ISAÍAS 17 - Dios Rimashcata Quillcashcami

Damasco llaqui tucunamanta

¹ Damasco llaqui tucunamanta tucuita Mandac Dios huillashpaca: «Riquichic, Damasco llactaca ña mana llactachu canga. Chaica rumi montonllami tucunga.

² Aroer llacta ladopi tiyac llactacunaca shitashcami. Animalcuna shayana pambami tucunga. Chaipi animalcuna sueñucucpica, pipish mana manchachingachu.

³ Efraín llactatapish, Damasco llactatapish jarcashca pircaca illanmi. Siria llactapi maijan saquirishcacunaca alli nishca israelcuna shinami ashalla tucunga» ninmi. Chaitaca tucuita Mandac Diosmi nin. Israelcunata Mandac Diosca:

Israelcuna llaqui tucunamanta

⁴ «Chai punzhapica Jacobopac huahuacunaca ña mana cushicushpa, jatun tucungachu. Paicunaca huira cashpapish tulluyangami.

⁵ Paicunaca cosechac runa maquihuan pitishca trigo shinami tucunga. Refaim pambapi cosechashca quipa grano umata tandashca shinami tucunga.

⁶ Israelcunaca olivos yurata cuyuchishpa pallacpi, ishcai, quimsa punta ramapi saquiric shinami saquiringa. Ashtahuan alli grano ramacunapi chuscu, mana cashpaca pichca puchushca shinami saquiringa» ninmi. Chaitaca tucuita Mandac Diosmi nin.

⁷ Chai punzhami runacunaca paicunata ruhuac Diosta ricunga. Chashnami quiquin ñahuihuan israelcunapac jucha illac Diostaca allita ricunga.

⁸ Paicunapac maquihuan ruhuashca altarcunatapish, Asera huarmi diosta yuyarina yuratapish, paicunapac maquihuan ruhuashca dioscunatapish, inciensota rupachina altartapish mana ricungachu.

⁹ Chai punzhapica muyundi pircashca paicunapac llactacunaca shitashcami saquiringa. Chai llactacunaca israelcuna amorreocunata, heveocunata llucchishpa cachacpi, shitashca saquiric llactacuna shinami saquiringa.

¹⁰ Chaica, jatun Rumi shina pacac, quishpichic Diosta mana yuyarishpa, cungarishcamantami chashnaca tucunga. Chaimantami cancuna shuctac llactamanta sumac yuracunata apamushpa tarpunguichic.

¹¹ Chai yuraca llaqui punzhapica chai punzhallatac huiñashpa, chai cayandi punzhapac jatunyashca cashpapish, tucui tucuringami. Maita mana jarcaipac jatun llaquimi tucuchinga.

¹² ¡Aij, mama cucha shina huaj nicuc tandanacushca gentecunalla! Achca yacu huaj nicuc shinami, shuc llactamanta runacunaca yallita caparishpa shamunga.

¹³ Chai gentecunaca achca yacu huaj nicuc shinami, yallita caparinga. Shina cacpipish, Dios rimashpa jarcacpica, urcupi tiyac ucsha shina, ñuto allpa acapana huairapi shinami, maita miticungapac ringa.

¹⁴ Chishiyanata cungailla manchana llaqui japishpaca cayandi tutamantaca tucuringami. Chashnami ñucanchictaca yallita llaquichishpa shuhuaccunaca tucunga.