarina nanai japic shinami llaqui japirca. Yallita llaquilla cashpami, mana uyai pudini. Yallita manchaihuan cashpami mana ricui pudini.

⁴ Ñuca shunguca upayanmi. Manchaillami causani. Ñuca munashca tutayana chishica manchanami tucun.

⁵ Mizapi mantelta churashpami, micushpa, ubiashpa tiyacun. ¡Soldadota mandaccuna jatarichic, escudocunata aceitehuan cahuichic!

⁶ Mandac Diosca: «Tucui ima ricushcata huillachunmi shuc chapacta churagri.

⁷ Burrocunapi, camellocunapi ric soldadocunata, carretata ishcai caballocuna aisashcata ricushpaca, allita ricuchun, allita uyachun» ninmi.

⁸ Chai chapac león shina caparishpaca: «¡Mandac Dioslla, ñucaca tucui punzha, tucui tutami chapana torrepi shayacuni!

⁹ ¡Riqui, ishcai caballocuna aisashca carretapimi runacuna shamun!» nirca. Shina nishca quipaca: «¡Babilonia llactaca urmarcami, urmarcami! ¡Tucui paicunapac yanga dioscunapish pambaman urmashpami paquirirca!» nirca.

¹⁰ Shina nicpimi ñucaca: «Trillashpa huairachishca shina, ñuca llactapi causaccunalla, israelcunata Mandac Dios rimashcata uyashpami cancunamanca huillani» nircani.

Duma llacta llaqui tucunamanta

¹¹ Duma llacta llaqui tucunamanta huillashcami. Seir llactamantaca: «Chapac runa, ¿ñachu pacarimun? Chapac runa, ¿ñachu achicyagrin?» nishpami caparirca.

¹² Shina nicpimi, chapac runaca: «Ñami achicyagrin, achicyashpapish ña tutayangami. Imata tapusha nishpaca, tapuc shamunguilla» nirca.

Arabia llacta llaqui tucunamanta

¹³ Arabia llactata llaquichinamanta huillashpaca: Dedán llactamanta shamuccunalla, tutaca Arabia llacta sacha chaupipi miticushpa pacarichic.

¹⁴ Tema llactapi causaccunalla, yacunayaihuan huañucuccunata yacuhuan tupagrichic. Miticushpa puriccunata micunahuan tupagrichic.

¹⁵ Paicunaca espadata llucchishpa huañuchingapac caticushcamanta, flechahuan shitangapac caticushcamanta, jatun macanacuimantami miticushpa llucshin.

¹⁶ Mandac Diosca ñucataca: «Caimanta huata quipaca Cedar aillupac huahua huahuacuna sumac cashcaca, caipi chaipi trabajashpa puric runapac huata shinami chingaringa.

¹⁷ Cedar runapac huahua huahuacuna, flechahuan macanacuc sinchi runacunapish ashallami saquiringa. Chaitaca israelcunata Mandac Diosmi nin» nirca.