ISAÍAS 15 - Dios Rimashcata Quillcashcami

Moab llacta llaqui tucunamanta

¹ Moab llacta llaqui tucunamanta huillashcami. Shuc tutallapimi Moab llactapi tiyac Ar-moab llactapish, Moab llactapi tiyac Kir-moab llactapish tucuchishca, chunlla saquiringa.

² Dibón llactapi causaccunaca lomacunapi tiyac altarcunapi huacangapacmi llucshirca. Moab llactapi causaccunaca Nebo, Medeba llactacunata tucuchishcamantami caparishpa huacanga. Tucuimi acchata pitishpa barbastapish anchuchinga.

³ Sharpa churanahuanmi purin. Tucui gentecunami huasi jahuapi tiyac pambacunapi, plazacunapi yallita llaquirishpa huacan.

⁴ Hesbón, Eleale llactacunapi causaccunaca Jahaza llactacaman uyarictami yallita caparinga. Chaimantami Moab llacta sinchi soldadocunapish mancharishpa huacacun. Paicunapac almaca huañunalla shinami tucunga.

⁵ Ñucaca Moab llactapi causaccunamantami caparishpa, tucui shunguhuan huacacusha. Chai llactamanta miticushpa riccunaca Zoar llactamanmi callpanga. Luhit huichaitami huacashpa huacashpa ringa. Horonaimman rina ñantami llaquinayaita caparishpa ringa.

⁶ Nimrim yacucunapish, quihuacunapish, Retoñac yuracunapish, tucui verdinlla yuracunapish chaquingami.

⁷ Chaimantami ima charishcacunatapish, ima huacaichishcacunatapish sauce yuracuna tiyac chimba ladoman apanga.

⁸ Chai runacuna llaquilla caparinacushcaca Moab llacta tupanacuicaman, Eglaim, Beer-elim llactacunacamanmi uyaringa.

⁹ Dimón llacta yacucunapipish yahuarmi jundanga. Ñucaca Dimón llactamanmi ashtahuan yallita llaquicunataca cachasha. Moab llactamanta maijan miticushpa riccunatapish, chai llactapi causaccunatapish leoncunami tucuchinga.