ISAÍAS 12 - Dios Rimashcata Quillcashcami

Diosta pagui nishpa cantashcamanta

¹ Chai punzhapica canca: «Mandac Dioslla, cantami cantasha. Canca ñucahuan piñarishpapish chai piñarishcata pasachishpami cushichishcangui.

² ¡Mandac Diosca ñucata quishpichicmi! ¡Ñucata sinchiyachic, ñuca cantana, ñucata quishpichic Diosmi! Chaimanta paipi shunguta churashpaca imatapish mana manchashachu» ningui.

³ Cancunaca cushicushpami, quishpichic yacu jundumantaca yacuta llucchinguichic.

⁴ Chai punzhapica cancunaca: «¡Mandac Diostaca pagui nichicyari! ¡Paipac shutita caparishpa, pagui nishpa cantaichicyari! Pai ruhuashcataca tucui llactapi causaccunaman huillaichicyari. Paipac shuti jatun cashcata yuyarichicyari.

⁵ ¡Mandac Diosca jatun mancharinacunatami ruhuashca! Chaimanta paitaca salmocunahuan cantaichicyari. Chaicunataca tucui cai pachapi causaccunami yachana can.

⁶ Sionpi causaccunalla, yallita cushicushpa cantaichicyari. Cancunapac chaupipi causacuc israelcunapac jucha illac Diosca jatunmari» nichicyari.