ISAÍAS 14 - Dios Rimashcata Quillcashcami

Israelcuna quiquin llactaman cutishcamanta

¹ Mandac Diosca Jacobopac huahuacunata cutin llaquishpami, israelcunataca paipaclla cachun acllanga. Shina ruhuashpami, quiquin llactallamantac cutichimushpa samachinga. Shuc llactamanta shamushcacunapish Jacobopac huahuacunahuan tandanacungami.

² Shuctac llactapi causaccunami paicunataca Israel llactaman pushamunga. Chashna shamucpimi, israelcunaca caricunatapish, huarmicunatapish Mandac Diospac llactapi servicta ruhuanga. Chaipimi paicunata prezuccunatapish prezunga. Paicunata utcapi llaquichiccunatapish llaquichinga.

³ Mandac Dios israelcunata nanaimantapish, yalli llaquimantapish, llaquita servichishpa causanamantapish samachi punzhapi,

⁴ Babilonia llactata jatun mandacta burlashpaca: «¡Saruc shina llaquichic runaca imami tucushca! ¡Pitapish mana uyac cari tucushca runaca imami tucushca!

⁵ Mandac Diosmi paita mana manchaccunapac varatapish, mandaccunapac taunatapish paquishca.

⁶ Paicunaca yallita piñarishpami, chugrichishpa llaquichic carca. Llactacunapi causaccunatapish yallita piñashpami sinchita mandacurca. Ashallatapish mana llaquishpami, catipi llaquichic carca.

⁷ Cunanca, tucui cai pachapi causaccunami imatapish mana manchashpa, Mandac Diosta alli nishpa, cushilla causan.

⁸ Líbano urcu ciprés yuracunapish, cedro yuracunapish yallita cushicushpaca: “Can huañushcamanta pacha, pi ñucanchictaca mana pitingapac huichai shamunchu” ninga.

⁹ Canta ricushpaca Seol ucupish cuyurircami. Canhuan tupachunmi, huañushcacunatapish ricchachirca. Cai pachapi tucui mandaccunatapish, jatun mandaccunatapish mandashpa tiyarinamanta jatarichircami.

¹⁰ Tucui paicuna caparishpaca: “¿Canpish ñucanchic shinallatac irquiyashpa, ñucanchic shinallatac tucurcangui?” ninmi.

¹¹ Canca alli nishca cashpapish, arpacunapi tocac cashpapish Seolmanmi urai shamushcangui. Caipica cambac cama shinaca curucunami. Cutin cata shinaca cuicacunami.

¹² ¡Tutamanta llucshic lucero shina cashpapish, ima shinatac jahua pachamanta urmarcanguiyari! Canca llactacunata mandashpa irquiyachic cashpapish, allpaman shitashcami cangui.

¹³ Cambac shungupica: “Jahua pachaman rishpami, Diospac lucerocunapac ladopi ñuca mandashpa tiyarinataca churasha. Dios-huan tandanacuna urcupimi, jahua ladoman tiyarisha.

¹⁴ Puyuta pasashpami ashtahuan jahuaman risha. Chaipi tiyarishpaca jahua pachapi causacuc Dios shinami casha” yuyacurcanguimi.

¹⁵ Ashtahuanpish cantaca Seol ucumanmi shitarca.

¹⁶ Can chaipi cacta ricuccuna cumurishpa chapashpa, shungupi yuyarishpaca: “¿Paichu cai pachapi causaccunata chucchuchishpa, llactacunata mandaccunata tucuchic runaca?

¹⁷ ¿Paichu tucui llactacunata shitashca pambata shina saquishpa, tucui llactacunata tucuchishpa, carcelcunatapish mana pascac runaca?” ninga.

¹⁸ Tucui jatun mandaccunami paicunaman chicanyachishca enterrana jutcullapi enterrarishca.

¹⁹ Ashtahuanpish canca enterrana jutcumantapish caruman shitashcami cangui. Cambac cuerpotaca millashpa, sarunacushpami espadahuan huañuchishcapac churanata shina shitashca cangui.

²⁰ Canca, cambac llactapi causaccunallatatac tucuchishcamanta, cambac gentecunallatatac huañuchishcamantaca mana caishuc jatun mandaccunahuan pacta enterraringuichu. Mana allita ruhuaccunapac huahua huahuacunataca manatac yuyarishcachu canga.

²¹ Taitacuna yalli mana allita ruhuashcamantaca cancunapac churicunata huañuchina pushtuta allichichic. Pacta cutin macanacungapac jatarishpa, llactacunata japishpa, cai pachapi tiyac llactacunapi jundanman» ninguichic.

²² Tucuita Mandac Diosca: «Ñuca jatarishpami Babiloniataca chingachisha. Maijan huahuacunapacpish, nietocunapacpish shuti ama ashtahuan tiyachunmi tucuchisha.

²³ Chai llactapica erizo animalcuna causana, yalli yacu allpacunatami ruhuasha. Tucuita tucuchic pichanahuan pichashpami tucuchisha. Chaitaca tucuita Mandac Dios ñucami nini» nirca.

Asiria llacta llaqui tucunamanta

²⁴ Tucuita Mandac Dios ari nishpaca: «Ñuca yuyarishcataca ruhuashatacmi. Imata ruhuanata yuyarishcataca pactachishatacmi.

²⁵ Asiria llacta runacunataca ñuca llactapimi huañuchisha. Ñuca urcucunapimi sarushpa tucuchisha. Shinami ñuca gentecunamanta yugota anchuchisha. Aparishca llashac quipitapish anchuchishami.

²⁶ Cai pachata llaquichingapacmi ña yuyarircani. Tucui llactacunata llaquichingapacmi maquita chutashca cani» nirca.

²⁷ Tucuita Mandac Diosmi chashna ruhuanata yuyarishca. Chaitaca, ¿pitac jarcai pudingayari? Paipac maqui alzashcataca, ¿pitac jarcangayari?

Filistea llaqui tucunamanta

²⁸ Jatun mandac Acaz huañushca huatapi Mandac Dios Isaiasta rimashpaca:

²⁹ «Tucui Filistea llactapi causaccuna llaquichic varata paquishcamantaca ama cushicuichicchu. Culebrapac huahua huahuacunamantaca shuc millai culebrami llucshinga. Chai culebramantaca volac culebrami llucshinga.

³⁰ Huacchacunapac punta huahuacunaca micunata charingami. Imata mana charic huacchacunaca samaringami. Ashtahuanpish cambac huahua huahuacunataca yarcaihuanmi huañuchisha. Maijan saquirishcacunatapish tucuitami tucuchisha.

³¹ ¡Llacta pungupi cuidaccuna huacaichicyari! ¡Llactapi causaccunapish sinchita caparichicyari! Jahua lado llactamantaca yana cushnimi llucshin. Tucui Filistea llactapi causaccunami yacuyac shina tucurigringuichic. Chai amsamantaca shucllapish mana puchungachu.

³² Llacta huillaccuna tapucpica, ¿imatatac nishun? Chaica: Mandac Diosmi Sión urcutaca churarca. Chaipimi llaquilla causac pai acllashcacunaca miticunga ninami canga» nirca.