ISAÍAS 16 - Dios Rimashcata Quillcashcami

¹ Shitashca pambapi tiyac Sela llactamantaca Sión urcupi causac llactata mandacman maltón cari ovejata cachaichic.

² Moab llactapi causaccunaca volac animal mancharishpa, cuzhata shitashpa ric shinami, Arnón ashalla yacu ladopica canga.

³ Allita cunaichic, allita yuyarinacuichic. Chaupi punzha cacpipish, cancunapac llanduhuan amsa tuta shinata ruhuaichic. Miticushpa puriccunata pacaichic. Ama piñaccunaman cuichicchu.

⁴ Moab llactamanta llucchishpa cachashcacunata cancunahuan causachun saquichic. Paicuna ama huañuchun jatun pirca shina pacaichic. Chai llaquichicca chingarircami. Huañuchishpa tucuchicpish tucurircami. Sarushpa llaquichicca cai pachamanta chingarircami.

⁵ Chai quipami Davidpac huahua huahuapuramanta shuc mandac llucshinga. Paimi David shayachishca carpa huasipica cuyaihuan mandanga. Paimi piñaccunataca llaquichishpa, cashcata ruhuashpa mandanga.

⁶ Moab llactapi causaccuna yallita jatun tucushpa, cariyashpa, ñahuita alzashpa puricuctami uyanchic. Ashtahuanpish yangamantami jatun tucuncuna.

⁷ Chaimanta tucui Moab llactapi causaccunami yallita caparishpa huacan. Kir-hareset llactapi tiyac chaquishca uvasmanta tortata yuyarishpami llaquirishpa, yallita huacan.

⁸ Hesbón, Sibma pambacunapi tiyac uvasca chaquishcami. Llactacunata mandaccuna shamushpami, sumac yuracunapac ramacunataca sarurca. Chai yura ramacunaca Jazerman, shitashca pambacamanmi carca. Shinami yallita mirashpa mama cuchatapish pasashca carca.

⁹ Chaimantami Jazerpi causaccuna Sibma pambapi tiyac uvas chagramanta huacashca shina huacasha. Hesbónlla, Elealella, cancunamantami ñuca huiquita jichasha. Cosechanamantapish, granota tandana pambamantapish macanacungapacmi caparicun.

¹⁰ Allita pucuc pambacunapi cushicushpa caparinaca ña illanmi. Uvas chagracunapipish mana ashtahuan cushicushpa cantangachu. Vinota ruhuaccunapish cutana pushtucunapica mana cutangachu. Uvasta cutashpa caparinaca illanmi.

¹¹ Moab llactapi causaccunamantaca ñuca shunguca arpa huacac shinami llaquilla tucun. Kir-haresetpi causaccunamantaca tucui shunguhuanmi huacani.

¹² Moab llactapi causaccuna lomacunapi tiyac altarcunapi paicunapac dioscunapac huasiman yaicushpa, shaicucta mañashcapish yangallami canga.

¹³ Utca huatacunapimi Mandac Diosca Moab llacta llaqui tucunamantaca huillarca.

¹⁴ Cunanmi Mandac Diosca: «Quimsa huata quipaca sumaimana Moab llactaca chaipi tucui causaccunandimi cumurichishca canga. Chai huatacunaca caipi chaipi trabajashpa puric runapac huatacuna shinami canga. Maijan uchillacuna, fuerza illaccunami saquiringa» ninmi.