ISAÍAS 11 - Dios Rimashcata Quillcashcami

Shuc mushuc jatun mandac tiyanamanta

¹ Isaimantaca shuc yura retoñac shinami, shuc jatun mandac llucshinga.

² Paihuanmi Mandac Diospac Espirituca causanga. Chai Espiritumi alli yuyaitapish, alli yachaitapish, cunana yuyaitapish, fuerzatapish paiman cunga. Shinallatac alli yachana yuyaitapish, Mandac Diosta manchana yuyaitapish cungami.

³ Paica Mandac Diosta manchashpami cushicunga. Paica mana ñahuita ricushpalla, shinallatac mana shuccuna nishcata uyashpalla taripangachu.

⁴ Ashtahuanpish huacchacunataca cashcata ruhuashpami taripanga. Llaquilla causaccunataca alli ricushpami mandanga. Cai pachapi causaccunataca caspihuan macac shinami, rimashpa llaquichinga. Paita mana manchaccunataca pucushpami huañuchinga.

⁵ Cashcata ruhuanahuanmi chumbillishca shina canga. Cutin pactachic canaca paipac cintura shinami canga.

⁶ Chaimantami atucca huahua ovejahuan causanga. Leopardoca huahua chivohuanmi siricunga. Leonca becihuanmi huiñanga. Cutin chaicunataca uchilla huambrallami michinga.

⁷ Vacapish, huarmi osohuanmi puringa. Huahua leoncunapish tandarishpami siricunga. Leonpish huagra shinami ucshata micunga.

⁸ Chuchucuc huahuapish huañuchic culebrapac jutcupimi pucllacunga. Chuchumanta raquirishca huahuapish millai culebra causana jutcupimi maquita satinga.

⁹ Ñucapaclla chicanyachishca urcupica millaita ruhuashpa, tucuchicca mana tiyangachu. Chaica Mandac Diosta ricsina yuyaimi mama cucha yacu jundashca shina, cai pachapica junda canga.

¹⁰ Chai punzhacunapica Isaipac sapimanta huiñashcatami llactacunapi causaccuna mashcanga. Paica banderata shayachishca shinami, tucuipac ricuipi shayacunga. Pai causana huasica sumaimanami canga.

¹¹ Mandac Dios pai acllashcacunata paipac maquita alzashpa Asiriamanta, Egiptomanta, Patrosmanta, Etiopiamanta, Elammanta, Sinarmanta, Hamatmanta, mama cucha patapi tiyac llactacunamanta cutichimui punzhacunapipish chashnallatacmi tucunga.

¹² Tucui llactapi causaccuna ricuchun, shuc banderata shayachishpami, llucchishpa cachashca israelcunataca cutin tandachimunga. Caita, chaita rishca Judá aillutapish cai pacha chuscu ladomantami tandachimunga.

¹³ Chaipica Efraín ailluca ña mana envidiangachu. Efraín ailluca Judá aillutaca mana ashtahuan envidiangachu. Judá ailluca Efraín aillutaca mana ashtahuan llaquichingachu.

¹⁴ Ashtahuanpish ishcai tucushpami, inti tigrana ladopi causac filisteocunataca urmachinga. Inti llucshina ladopi causaccunapac charishcacunatapish tucuimi quichungacuna. Edom, Moab llactapi causaccunaca paicunatami servinga. Amonitacunapish paicunatami cazunga.

¹⁵ Mandac Diosca Egiptopi tiyac mama cuchamanta llucshicuc yacutapish chaquichingami. Paipac poderyuc Espirituhuanmi Eufrates jatun yacu jahuata maquita chutashpa, chai yacumanta llucshicuc canchis yacucunatapish chaquichinga. Shina chaquichishpami israelcunataca paicuna churarishca ushutandi pasachinga.

¹⁶ Mandac Dios acllashcapuramanta maijan saquirishcacunataca Egiptomanta ñanta pascashpa huichai pushamushca shinami, Asiria llactamantaca pushamunga. Chai punzhapi israelcunaman ñan tiyashca shinami, ñan tiyanga.