ISAÍAS 19 - Dios Rimashcata Quillcashcami

Egipto llacta llaqui tucunamanta

¹ Egipto llacta llaqui tucunamanta tucuita Mandac Dios huillashpaca: «Riquichic, Mandac Dios ñucaca callpac puyupimi Egiptoman yaicusha. Shina yaicucpica, chai llacta yanga dioscunaca paipac ñaupapimi chucchunga. Egiptopi causaccunapish, shungupi yallita mancharishpami, imatapish mana ruhuai pudinga.

² Egiptopi causaccunataca paicunapurallatacmi macanacuchisha. Huauquipurallatac, apanacucpurallatacmi macanacunga. Shuc llactaca caishuc llactahuan, shuc jatun mandacca caishuc jatun mandac-huanmi macanacunga.

³ Egiptopi causaccunapac yuyaita yanga ruhuashpami, paicuna parlanacushcatapish tucuchisha. Shina ruhuacpimi, paicunapac ruhuashcalla dioscunata, adivinocunata, huañushcacunata tapungapac ringacuna.

⁴ Egiptopi causaccunataca yallita llaquichic millai amopac maquipimi churasha. Shina ruhuacpimi, jatun mandacca paicunataca sinchita mandanga» ninmi. Chaitaca tucuita Mandac Diosmi nin.

⁵ Mama cucha yacupish chingaringami. Jatun yacupish chaquingami.

⁶ Jatun yacucunapish, tucyac yacucunapish tucuimi chaquinga. Chaipica carrizocunapish, totoracunapish chaquingami.

⁷ Jatun yacu patapi tiyac sachacunapish, chai yacu lado pambapi tiyac chagracunapish tucuimi chaquinga. Chashna chaquicpimi, huaira tucuita apanga.

⁸ Challuata japiccunapish, jatun yacupi anzuelohuan challuata japiccunapish, linchihuan challuata japiccunapish llaquimi tucunga.

⁹ Lino puchcahuan trabajaccunapish, linchicunata ruhuaccunapish imata mana ruhuai pudingachu.

¹⁰ Tucui telata ruhuaccunapish, trabajaccunapish llaquillami canga.

¹¹ Zoán llactata mandaccunaca imata mana entendiccunami. Faraonpac alli yachac runacunapish yangallatami cunashca. ¿Ima shinatac Faraonmanca: “Ñucanchicca alli yachaccunapac churicuna, ñaupa jatun mandaccunapac huahua huahuacunami canchic” ninguichic?

¹² Mandac Diosca Egiptota imata ruhuanatami yuyarishca. Chaita canman huillangapacca, cambac alli yachac runacunaca, ¿maipitac?

¹³ Zoán llactata mandaccunaca imata mana entendic shinami ruhuashca. Paicunataca Menfis llactata mandaccunami umashca. Huasita ruhuashpa callaripi churana rumi shina Egiptopi causaccunata llullashpa pandachishca.

¹⁴ Mandac Diosmi paicunapac chaupipi muspachic yuyaita churashca. Egiptopi causaccunataca shuc machashca runa shitachishca jahuallapitac sansan nicuc shinata ruhuashpami pandachirca.

¹⁵ Egiptopi causaccuna llullashpapish, chupa shinata, uma shinata, palmera yura shinata, carrizo yura shinata ruhuashpapish yangallami canga.

¹⁶ Tucuita Mandac Dios paipac llaquichi punzhapica Egipto runacunaca huarmicuna shinami, yallita mancharishpa chucchunga.

¹⁷ Tucuita Mandac Dios yallita llaquichigricucpimi, Egiptopi runacunaca Judapi causaccunaca yallita manchanga. Judá llactapi causaccunata yuyarishpallami yallita manchanga.

¹⁸ Chai punzhacunapica Egipto pichca llactapimi Canaán rimaita rimanga. Paicunaca tucuita Mandac Diosta catingapacmi ari ningacuna. Chai llactacunamanta shucca Sol shutimi canga.

¹⁹ Chai punzhapica Mandac Diospac shuc altarmi Egipto llacta chaupipica tiyanga. Egipto llacta lindero ladopica Mandac Diosta yuyachic shuc rumimi tiyanga.

²⁰ Tucuita Mandac Diosta yuyachic shuc señaltami Egiptopi causaccunamanca canga. Llaquichiccuna llaquichicucpi, Mandac Diosta caparishpa mañacpica, quishpichic mandactami cachanga.

²¹ Chaipimi Mandac Diosca Egiptopica ricsishca tucunga. Chai punzhapimi paicunaca Mandac Diosta ricsinga. Shina ricsishpami, animalcunata cushpa huañuchinga. Shinallatac grano ofrendatapish cungami. Mandac Diosman imata ruhuashami nishcatapish pactachingami.

²² Mandac Diosca Egiptopi causaccunataca chugrichingami. Shina chugrichishpapish paillatacmi alliyachinga. Mandac Diospacman paicuna cutiricpica, llaquishpami alliyachinga.

²³ Chai punzhapica Egiptomantaca Asiria llactaman shuc ancho ñanmi tiyanga. Chai llactapi causaccunaca Egiptomanmi yaicunga. Cutin chaipi causaccunaca Asiria llactamanmi yaicunga. Egiptopi causaccuna Asiria llactapi causaccunahuanmi Mandac Diosta servinga.

²⁴ Chai punzhapimi israelcunaca Egiptopi causaccunahuan, Asiriapi causaccunahuan quimsa tucunga. Cai pachapi causaccunamanca bendicionmi canga.

²⁵ Chaica tucuita Mandac Diosmi paicunataca: «¡Egiptopi causac gentecunaca ñucapacmi, Asiria llactapi causaccunapish ñuca maquihuan ruhuashcami! ¡Israelcunaca ñucapaclla chicanyachishcami! ¡Paicunatami bendiciani!» ningami.