ISAÍAS 18 - Dios Rimashcata Quillcashcami

Etiopía llacta llaqui tucunamanta

¹ ¡Aij, Etiopía llacta jatun yacu chimba ladopi, alascuna huaj nicuc llactalla!

² Paicunaca Nilo yacupimi huillaccunataca carrizo barcopi cachan. Yallita callpac huillagriccunalla, jagan nicuc manchana jatun runapacman richicyari. Paicunaca tucuipac manchana, yallita llaquichishpa manchachic, llactacunata quichuc sinchi runacunami. Paicunapac llacta muyunditaca jatun yacucunami ricun.

³ Tucui cai pachapi causaccuna urcucunapi banderata shayachishcata ricuichic. Cornetapi tocashcata uyaichic.

⁴ Mandac Diosca: «Ñuca mandacuc huasimantaca tamyashca quipa inti sumacta achicyachic shina, cosechana punzhacunapi tamya puyu shinami, casilla tiyarishpa ricusha.

⁵ Cosecha punzhacuna manarac chayacpi, sisa ña urmashpaca uvasmi pucun. Chai quipami pitina cuchillohuan ramacunata pitishpa anchuchinga.

⁶ Chai ramacunataca urcupi causac volac animalcuna, cai pachapi tiyac animalcuna micuchunmi saquinga. Chaipimi usyai punzhacunapica urcupi causac volac animalcuna, cutin tamya punzhacunapica cai pachapi tiyac sacha animalcuna micunga» ninmi.

⁷ Chai punzhapi jagan nicuc manchana jatun runacunaca tucuita Mandac Diosman cungapacmi ofrendata apamunga. Paicunaca yallita llaquichishpa, llactacunata quichuc sinchi runacunami ricun. Paicunapac llacta muyunditaca jatun yacucunami. Chai llactapi causaccunami tucuita Mandac Dios ñucapac shutipi mañangapac Sión urcuman shamunga.