ISAÍAS 20 - Dios Rimashcata Quillcashcami

Egipto shinallatac Etiopía llactacunata Asiria llacta japishcamanta

¹ Asiria llactata jatun mandac Sargonca paipac soldadocunata mandac Tartantami Asdod llactaman cacharca. Chashna cachacpimi, chai llactapi causaccunahuan macanacushpa, chai llactata japirca.

² Mandac Dios Amozpac churi Isaiasta rimashpaca: «Caimanta rishpa, can churarishca sharpa churanatapish, cambac ushutatapish llucchi» nirca. Shina nicpimi, churana illac, lluchu chaquilla purirca.

³ Chai quipami, Mandac Diosca: «Ñucata servic Isaiasca quimsa huatatami churana illac, lluchu chaquilla purirca. Shina puricushpami, Egipto llactapi, Etiopía llactapi causaccuna llaqui tucunata ricuchirca.

⁴ Chashnami Asiria llactata jatun mandacca Egipto llactapi, Etiopía llactapi causac quipa huiñaicunatapish, yuyaccunatapish churana illac, lluchu chaquillata prezu apanga. Egiptopi causaccuna pingai tucuchunmi, lluchu siquillata apanga.

⁵ Shina apacpimi, Etiopía llactapi shunguta churaccunapish, Egipto llacta sumacmi niccunapish pingaihuan musparinga.

⁶ Chai punzhacunapimi mama cucha patapi causaccunaca: “¡Riquichic, ñucanchicca paicunapimi shunguta churarcanchic! ¡Asiria llactata jatun mandacpacmanmi ñucanchicta quishpichichun ric carcanchic! ¿Cunanca ima shinatac ñucanchicca quishpirishun?” ninacunga» nirca.